काठमाडौं । काठमाडौंको सिनामंगलमा रहेको ‘एभिएसन म्युजियम’ तीन हप्तामा ५० हजार विद्यार्थीले अवलोकन गरेका छन् । कात्तिक १९ गतेदेखि विद्यार्थीका लागि खुला गरिएको म्युजियममा मंसिर ९ गतेसम्म ५० हजारभन्दा धेरै विद्यार्थीले अवलोकन गरको म्युजियमले जनाएको छ ।
“करिब तीन हप्तामा ५० हजार भन्दा धेरै विद्यार्थीले अवलोकन गरेका छन्,” म्युजियमका संस्थापक क्याप्टेन वेद उप्रतीले भने, “म्युजियमप्रति ठूलो उत्साह र जिज्ञासा रहेको पाएका छौं ।”
उप्रेतीका अनुसार भोलि (मंसिर ११ गते) देखि सबैका लागि उक्त म्युजियम खुला गरिँदैछ । “मंसिर ११ गतेबाट हामी सबै उमेर तथा वर्गका लागि म्युजियम खुला गर्दैछौं,” उप्रेतीले भने, “सामान्य व्यक्तिलाई २५०, विद्यार्थीलाई १२५, सार्क राष्ट्रका नागरिकलाई २५० र विदेशीलाई ५०० रुपैयाँ प्रवेश शुल्क तोकेका छौं ।”
यसअगाडि विद्यार्थीका लागि मात्रै उक्त म्युजियम खुला गरिएको थियो । कक्षा ६ देखि १२ सम्मका विद्यार्थीका लागि बिनाशुल्क उक्त म्युजियम प्रवेश गर्ने व्यवस्था मिलाइएको थियो ।
दुई वर्षअघि त्रिभुवन अन्तर्राष्ट्रिय विमानस्थलमा अवतरणका क्रममा अगाडिको चक्का धस्सिएर दुर्घटना भएको टर्किस एयरको एयरबस–३३० लाई उप्रेती ट्रष्टले खरिद गरेर एभिएसन म्युजियममा रुपान्तरण गरेको हो ।
उक्त विमान काठमाडांैमा अवतरण गर्ने क्रममा २०७१ फागुन २० गते त्रिभुवन अन्तर्राष्ट्रिय विमानस्थलको रनवेमा चक्का धसिएर ग्राउण्डेड भएको थियो ।
उक्त विमानलाई सिनामंगलमा ल्याएर संग्रहालयमा परिणत गर्न २० भन्दा बढी स्वदेशी तथा विदेशी प्राविधिकले ९ महिना लगाएका थिए ।
एयरबसको लम्बाइ २०८ फिट, पखेटाको लम्वाइ १०९७ फिट र उचाइ ५६ फिट छ ।
७ करोड लगानीमा निर्माण गरिएको म्युजियममा ७ वटा हल छन् । यी हलहरुमा राइट दाजुभाइको पालादेखि अहिलेसम्मका ३५० भन्दा बढी ‘मिनिएचर’ मोडल एयरक्राफ्ट राखिएको छ । एयरबस–३३० को ग्लास ‘ककपिट’, आधुनिक लडाकु विमान, व्यापारिक एयरलाइन्सका विमान, नेपाल वायुसेवा निगमले उडान सुरु गर्दाको हवाई सेवा तथा नेपालमा उडेका जहाज, इक्विरेल हेलिकोप्टरका मोडल र क्याप्टेन उप्रेतीले आकाशबाट खिचेका एरियल तस्बिर रहेका छन् ।
उप्रेतीले यसअघि कैलालीको धनगढीमा १ करोड ५० लाख रुपैयाँ लगानीमा नेपालमै पहिलो ‘एयरक्राफ्ट म्युजियम’ २०७२ देखि सञ्चालनमा ल्याएका छन् ।
