काठमाडौं । एमाले अध्यक्ष केपी शर्मा ओलीले प्रधानमन्त्री पुष्पकमल दाहाल तानाशाही बन्न थालेको आरोप लगाएका छन् ।
संविधान संशोधन विधेयक र पाँच नम्बर प्रदेश टुक्र्याएको विरोधमा आन्दोलित जनतालाई ‘वितन्डाकारी’को संज्ञा दिँदै सरकार उत्तेजना फैलाउन दत्तचित्त भएर  लागेको उनको कथन थियो ।
आइतबार एमाले संसदीय दलको कार्यालयमा नौ दलको पत्रकार सम्मेलनमा उनले दुर्गा तिवारी हत्याकान्ड त्यसैको पटाक्षेप भएको औँल्याए ।
“केही समय अघि उद्योगीलाई गोली हानियो । भर्खरै पाँच नम्बर प्रदेश टुक्र्याउनुहुँदैन भनेर आन्दोलनमा होमिएका एक युवाको हत्या भएको छ, यसमा सरकारको नियत प्रष्टै देखिन्छ,” उनले भने ।
उनले तिवारी हत्याकान्डबारे सत्यतथ्य नआउँदै सरकारसमर्थित सञ्चारमाध्यमले कहानी रच्न थालेको भन्दै हत्या रहस्यमय भएको जिकिर गरेका हुन् । त्यस्तै, उनले सरकारले एमालेलाई छिर्नै दिन्नौँ भन्दै हिँडेको बताउँदै प्रतिपक्षलाई निषेध गरेर कस्तो लोकतन्त्रको पक्षपोषण गर्न खोजेको भन्दै प्रश्न गरे ।
विधेयक छलफलै गर्न हुँदैन
अध्यक्ष ओलीले सदनमा पेश भएको संविधान संशोधन विधेयक पास पनि नहुने र छलफल पनि नहुने ठोकुवा गरे । उनले संशोधनका अधिकांश बुँदा संविधान नियम कानुन मिचेर आएको भन्दै छलफलै गर्न नमिल्ने प्रष्ट्याए । “मध्यरात अदालतको आदेशको अवज्ञा गर्दै विधेयक दर्ता गरियो । अँध्यारोमा दर्ता गरिएकाले यसको नियत उज्यालो छैन,” उनले प्रष्ट्याए ।
सरकारले संविधान उल्लङ्घन गरेकाले सम्झाउने दायित्व प्रतिपक्षको भएको उनको जिकिर थियो ।
“संसद्मा राष्ट्रियताको विषय, भौगोलिक अखण्डताको विषय छलफल गर्न मिल्छ ?,” उनले प्रश्न पनि गरे । यस्तै उनले संविधान संशोधनको बहानामा सरकारले मुलुकलाई द्वन्द्वमा धकेल्न खोजेको आरोप लगाए ।  “संविधान जारी भएपछि मारकाट गरियो । वितन्डा मच्चाइयो । अहिले पनि संशोधनको नाममा पुनः अराजकता मच्चाउन खोजिँदैछ ,” उनको भनाइ थियो ।

ढोकामा रिबन काटेर गुरिल्ला ट्रेल बन्दैन 
पूर्व प्रधानमन्त्रीसमेत रहेको ओलीले ढोकामा रिबन काटेर गुरिल्ला ट्रेल नबन्ने ठोकुवा गरे । प्रधानमन्त्री एक हेलिकप्टर मान्छे, कोटको खल्तीमा कैंची र रिबन बोकेर हिँड्ेका छन् । हिजोअस्ति त रिबन काट्न जान्न भन्दैथे, अहिले मख्ख परेर हिँडेका छन् । उनलाई लोकतन्त्र, विधिको शासन, संविधान केहीको वास्ता छैन, मतलबै छैन उनलाई,” उनको आरोप थियो ।
उनले गुरिल्ला ट्रेललाई वितन्डा ट्रेल भन्दै आलोचना गरे । “राष्ट्रियताको वास्ता छैन, उहिले मच्चाएको वितन्डालाई के–के नाम दिएर हुन्छ ?”

पाँच विकास क्षेत्रबारे मैले मुख खोलेको छैन
उनले आफूले पाँच विकास क्षेत्रबारे मैले मुख नखोलेको जिकिर गरे । “कसले उठाउनु भएको हो, उहाँको सिर्जनशीलतालाई पनि मान्नैपर्छ । त्यता म गइसकेको छैन, यसबारे मैले केही बोलेकै छैन ।”
उनले आफूलाई महेन्द्रीय राष्ट्रवादी भनेको भन्दै तानाशाहसँग तुलना नगर्न चेतावनी दिए । “इतिहासमा कुन तानाशाहले के भने भनेर मलाई नजोडौँ, अहिलेको सवाल अर्कै हो,” उनले भने ।

आवेग र उत्तेजनाले देश बन्दैन
आवेग र उत्तेजनाले देश नबन्ने बताउँदै उनले सरकारलाई सचेत रहन खबरदारी गरे ।
“दुनियाँमा कुनै प्रधानमन्त्रीले यसरी बोलेको सुन्नुभएको छ ? सरकारले आफैँ वितन्डा मच्चाउन उद्दत छ । हामी पनि उत्तेजनामा छैनौँ, आवेगमा आउन चाहँदैनौँ, सरकार संयमित र सचेत बनोस्,” उनले जोड दिए ।

निर्वाचन विधेयक अल्मल्याउने बाटो
“निर्वाचन आयोगको प्रतिवेदन सरकारले बुझ्न मानिरहेको छैन, निर्वाचन क्षेत्र निर्धारण आयोग बनेको छैन । विधेयकबारे समितिमा छलफल पनि गरेको छैन । कुन निर्वाचन कसरी गर्ने भन्ने कुनै योजना छैन,” ओलीले भने, “संसद्मा निर्वाचन विधेयक पेश गरेको छ भनेर अल्मल्याएर हुन्छ ?,” उनले प्रश्न गरे ।
उनले  आगामी माघभित्रमा तीनै तहको निर्वाचन गराउन सरकारलाई खबरदारीसमेत गरे ।
प्याकेजमा सहमति र राष्ट्रिय सरकार गठनबारे पत्रकारको जिज्ञासामा मौन रहेका ओलीले संविधान संशोधन विधेयक फिर्ता नलिउञ्जेल सदन सुचारु हुन नसक्ने स्पष्ट पारे ।