काठमाडौं । कम्युनिस्ट आन्दोलनको उद्गमस्थल झापामा स्थानीय चुनाव केन्द्रित सरगर्मी बढेको छ । स्थानीय तह निर्वाचन आउन डेढमहिना भन्दा कम समय बाँकी रहँदा दलहरू चुनाव आफ्नो पक्षमा पार्न कस्सिएका छन् । 

सत्तारुढ दल नेपाली कांग्रेस घरदैलो अभियानमा जुटेको छ । सत्ता साझेदार दलहरू माओवादी केन्द्र, नेकपा(एकिकृत समाजवादी), जनता समाजवादी पार्टी पनि चुनाव लक्षित गतिविधि गरिरहेकै छन् । सत्तारुढ दलले गठबन्धन गर्ने भनेपछि प्रतिपक्षी दल एमाले पनि आफ्नो सम्पूर्ण शक्ति लगाएर प्रचारमा जुटेको छ । दुई पार्टीका अध्यक्षकै जिल्ला झापामा कांग्रेसका वर्तमान र पूर्वमहामन्त्री रहेको जिल्ला पनि हो । त्यसैले पनि झापाको स्थानीय चुनाव अझ रोचक बन्ने अवस्था छ । 

एमाले अध्यक्ष तथा पूर्वप्रधानमन्त्री केपी शर्मा ओलीको गृह जिल्ला झापा नै हो । एमालेले वडा स्थानीय तह निर्वाचन परिचालन कमिटीमार्फत ‘ग्राउन्ड जिरो’ मा पुगेर आफ्नो पक्षमा माहोल बनाउन कम्मर कसेको छ । यहीक्रममा उसले विगतको आफ्नो अवस्था, फूटका कारण हुनसक्ने क्षति तथा सुधारका लागि गर्नुपर्ने कामको पनि अध्ययन गरिरहेको छ ।

एमाले अध्यक्ष ओलीको मात्र नभएर झापा सत्तारूढ दल नेपाली कांग्रेसका पूर्वमहामन्त्री कृष्ण सिटौला र वर्तमान महामन्त्री विश्वप्रकाश शर्माको पनि गृह जिल्ला हो । सिटौलाको गृह नगर भद्रपुर हो भने शर्माको गृह नगर मेचीनगर हो । माओवादीका नेता राम कार्कीले निर्वाचन जितेको क्षेत्र पनि झापा नै हो भने माओवादी केन्द्रीय सदस्य धर्मशीला चापागाईंको गृह जिल्ला नै हो । राप्रपा अध्यक्ष राजेन्द्र लिङ्देनको गृह जिल्ला झापा राप्रपाको राम्रो जनमत भएको जिल्लामध्येको पनि हो ।

स्थानीय तह, जनसङ्ख्या, शिक्षा, स्वास्थ्य लगायतको क्षेत्रमा पनि रचाम्रो प्रगति गरेको झापा भारतसँग सिमा जोडिएकाले व्यापारका दृष्टिले पनि महत्व बोकेको जिल्ला हो । पाँचवटा प्रतिनिधि सभा निर्वाचन क्षेत्र रहेको यो जिल्लामा १० वटा प्रदेशसभा निर्वाचन क्षेत्र र १५ स्थानीय तह रहेका छन् ।  झापामा आठ नगरपालिका र सात गाउँपालिका रहेका छन् । राज्य पुर्नसंरचना पछि झापा सबै स्थानीय तहमा गरी एकसय ३१ वडा कायम भएका छन् । 

झापा नेपालको सु्दूरपूर्वी जिल्ला हो । जिल्लाका धेरै भूभाग भारतको पश्चिम बंगालसँग जोडिएको छ भने दक्षिणी भाग भारतको बिहारसँग जोडिएको छ । झापाको मेचीनगर नगरपालिका, भद्रपुर नगरपालिका, कचनकवल गाउँपालिका, झापा गाउँपालिका लगायतका स्थानीय तह भारतसँगको नाकाको रूपमा परिचित छन् । यी स्थानीय तहमा कुन पार्टीले कस्तो गर्नसक्छ भन्ने अनुमानका लागि पहिले राजनीतिक दलहरुले प्राप्त गरेको मत विश्लेषणको माध्यम बन्न सक्छ ।

 
फर्केर हेर्दा २०७४ को चुनाव 

२०७४ को स्थानीय तह निर्वाचनलाई फर्केर हेर्दा झापामा एमालेको मजबुत पकड देखिन्छ । एमालेले त्यसबेला झापाका १५ मध्ये सात स्थानीय तहको नेतृत्व जित्न सफल भएको थियो । एमालेले प्रमुख जितेकाबाहेक थप पाँच स्थानीय तहमा उपप्रमुख पद जितेको थियो । 

स्थानीय तह निर्वाचन २०७४ मा कांग्रेसले झापामा पाँच स्थानीय तहमा प्रमुख जितेको थियो भने थप एक स्थानीय तहमा उपप्रमुख जितेको थियो । तीन स्थानीय तहमा भने राप्रपाले प्रमुख जितेको थियो । 

ओलीको घर रहेको दमक नगरपालिकाको यस्तो थियो अवस्था 

दमक नगरपालिका नेकपा (एमाले) अध्यक्ष केपी ओलीको गृह नगर हो । यो नगरमा ओलीको पार्टी एमाले नै सबैभन्दा बलियो छ । २०७४ सालमा सम्पन्न भएको स्थानीय चुनावमा एमालेले नगर प्रमुख र उपप्रमुख दुबै जितेको थियो । 

नगर प्रमुखमा एमालेका रोमनाथ ओली १०८०६ मतका साथ विजयी भएका थिए भने उनका निकटतम प्रतिद्वन्द्वी राप्रपाका रामकुमार थापा थिए । थापाले ७६५५ मत पाएका थिए । यस्तै तेस्रो स्थानमा माओवादी केन्द्रका रेवतराज पुरी ६८९८ मतका साथ उभिन सफल भए । कांग्रेसका उमेदवार ढुण्डीराज भण्डारी ५५३९ मत ल्याएर चौथो भएका थिए । 

नगर उपप्रमुखमा पनि एमाले विजयी भएको थियो थियो । एमाले उमेदवार गीताकुमारी पौडेलले १२६२५ मत प्राप्त गरिन् । यता, दोस्रो स्थानमा रहेकी कांग्रेस उमेदवार रेगिना भट्टराईले ८९१२ मत प्राप्त गरिन् । राप्रपा उमेदवार रीताकुमारी बस्नेत श्रेष्ठले ४४९८ मत प्राप्त गर्दा माओवादीबाट शान्तिदेवी धिमालले ४३७४ मत प्राप्त गरिन् ।

१० वडा रहेको नगरमा एमालेले ८ नगर जित्दा २ नगर राप्रपाले जित्यो । वडा नम्बर १ मा राप्रपाका ताराप्रसाद अधिकारी ८०७ मत, २ मा एमालेका प्रजापति सापकोटा ११५२ मत, ३ नम्बर वडामा एमालेका नवीन बराल २०३३ मत तथा ४ नम्बर वडामा एमालेका कुमार साम्सोहाङ्ग १५६२ मत ल्याउँदै विजयी भए । 

नगरको वडा नम्बर ५ मा इन्द्र बहादुर गुरुङ्ग १४६७ मत, वडा नम्बर ६ मा एमालेकै टेक बहादुर थापा ९४४ मत तथा वडा नम्बर ७ मा राप्रपा उमेदवार भिम प्रसाद पौडेल ९६० मत सहित वडा अध्यक्षमा विजयी भए । यता, वडा नम्बर ८ मा एमालेका पशुपतीराज गौतम १०६७ मत , वडा नम्बर ९ मा  एमालेकै राम बहादुर धिमाल १३६८ र वडा नम्बर १० मा एमालेका बोधराज न्यौपाने ९५१ मत प्राप्त गर्दै वडामा विजयी भए । 

भद्रपुर नगरपलिका एमालेकै पकडामा 

कांग्रेस पूर्वमहामन्त्री कृष्ण सिटौलाको नगर भद्रपुरमा २०७४ सालमा भएको स्थानीय तह निर्वाचनमा भद्रपुर नगरपालिका प्रमुख उपप्रमुख एमालेले नै जितेको थियो । एमालेका तर्फबाट नगर प्रमुखमा जीवन कुमार श्रेष्ठले ११०४२ मत ल्याउँदै विजयी भएका थिए । कांग्रेसका तर्फबाट नगर प्रमुख उमेदवार गणेश पोखरेलले ७२१५ मत ल्याउन सफल भएका थिए । यस्तै राप्रपाका नवराज पनेरु २८२२ मतका साथ चौथो भएका थिए । 

यता, उपप्रमुखमा एमालेकै उमेदवार चन्द्रमाया श्रेष्ठ १०६५० साथमा विजयी भएकी थिइन् । दोस्रो भएकी काग्रेसकी तारादेवी भुर्तेलले ६४९८ मत मात्र प्राप्त गर्न सकिन् । यस्तै चौथो स्थानमा रहेकी राधा कार्कीले ३२७७ मत प्राप्त गर्न सकिन् । 

यता, वडातर्फ वडा नम्बर १ मा दशरथ प्रधानले ८२४ मत ल्याउँदै विजयी भए । वडा नम्बर २ मा एमालेका भिम बहादुर सुब्वा १११८ मत,वडा नम्बर ३ मा एमाले उमेदवार कमला थुलुङ ७०६ मत, वडा नम्बर ४ मा माओवादीका हंशधर राजवंशी ९०९ मत, वडा नम्बर ५ मा कांग्रेसका बन्धु कार्की १०३५ मत प्राप्त गर्दै वडा अध्यक्षमा विजयी भए । वडा नम्बर ६ मा एमालेका प्रेम बहादुर बरुवाल ७४० मत, वडा नम्बर ७ मा एमालेका विनोद प्रसाद पोखरेल १२७६ मत, वडा नम्बर ८ मा कांग्रेसका गौरव सुब्वा ९७० मत, वडा नम्बर ९ मा एमालेका सनिलाल राजवंशी १२१९ मत तथा वडा नम्बर १० मा एमालेका टेक बहादुर खड्काले १५७८ मत ल्याएर वडा अध्यक्ष बन्न सफल भएका थिए । 

मेचीनगर नगरपालिकामा प्रमुख कांग्रेस, उपप्रमुख एमाले

कांग्रेस महामन्त्री विश्वप्रकाश शर्माको गृह नगर तथा झापाको सबैभन्दा ठूलो नगरपालिका मेचीनगरमा प्रमुख पद कांग्रेसले जितेको थियो । कांग्रेसका उमेदवार बिमल आचार्य २०७७६ मत ल्याउँदै विजयी भए । उनले एमाले उमेदवार विष्णु प्रसाइलाई पराजित गरे । प्रसाईले १९१९२ मत प्राप्त गरे । चुनाव हारेका प्रसाई वाग्मती प्रदेश प्रमुख पछि बने । 

यता, उपप्रमुखमा एमालेकी मीना कुमारी पोख्रेल(उप्रेती) विजयी भइन् । उनले २००१६ मत प्राप्त गरिन् । यस्तै कांग्रेसबाट पराजित दुर्गा खतिवडाले १९१०६ मत प्राप्त गरिन् । 

वडातर्फ वडा नम्बर १ मा एमालेका पासाङ तामाङ विजयी भए । उनले १२१३ मत ल्याए । यस्तै वडा नम्बर २ मा एमालेका तिलक न्यौपाने १११८ मत, वडा नम्बर ३ मा एमालेका हर्क बहादुर बस्नेत १४१२ मत, वडा नम्बर ४ मा कांग्रेसका नविन बराल ९५० मत ल्याउँदै विजयी भए । 

नगरको ५ नम्बर वडामा कांग्रेसका योगेन्द्र थापा मगर १००७ मत, वडा नम्बर ६ मा कांग्रेसका ललित बहादुर तामाङ्ग २७४८ मत, ७ नम्बर वडामा कांग्रेसकै चन्दन मेचे १४५० मत, ८ नम्बर वडामा एमालेका विकेन्द्र कुमार धिमाल १४०९ मत, ९ नम्बर वडामा कांग्रेसका गोपाल खड्का २१६४ मत तथा १० नम्बर वडामा कांग्रेसका सुवेश कुमार पनेरु २४४३  मत ल्याउँदै विजयी भए । 

यता, वडा नम्बर ११ मा एमालेका  सन्तोष कुमार मेचे ९७१ मत, वडा नम्बर १२ मा माओवादीका नरेन्द्र धिमाल ९८० मत, वडा नम्बर १३ मा एमालेका कृष्ण सिग्देल ७६४ मत , वडा नम्बर १४ मा एमालेका शंकर प्रसाद पोखरेल ९६२ मत र वडा नम्बर १५ मा कांग्रेसका गुणराज भट्टराई १०३३ मतका साथ विजयी भए । 

विर्तामोडमा राप्रपा तेस्रो शक्ति  

पूर्वको प्रमुख व्यापारिक केन्द्रको रुपमा उदाएको विर्तामोड नगरपालिकामा २०७४ को स्थानीय चुनावमा जनताले एमालेलाई रोजेका थिए । एमालेबाट प्रमुख पदका उमेदवार ध्रुव शिवाकोटी ९११२ मत प्राप्त गर्दै जित हासिल गरेका थिए । उनका निकटतम प्रतिस्पर्धी कांग्रेसका जल कुमार गुरुङले ८२१७ मत प्राप्त गर्न सफल भए । यता, तेस्रो नम्बरमा राप्रपाका भक्ति प्रसाद सिटौलाले मत ल्याउन सफल भए । उनले ६१७० मत प्राप्त गरे । 

नगरको उपप्रमुख पदमा पनि एमालेनै विजयी भयो । एमालेका उमेदवार पवित्रा देवी महताराले १०४३७ मत प्राप्त गर्न सफल भइन् । यस्तै कांग्रेसबाट उमेदवार बनेकी पार्वता गिरी (भारती)ले ९०११ मत प्राप्त गरिन् । यता, राप्रपाकी लीला उप्रेतीले ३८७६ मतमात्र ल्याउन सकिन् । 

वडा तर्फ वडा नम्बर १ मा एमालेका उमेदवार अग्नी प्रसाद पाण्डे १२७२ मत ल्याउँदै विजयी भए । वडा नम्बर २ मा नगेन्द्र प्रसाद संग्रौला १५७९ मत, वडा नम्बर ३ मा कांग्रेसका भोजराज सिटौला १२९९ मत, ४ नम्बर वडामा कांग्रेसका कुल प्रसाद संग्रौला ११३२ मत ल्याउँदै विजयी भए । वडा नम्बर ५ मा एमालेका राजेन्द्र प्रसाद लिङ्गदेन २१०४ मत, ६ नम्बर वडामा कांग्रेसका सूर्य प्रसाद कन्दङवा ७५८ मत, वडा नम्बर ७ मा एमालेका गंगा बहादुर भट्टराई ९८१ मत, वडा नम्बर ८ मा राप्रपाका अजय कार्की १०२७ मत सहित विजयी भए । यस्तै वडा नम्बर ९ मा एमालेबाट पवित्रा पाठक ५७६ मत र वडा नम्बर १० मा कांग्रेसका दुर्योधन गुरुङ्ग ९३६ मतका साथ वडा अध्यक्ष विजयी भएका थिए । 

शिवसताक्षी नगरपालिकामा एमाले पहिलो दल  

झापा जिल्लामा गएको स्थानीय तह निर्वाचनमा शिवसताक्षी नगरपालिकामा एमाले विजयी भएको थियो । एमालेका उमेदवार चन्द्र कुमार शेर्मा १३४३९ मत सहित नगर प्रमुख बन्न सफल भएका थिए । उनलाई कांग्रेसका पर्शुराम ढुङ्गानाले पछ्याएका थिए । तर, ढुंगाना ५ हजार बढी मतान्तरले पराजित भएका थिए। 

यता, नगर उपप्रमुखमा एमालेकी भोज कुमारी नेपाल विजयी भइन् । उनी पनि कांग्रेसको उमेवारभन्दा ५ हजार मतान्तरले विजयी भइन् । विजयी नेपालले १३४७२ मत प्राप्त गर्दा कांग्रेसबाट उमेदवार बनेकी जय कुमारी चेम्जोङ्गले ८३६१ मत मात्र प्राप्त गर्न सकिन् । 

यता वडातर्फ पनि एमाले वलियो शक्तिको रुपमा उदाएको छ । १ नम्बर वडामा ७४९ मत सहित एमालेका सुवास राई विजयी भए । २ नम्बर वडामा एमालेका कुल बहादुर बस्नेत १०५५ मत, ३ नम्बर वडामा एमालेका पुण्य प्रसाद सापकोटा ८०७ मतका साथ विजयी भए । 

नगरको वडा नम्बर ३ मा भने कांग्रेसका अधिकचन ताजपुरीया १३८४ मतका साथ विजयी भए । ४ नम्बर वडामा एमालेका सत्यनारायण राजवंशी ९०३ मत, ५ नम्बर वडामा कांग्रेसका मनोज खुलाल ९८९ मत, ६ नम्बर वडामा एमालेका नविन ईजम १८२१ मत, ७ नम्बर वडामा केहरसिंह बस्नेत १६२६ मत, ८ नम्बर वडामा छविलाल पाठक १२३३ मत, ९ नम्बर वडामा एमालेका कर्ण बहादुर थापा १०३२ मत तथा १० नम्बर वडामा एमालेकै भैरव कुमार श्रेष्ठ १५७१ मत सहित वडा अध्यक्षमा विजयी भए ।

कन्काई नगरपालिकामा एमाले अघिअघि कांग्रेस पछिपछि 

जिल्लाको कन्काई नगरपालिकामा पनि एमालेनै वलियो शक्ति बनेर उदाएको थियो । पाँच वर्ष अघि चुनावमा एमालेका राजेन्द्रकुमार पोखरेल नगर प्रमुख बन्न सफल भएका थिए । उनले कांग्रेसका एकराज उप्रेतीलाई पराजित गरेका थिए । २ हजार बढी मतान्तरले पराजित गर्दै पोखरेल नगर प्रमुख बन्न सफल भएका थिए । पोखरेलले ८४१६ मत प्राप्त गर्दा पराजित एकराज उप्रेतीले ६१९७ मत प्राप्त गर्दै पराजय भोग्नुपरेको थियो । 

यता, नगर उपप्रमुखमा पनि एमालेनै विजयी भएको थियो । सूर्य चुनावचिन्हमा भोट प्राप्त गर्दै मन्जु प्रसाई करिव २ हजार मतान्तरमा विजयी हासिल गर्न सफल भएकी थिइन् । प्रसाईसँग कांग्रेसकी कविता घिमिरे पराजित भएकी थिइन् । मन्जुले ८५७६ मत प्राप्त गर्दा घिमिरेले ६५७९ मत मात्र प्राप्त गर्न सफल भइन् । 

नगरको वडा नम्बर १ मा एमालेका रोशनराज पोखरेल ८८७ मत ल्याउँदै विजयी भए । वडा नम्बर २ मा एमालेकै परशु गिरी ७३४ मत सहित विजयी भए । वडा नम्बर ३ मा कांग्रेसका रुद्रप्रसाद चिमरिया १९१९ मत, वडा नम्बर ४ मा एमालेका गोविन्द प्रसाद पौडेल ९०३ मत, वडा नम्बर ५ मा एमालेका कृष्ण बहादुर राई १२६८ मत तथा वडा नम्बर ६ मा कांग्रेसका लक्ष्मी प्रसाद ओली ४४८ मतसहित वडा अध्यक्षमा विजयी भए । नगरको वडा नम्बर ७ मा एमालेका लिला बहादुर कन्दङ्वा ८४० मत, वडा नम्बर ८ मा एमालेका प्रेम बहादुर कटुवाल ७७५ मत, वडा नम्बर ९ मा कांग्रेसका प्रेम प्रसाद राजवंशी ८४५ मत सहित वडा अध्यक्षमा विजयी भए । 

अर्जुनधारा नगरपालिकामा बलियो एमाले  

धार्मिक पर्यटकिय क्षेत्रको रूपमा पहिचान बनाएको अर्जुनधारा नगरपालिकामा गएको स्थानीय तह निर्वाचनमा एमाले विजयी भएको थियो । नगरपालिका प्रमुखमा सूर्य चुनावचिन्ह लिएर उमेदवार बनेका हरिकुमार राना मगर विजयी भएका थिए । उनले कांग्रेसबाट उमेदवार बनेका हेमप्रसाद खरेललाई पराजित गरेका थिए । विजयी मगरले १३ हजार ८७९ मत प्राप्त गर्दा दोस्रो स्थानमा आएका खरेलले ९ हजार ६४१ मत प्राप्त गर्न सफल भएका थिए ।

नगरमा उपप्रमुख पनि एमालेले जितेको थियो । एमालेकी उमेदवार कमला खतिवडाले कांग्रेसकी सरस्वती सिटौला (तामाङ)लाई पराजित गरेकी हुन् । खतिवडाले १२ हजार ८३१ मत प्राप्त गर्दा सिटौलाले १० हजार ५७९ मत प्राप्त गरिन् । 

११ वडा रहेको नगरमा ८ वडामा वडामा एमाले विजयी भएको छ । कांग्रेसले भने ३ वटा वडामा मात्र जित हासिल गर्न सफल भएको निर्वाचन आयोगको तथ्यांकले देखाउँछ । माओवादीले भने निल लागेको देखिन्छ । 

नगरको वडा नम्बर १ मा एमालेका गजाधर खतिवडाले ११७५ मत ल्याउँदै वडा अध्यक्षमा बाजी मारे । यस्तै वडा नम्बर २ मा ९५७ मतका साथ एमालेकै रघुनाथ खनाल वडा अध्यक्ष बन्न सफल भए । वडा नम्बर ३ मा भने कांग्रेसका जीव कुमार भण्डारीले १२२७ मत प्राप्त गर्दै वडा अध्यक्ष जित हासिल गरे । यता, वडा नम्बर ४ मा एमालेका दुर्गा प्रसाद दाहाल १११८ मत ल्याउँदै विजयी हुँदा वडा नम्बर ५ मा ११६४ मतका साथ एमालेकै ध्यान बहादुर भारती तथा वडा नम्बर ६ मा लोकनाथ गौतम ७८८ मत ल्याउँदै वडा अध्यक्षमा विजयी भए । 

२०७४ को स्थानीय तह निर्वाचनमा नगरको वडा नम्बर ७ मा कांग्रेसका नवराम ढुंगाना ९४२ मतका साथ विजयी हुँदा वडा नम्बर ८ मा पनि कांग्रेसकै गोपिचन्द्र गौतम ९७४ मतका साथ विजयी भए । यता, वडा नम्बर ९ मा एमालेका पुष्प कुमार प्रसाई १२२९ मत, वडा नम्बर १० मा एमालेकै बलदेव सिंह गोम्देन तामाङ्ग ११७८ मत र वडा नम्बर ११ मा भैरव बहादुर खड्का १४८९ मतका साथ विजयी भए । 

कचनकवल गाउँपालिकामा शक्ति सम्पन्न राप्रपा 

झापाको दक्षिणी गाउँपालिकामा राजेन्द्र लिङ्देनको नेतृत्वमा रहेको राष्ट्रिय प्रजातन्त्र पार्टी राप्रपा बिजयी भएको थियो ।

राप्रपाबाट उमेदवार बनेका अन्जरा आलम गाउँपालिका अध्यक्षमा विजयी भएका थिए । आलमसँग कांग्रेसका कालेन्द्र प्रसाद सिंह राजवंशी पराजित भएका थिए । एमालेबाट उमेदवार बनेका शेर बहादुर खत्रीले तेस्रो स्थानमा चित्त बुझाउनु परेको थियो । गाउँपालिकामा माओवादी केन्द्र भने चौथो भएको थियो । 

राप्रपाबाट गाउँपालिकमा अध्यक्षमा विजयी अन्जरा आलमले ५८१६ मत प्राप्त गरेका थिए । यस्तै कांग्रेसका उमेदवार कालेन्द्र प्रसाद सिंह राजवंशीले ५३५३ मत प्राप्त गर्दा एमालेका उमेदवार शेर बहादुर खत्रीले ३९७२ मत मात्र प्राप्त गर्न सके । 

गाउँपालिका उपाध्यक्षतर्फ पनि राप्रपानै विजयी बन्न सफल भयो । राप्रपाबाट उमेदवार बनेकी निमसरी राजवंशीले कांग्रेसकी उमेदवार गीता ओडारी खरेललाई पराजित गर्न सफल भएकी थिइन् । निमसरी राजवंशीले ५७७४ मत प्राप्त गर्दा कांग्रेसकी गीता ओडारी खरेलले ५०७२ मत प्राप्त गरिन् । एमालेबाट उमेदवार दिपतारा थाम्सुहाङ्गले ३२४२ मत मात्र प्राप्त गरिन् । 

गाउँपालिकाको वडा नम्बर १ मा राप्रपाका लक्ष्मीनारायण यादव ८६० मत सहित वडा अध्यक्षमा विजयी भए । यस्तै वडा नम्बर २ मा ६७९ मेख बहादुर भट्टराई, वडा नम्बर ३ मा ८७७ मत सहित राप्रपाका विजय कुमार राजवंशी वडा अध्यक्षमा विजयी भए । वडा नम्बर ४ मा भने ७८७ मत सहित कांग्रेसका परमानन्द सिंह राजवंशी, ५ नम्बर वडामा राप्रपाका महेशलाल गणेश ८३७ मत, वडा नम्बर ६ मा एमालेका ९५९ मत सहित कुल बहादुर कार्की तथा वडा नम्बर ७ मा कांग्रेसका भरत राजवंशीले ६९५ मत ल्याउँदै वडा अध्यक्ष बन्न सफल भएका थिए । 

कमल गाउँपालिकामा गोलाप्रथाबाट महिला अध्यक्ष 

कमल गाउँपालिकामा पनि नेकपा(एमाले)नै शक्तिमा छ । २०७४ को स्थानीय चुनावमा एमाले उमेदवार मेनुका काफ्ले गाउँपालिका अध्यक्ष बन्न सफल भइन् । उनी गोलाप्रथाबाट विजयी भएकी हुन् । चुनाव मार्फत उनले ८२७५ मत प्राप्त गरेकी थिइन् । यस्तै कांग्रेसका उमेदवार हुकुमसिंह राईले पनि समान मत प्राप्त गरे । अन्त्यमा गोला प्रथामार्फत काफ्ले विजयी भइन् । 

गाउँपालिका उपाध्यक्षमा पनि एमालेकै उमेदवार निर्वाचित भए । एमालेका उमेदवार बेनुप्रसाद शिवाकोटीले ९४१८ मत प्राप्त गर्दै विजयी भए । यता कांग्रेसका उमेदवार दिपा भण्डारी (गौतम)ले ४९९२ मत प्राप्त गर्दै दोस्रो स्थान हासिल गरिन् ।

गाउँपालिकाको १ नम्बर वडामा कांग्रेसका केदार कटुवाल विजयी भए । उनले ९१५ मत प्राप्त गरेका थिए । यता, वडा नम्बर २ मा एमालेका तारानाथ न्यौपाने ११६९ मत, वडा नम्बर ३ मा एमालेका नर प्रसाद दंगाल १०३४ मत तथा वडा नम्बर ४ मा एमालेका प्रेम बहादुर राईले १२२८ मत ल्याउँदै वडा अध्यक्षको कुर्सी सुनिश्चित गरे । गाउँपालिकाको वडा नम्बर ५ मा एमालेका डम्बर बहादुर निरौला १३३९ मत, वडा नम्बर ६ मा एमालेका नरेन्द्र भट्टराई १२९७ मत तथा वडा नम्बर ७ मा एमालेका पृथ्वीपती राई १४५५ मत प्राप्त गर्दै वडा अध्यक्ष बन्न सफल भए । 

गौरादह नगरपालिका प्रमुख कांग्रेसको पकडमा 

झापाको गौरादह नगरपालिका प्रमुख भने कांग्रेसले जितेको छ । कांग्रेसका उमेदवार रोहित कुमार शाहले एमालेका मदन प्रसाद अधिकारीलाई पराजित गर्दै नगर प्रमुख पदमा बाजी मारेका हुन् । विजयी शाहले १०३०८ मत प्राप्त गर्दा दोस्रो स्थानमा रहेका एमालेका अधिकारीले ९८५४ मत प्राप्त गरे । 

नगर उपप्रमुखमा भने एमाले विजयी भएको छ । एमाले उमेदवार गीता भेटवालले कांग्रेस उमेदवार सुमित्रा कुमारी खरेललाई पराजित गरिन् । विजयी भेटवालले १०६२० मत प्राप्त गर्दा पराजित खरेलले ७९११ मत प्राप्त गरिन् ।

नगरपालिकाको वडा नम्बर १ मा एमालेका नगेन्द्र भण्डारी १४३६ मत सहित विजयी भए । वडा नम्बर २ मा कांग्रेसका हेमन्त कार्की ९६६ मत, ३ नम्बर वडामा एमालेका गजेन्द्र प्रसाद घिमिरे ७६७ मत, वडा नम्बर ४ मा एमालेका मणिन्द्र कार्की १३६० मत, वडा नम्बर ५ मा एमालेका छत्रपति सुवेदी १४९८ मत सहित वडा अध्यक्ष विजयी भए । यता, वडा नम्बर ७ मा खड्ग प्रसाद पराजुली ११७२ मत, वडा नम्बर ८ मा बलराम खरेल एमालेका १३१६ मत तथा वडा नम्बर ९ मा एमालेका भूमीराज पोखरेलले ९०४ मत सहित वडा अध्यक्षमा विजयी भए । वडा नम्बर ९ मा भने कांग्रेसका सिताराम भट्टराईले १६०९ मत प्राप्त गर्दै विजयी भए । 

गौरीगञ्जमा राप्रपा पहिलो, चौथोमा एमाले

गोरीगञ्ज गाउँपालिकामा राष्ट्रिय प्रजातन्त्र पार्टीले गाउँपालिका अध्यक्ष जितेको छ भने उपाध्यक्ष पद कांग्रेसले जितेको छ । 

गाउँपालिका अध्यक्षमा राप्रपाका बाबुराजा श्रेष्ठ विजयी भएका छन् । उनले कांग्रेस उमेदवार फुलवती राजंवशीलाई पराजित गरे । बाबुराजा श्रेष्ठले ३७४० मत प्राप्त गर्दा फुलवती राजवंशीले ३४५३ मत प्राप्त गरिन् । यहाँ एमाले चौथो भएको छ । एमालेका श्याम कुमार ढकालले २७५७ मतमात्र प्राप्त गरे । 

यता गाउँपालिका उपाध्यक्ष भने कांग्रेसले जित्यो । पाँच वर्ष अघि भएको चुनावमा कांग्रेसका दिपिन्द्र थापाले ३४१४ मत प्राप्त गर्दै विजय हासिल गरे । दोस्रो भएकी एमाले उमेदवार मनिकादेवी राईले २८७० मत प्राप्त गरिन् । चौथो स्थानमा रहेकी राप्रपा उमेदवार शुशिला ताजपुरीयाले २२२६ मत प्राप्त गरिन् । 

वडातर्फ वडा नम्बर १ मा कांग्रेसका कार्तिकलाल राजवंशी १४१३ मतका साथ विजयी भए । २ नम्बर वडामा पनि कांग्रेसका अघनु प्रसाद राजवंशी ८८९ मत, ३ नम्बर वडामा कांग्रेसका मखना महतो ६६१ मतका साथ विजयी भए । गाउँपालिकाको वडा नम्बर ४ मा माओवादी केन्द्रका कुल प्रसाद गिरी वडा अध्यक्ष पदमा विजयी भए । उनले ३९२ मत प्राप्त गरे । वडा नम्बर ५ मा ६२४ मतका साथ एमालेका विजय प्रसाद सिंह र ६ नम्बर वडामा कांग्रेसका बद्री नारायण यादवले ५४० मत ल्याउँदै वडा अध्यक्ष पदमा विजयी भएको निर्वाचन आयोगको तथ्यांकमा उल्लेख छ ।

झापा गाउँपालिका अध्यक्षमा कांग्रेस, उपाध्यक्षमा एमाले 

भारतसँग सिमा जोडिएको झापा गाउँपालिकामा प्रमुखमा भने कांग्रेस विजयी भएको छ । यता, उपप्रमुखमा भने एमाले उमेदवार विजयी बन्न सफल भइन् । गाउँपालिका प्रमुखमा कांग्रेसका जयनारायण शाह विजयी भए । उनले ४३९३ मत ल्याउन सफल भए । यता दोस्रो भएका एमालेका गजेन्द्र ताम्लीले ३७८९ मत ल्याउन सफल भए । 

यस्तै गाउँपालिका उपाध्यक्षमा भने एमाले विजयी भयो । सूर्य चुनावचिन्हबाट चुनाव लडेकी कुन्तीदेवी बुढाथोकीले कांग्रेसकी बसुन्धरा थपलियालाई पराजित गरिन् । बढुथोकीले ३८१६ मत प्राप्त गर्दा थपलियाले ३५७६ मत प्राप्त गरे । तेस्रो भएका संघीय समाजवादी फोरम नेपालका उमेदवार गौरीशंकर राजवंशीले  २७१४ मत प्राप्त गरे । 

२०७४ मा सम्पन्न भएको स्थानीय चुनाव तर्फ गाउँपालिकाको वडा नम्बर १ मा स्वतन्त्र उमेदवार राजकुमार यादव विजयी भए ।

कांग्रेसका उमेदवार यादवले ५९३ मत प्राप्त गरे । यस्तै वडा नम्बर २ मा एमाले उमेदवार नेत्र बहादुर खड्का ७२३ मत, वडा नम्बर ३ मा कांग्रेस उमेदवार मोतीलाल गणेश ६९१ मत, ४ नम्बर वडामा एमाले उमेदवार राजु भारती ६५८ मत प्राप्त गरि वडा अध्यक्ष विजयी भए । ५ नम्बर वडामा दिनेश प्रसाद राजवंशी ४१७ मत, ६ नम्बर वडामा एमाले उमेदवार हरि बहादुर बानियाँ ९०७ मत र ७ नम्बर वडामा एमालेका नेत्र प्रसाद उप्रेती ५७५ मतका साथ वडा अध्यक्ष पदमा विजयी भए । 

बाह्रदशी गाउँपालिकामा कांग्रेस, वडामा एमाले 

बाह्रदशी गाउँपालिकामा भने नेपाली कांग्रेसले अध्यक्ष उपाध्यक्ष दुबै जितेको छ । गाउँपालिका अध्यक्षमा कांग्रेसका खड्ग प्रसाद राजवंशी विजयी भए । उनले एमालेका लक्ष्मण पाठकलाई पराजित गरे । विजयी राजवंशीले ५५३९ मत ल्याउन सफल भएका थिए । पाठकले भने ५१११ मत मात्र ल्याउन सफल भए । 

यता, गाउँपालिका उपाध्यक्षमा पनि कांग्रेसकै उमेदवार विजयी भएकी थिइन् । कांग्रेसकी रत्नाकुमारी राजवंशी ५४५३ मत ल्याउँदै विजयी भइन् । एमालेकी गगादेवी धमलाले ५२५६ मत मात्र ल्याउन सफल भइन् । 

तर, वडामा भने कांग्रेस विजयी हुन सकेको छैन । वडा नम्बर १ मा ५०० मत ल्याउँदै शंभु सिंह राजवंशी विजय भए । 

वडा नम्बर २ मा एमालेका यादव प्रसाद मिश्र १०३८ मत, वडा नम्बर ३ मा एमालेका विरेन्द्र प्रसाद राजवंशी ७०५ मत विजयी भए । वडा नम्बर ४ मा माओवादीका समिम मिया ४१४ मत, ५ नम्बर वडामा एमालेका भुपेन्द्र कटुवाल १२६९ मत, ६ नम्बर वडामा एमालेका रत्नप्रकाश याङहाङ्ग ९९३ मत र ७ नम्बर वडामा कांग्रेसका मित्रराज भट्टराई ६५९ मत ल्याउँदै वडा अध्यक्ष बन्न सफल भएका थिए । 

बुद्धशान्ति गाउँपालिका एमाले तत्कालीन जिल्ला अध्यक्ष पराजित  

बुद्धशान्ति गाउँपालिकामा भने नेकपा(एमाले)का तत्कालीन जिल्ला कमिटी अध्यक्ष चिन्तन पाठक पराजित भएका थिए । पाठक कांग्रेसका रमेश भुजेलसँग पराजित भएका थिए । निर्वाचन आयोगको तथ्यांकअनुसार रमेश कुमार भुजेल ७९९६ मत प्राप्त गरे । पराजित पाठकले ७३५३ मतमात्र प्राप्त गर्न सफल भए । 

यता, गाउँपालिका उपाध्यक्षमा भने एमालेले बाजी मारेको थियो । एमाले उमेदवार मिरा भूर्तेल ७४५७ मत प्राप्त गर्दै विजयी हुँदा कांग्रेसकी चन्द्रकला भट्टराईले ६८०४ मतमात्र प्राप्त गर्न सफल भइन् ।

गाउँपालिकाको १ नम्बर वडामा कांग्रेसका भिमकुमार नेवार १३३० मतका साथ विजयी भए । यस्तै २ नम्बर वडामा एमालेका दिलिप श्रेष्ठ १४२१ मत, ३ नम्बर वडामा कांग्रेसका कमल प्रसाद उप्रेती १४७८ मत तथा ४ नम्बर वडामा एमालेका बुद्धिमान लिम्बु १५१३ मतका साथ विजयी भए । गाउँपालिकाको वडा नम्बर ५ मा कांग्रेसका बासुदेव खतिवडा ७५० मत, ६ नम्बर वडामा कांग्रेसका शम्भुप्रसाद पौडेल ६५६ मत तथा ७ नम्बर वडामा माओवादीका मातृकाप्रसाद पौडेल ३०८ मतका साथ विजयी भए । 

हल्दिवारी गाउँपालिका प्रमुखमा राप्रपा 

हल्दिवारी गाउँपालिकामा राप्रपा अध्यक्ष राजेन्द्र लिङदेनका भाइ रविन्द्रप्रसाद लिङदेन गाउँपालिका अध्यक्षमा विजयी भएका छन् । उनले नेकपा एमालेका उमेदवारलाई हराउँदै चुनाव जितेका थिए । लिङ्देनले ३९४३ मत प्राप्त गरे । यता, एमाले उमेदवार मञ्जुदेवी सिटौलाले ३५४३ मत प्राप्त गर्न सफल भइन् । यस्तै कांग्रेसका दिलिप कुमार लिम्बुले २९१५ मत प्राप्त गरे । 

उपाध्यक्षमा भने एमाले विजयी भएको थियो । एमाले उमेदवार डम्बर बहादुर गिरीले ४३८६ मत प्राप्त गर्दै विजयी भए ।

कांग्रेसकी उमेदवार चन्द्रकला चाम्लीङ्गले २७४७ मत प्राप्त गरिन् । राप्रपाकी भारती दाहालले २७०८ मत प्राप्त गरिन् । 

वडातर्फ वडा नम्बर १ मा एमालेका त्रिलोचन सपाकोटा १६४३ मतका साथ विजयी भए । यस्तै वडा नम्बर २ मा माओवादीका राजेन्द्र याङहाङ्ग १२६३ मतका साथ विजयी भए । वडा नम्बर ३ मा एमालेबाट रोशन शिवाकोटी ६०४ मतका साथ विजयी भए ।

वडा नम्बर ४ मा कांग्रेसका होम प्रसाद चुडाल ७६८ मतका साथ विजयी हुँदा वडा नम्बर ५ मा राप्रपाका शेर बहादुर नेम्वाङ ४०६ मतका साथ विजयी भए । 

माओवादी भने कमजोर 

झापा जिल्लामा नेकपा (माओवादी केन्द्र) अधिकांस स्थानीय तह निर्वाचनमा तेस्रो स्थानमा मात्र उपस्थित हुन सक्यो । अर्जुधारा नगरपालिकामा पार्टीका तर्फबाट प्रमुख पदमा उमेदवार बनेका माओवादीका उमेदवार भुपेन्द्र नेउपानेले २ हजार ५०६ मत मात्र प्राप्त गर्दै तेस्रो स्थानमा हासिल गर्न सफल भएका थिए । सोही नगरमा उपप्रमुख पदमा उमेदवार बनेकी अस्मिता कन्दङ्गवा तामाङ्ग पनि तेस्रो स्थानमा खुम्चनु परेको थियो ।, उनले २ हजार ५०७ मत प्राप्त गरिन् । 

कचनकवल गाउँपालिकामा भने माओवादी चौथो स्थानमा पुगेको निर्वाचन आयोगको तथ्यांकले देखाउँछ । गाउँपालिका अध्यक्ष लडेका हंसनारायण राजवंशीले १२५० मत मात्र ल्याउन सफल भए । यस्तै उपाध्यक्ष पदमा इश्वरीमाया गाइनेले १३६७ मत मात्र प्राप्त गरिन् ।

कन्काइ नगरपालिकामा पनि माओवादी चौथो स्थानमा आएको थियो । माओवादीका गोपाल प्रसाद चुडालले ६३६ मत प्राप्त गरेका थिए । उनले स्वतन्त्र उमेदवार भीमप्रसाद अधिकारी भन्दापनि कम मत प्राप्त गरे । यता, उपप्रमुख पदमा शान्ता कुमारी अधिकारी भने तेस्रो स्थानमा आउन सफल भइन् । उनले ९७३ मत प्राप्त गरिन् । 

कमल गाउँपालिका पनि नेकपा माओवादी केन्द्र तेस्रो स्थानमा देखियो । पार्टीबाट गाउँपालिका अध्यक्ष लडेका विमल कुमार संग्रौलाले १९०९ मत प्राप्त गरे । यता, उपाध्यक्षमा गौरी राईले ३१४३ मत प्राप्त गर्दै तेस्रो स्थानमा चित्त बुझाइन् । 

गौरादह नगरापालिकामा पनि माओवादी तेस्रो शक्ति हो । तर, मतान्तर अन्य दलहरुसँग अत्यन्तै धेरै देखिन्छ । नगरप्रमुखमा माओवादीबाट उमेदवार बनेका पुष्पलाल ढकालले ३४२८ मत प्राप्त गर्दा उपप्रमुखमा उमेदवार बनेकी अर्पणा राजवंशीले ३९२० मत प्राप्त गरेको निर्वाचन आयोगको तथ्यांकले देखाउँछ ।

गौरीगञ्ज गाउँपालिकामा माओवादीका उमेदवार तेस्रो पोजिसनमा सिमित भएका छन् । माओवादीबाट गाउँपालिका अध्यक्ष लडेका विद्यानन्दसिंह राजवंशीले ३३५३ मत प्राप्त गर्दा पार्टीबाट उपाध्यक्ष पद लडेकी  कल्पना राईले २५९१ मत प्राप्त गरिन् । गाउँपालिकाको वडा नम्बर ४ पार्टीबाट कुल प्रसाद गिरी वडा अध्यक्ष पदमा विजयी भए । उनले ३९२ मत प्राप्त गरे ।

बाह्रदशी गाउँपालिकामा माओवादी तेस्रो स्थानमा रह्यो । अध्यक्ष लडेका देवी प्रसाद ओझाले १७९५ मत मात्र प्राप्त गर्न सके । यस्तै उपाध्यक्ष लडेकी सुकमती राजवंशीले १७३१ मत प्राप्त गरिन् । वडा नम्बर ४ ४१४ मतका साथ समिम मिया विजयी भए । 

बुद्धशान्ती गाउँपालिकामा पनि माओवादी तेस्रो भयो । गाउँपालिका अध्यक्ष लडेका खड्ग बहादुर तिम्सिना २०६६ मत ल्याए । उपाध्यक्ष लडेकी अस्मितकला लिम्बुले २५०८ मतमात्र प्राप्त गर्न सकिन् ।

भद्रपुर नगरपालिकामा मओवादीबाट प्रमुख उठेका शिव कुमार राजभण्डारीले ४१३४ मत प्राप्त गरे । यस्तै उपप्रमुख उमेदवार कुमारी स्वर्णीकाले ३९५७ मत प्राप्त गरिन् । 

मेचीनगर नगरपालिकामा माओवादीका हंसलाल राजवंशीले ७६९४ मत प्राप्त गरे । उनी तेस्रो स्थानमा रहे । यस्तै उपप्रमुखमा पार्टीबाट उमेदवार बनेकी इन्दिरा कार्की ७६९० मत प्राप्त गर्दै तेस्रो बनिन् । यता, विर्तामोड नगरपालिकामा भने माओवादी चौथो शक्तिमा सीमित हुन पुग्यो ।