काठमाडौं । नेपालमा हुन लागेको दक्षिण एसियाली खेलकुद (साग) प्रतियोगिताको मिति सर्ने पक्का भएको छ । नियमित समयभन्दा एकवर्ष ढिला गरी फागुन २५ गतेबाट गर्ने भनिए पनि दक्षिण एसियाकै सबैभन्दा ठुलो खेलमेला कम्तिमा ६ महिनाका लागि पछाडि धकल्ने तयारी भइरहेको जनाइएको छ     ।

युवा तथा खेलकुद मन्त्री जगतबहादुर सुनार विकको अध्यक्षमा नुवाकोटको ककनीमा सम्पन्न राष्ट्रिय खेलकुद परिषद् (राखेप) को १ सय १० औं बोर्ड बैठकले प्रतियोगिताका लागि निर्माणाधिन भौतिक पूर्वाधार समयमै बन्ने आधार नभएको भन्दै सागलाई निर्धारित मितिभन्दा कम्तिमा ६ महिना पछाडि सार्ने निष्कर्ष निकालेको बैठकमा सहभागी एक सदस्यले जनाए । 

“प्रतियोगिताको मिति सार्ने अधिकार दक्षिण एसियाली ओलम्पिक कमिटीसँग मात्र छ । तर उक्त प्रतियोगिता गर्ने नेपाल सरकारले हो । यही अवस्थामा साग फागनुमा गर्न सकिने आधार छैन । अहिले निर्माण भइरहेका भौतिक पूर्वाधारको प्रगति विवरण अध्ययन गरेर मिति सार्नेबारे निर्णय गर्ने भनिएको छ,” बोर्ड बैठकमा सहभागी एक सदस्यले नाम नखुलाउने सर्तमा भने, “कम्तिमा ६ महिना सर्ने पक्का हो । आठौं राष्ट्रिय खेलकुद नै फागुनमा हुन्छ । त्यसपछि अर्को सम्भव भयो भने चाँडोमा अर्को असोजमा साग हुन्छ । राष्ट्रिय खेलकुदबाट नै खेलाडी छनोट गरेर सागका लागि बन्द प्रशिक्षणमा राख्ने विषयमा छलफल भएको छ ।”

२०१६ मा भारतको गुहाहिटी र सिलोङमा सम्पन्न १२ औं सागमा नेपालले १३ औं संकरण आफुले गर्ने भनी झन्डा बोकेर आएको थियो । भूकम्पले भौतिक पूर्वाधार क्षतविक्षत बनाएको अवस्थामा नेपालले प्रतियोगिता समयमै गर्ने दाबीसहित आयोजनाको जिम्मेवारी लिएर फर्किएको थियो । 

प्रतियोगिता नियमित २–२ वर्षको अन्तरालमा हुने प्रावधान छ । तर २०१६ डिसेम्बरको अन्त्यमा काठमाडौंमै सम्पन्न दक्षिण एसियाली ओलम्पिक कमिटीको बैठकले निर्धारित समयभन्दा एक वर्ष ढिला हुने गरी फागुन २५ देखि चैत ४ गतेका लागि प्रतियोगिताको मिति तोकेको थियो । तर तयारी नुपेकाका कारण आठौं राष्ट्रिय खेलकुद नै फागुनमा हुने भएपछि साग निर्धारित मितिमा गर्न सम्भव छैन । यसका बाबजुद पनि सरकारले अझै सागको मितिबारे ठोस निर्णय गर्न सकेको छैन ।

“सरकारले विशेष गरी काठमाडौं र पोखरामा साग गर्ने तयारी गरेको हो । टेन्डर प्रकृयाका कारण पोखरा रंगशाला पुनःसंरचनामा ढिलाई भइरहेको छ । दशरथ रंगशालाको काम पनि फेब्रुअरी अन्तिम सम्ममा सक्ने सम्झैता भएको हो । त्यसपछिको समयमा सबै तयारी गर्न गाह्रो हुन्छ,” अधिकारीले भने, “आयोजना गर्न चाहने अरु देशलाई जिम्मेवारी दिउँ भन्ने कुरा पनि नउठेका होइनन् । तर यस्तो प्रतियोगिता आयोजनाले गर्दा धेरै अर्थमा फाइदा हुने भएकाले ढिला गरेर भए पनि आफैँ गर्ने निष्कर्षमा निस्किएको छ । तर, मिति सर्छ भनेर सार्वजनिक गर्दा निर्माण कार्यलगायतका कुरामा असर पर्ने हुनाले यसलाई बाहिर नल्याई आन्तरिक पत्राचारका कामहरु गर्ने निचोडमा बोर्ड बैठक सकिएको छ ।” 

दशरथ रंगशाला, सातदोबाटोको पौडी पोखरी, पोखरा रंगशाला लगायतका मुख्य पाँच खेलस्थलको पुनर्निर्माणको काम भइरहेको छ । त्यसको प्रगति विवरण हेरेर सागबारे निर्णय लिने खेलकुद मन्त्रालयका उच्च अधिकारीले जनाए ।  प्रदेश नम्बर ३ र ४ का मुख्यमन्त्रीलाई समावेस गरेर केही साताअघि मात्र प्रधानमन्त्रीको संयोजकत्वमा बन्ने मुल आयोजक समितिले पूर्णता पाएको छ । 

यसले पनि १३ औं सागको तयारी कुन अवस्थमा छ भन्ने प्रष्ट हुछ । त्यतिमात्र होइन अहिलेसम्म सरकारले कुन खेल कहाँ खेलाउने भन्ने टुंगो पनि लगाउन सकेको छैन । दक्षिण एसियाली ओलम्पिक कमिटीको पछिल्लो बंठकले सागमा २५ खेल समावेश गर्ने निर्णय गरेको थियो । नेपालको तयारीलाई मध्यनजर गर्दै श्रीलंकाले दक्षिण एसियाली ओलम्पिक कमिटीको बैठकमा पटक पटक आयोजनाको जिम्मेवारी आफुलाई दिन आग्रह गर्दै आएको छ ।