काठमाडौं । नाबालिग एक किशोरीले आफूमाथि जबरजस्तीकरणी गरेको भनी अभिनेता पल शाहविरुद्ध उजुरी दिएपछि नेपाली मनोरञ्जन क्षेत्रमात्रै नभएर नेपाली समाज नै बहसमा केन्द्रित छ ।
जसका कारण फेसबुकका वाल र मिडियामा समग्र नेपाली मनोरञ्जन क्षेत्र, भाइरल हुने भोकले निम्त्याउने नकारात्मक असर र अभिभावकत्वको जिम्मेवारीजस्ता विषयमा बहस जारी छ ।
उनीहरुको विषयमा सुरुवाती दिनमा आरोपितको पक्षमा केही सेलिब्रेटी र प्रशंसकको समर्थन देखियो । त्यसपछि केही भोकल अभिनेत्रीलगायत दर्शक पीडित भनिएकी बालिकाको पक्षमा उभिन थाले ।
तर, पीडित नाबालिगको चरित्रमाथि प्रश्न गर्दै उनैमाथि अधिकांश प्रश्न तेर्स्याउनेको कमी पनि रहेन । जुन कुरा पितृसत्ताको अवशेष भएको समाजका लागि नौलो कुरा भएन ।
यसले महिलाले अझै आफूमाथि भएको अन्याय सहेर मौन बस्नुपर्ने कुरामा जोड दिएको देखिन्छ । फिल्म इन्डस्ट्रीमा महिलामाथि अझै पनि विभेद रहेको बताउँछिन् अभिनेत्री ऋचा शर्मा ।
“विभेद त हुन्छ नै । चाहे महिलाकेन्द्रित चलचित्र होस् वा पात्र र पारिश्रमिककै कुरामा किन नहोस् फिल्म इन्डस्ट्रीमा विभेद छ ।”
तर, उनी समग्र मनोरञ्जन क्षेत्र नै खत्तम छ भनेर भन्न नमिल्ने बताउँछिन् ।
कुनै समय फिल्मी इन्डस्ट्रीमा यौन दुर्व्यवहार हुने गरेको सुनिन्थ्यो । जसका कारण समाज र यही इन्डस्ट्रीभित्रका कलाकारले यस क्षेत्रमा आबद्ध महिला कलाकारलाई फरक नजरले हेर्थे ।
तर, अभिनेत्रीद्वय ऋचा शर्मा र केकी अधिकारी आफूले यस्तो दुर्व्यवहार आफूले भोग्न नपरेको बताउँछन् । यस्ता घटनामा केही कमी आए पनि पूर्ण रूपमा निर्मूल भइनसकेको उनीहरूको दाबी छ ।
कुनै महिलामाथि दुर्व्यवहार भयो भने समाजले केटी नै खत्तम भनेर चरित्रमाथि प्रश्न चिन्ह उठाउने, पीडितको परिवारलाई गलत दृष्टिकोणले हेर्ने र परिवारले पनि भविष्य हेर्ने हुँदा यसखालका घटना बाहिर आउन नसकेको ऋचा शर्मा बताउँछिन् ।
पछिल्लो घटना यसैको उदाहरण भएको केकीको जिकिर छ ।
भर्खर करियरमा उदाउँदै गरेकी बालिकाले एक उँचो दर्जामा पुगिसकेका र प्रशस्तै प्रसंशक कमाएका अभिनेताविरुद्ध बोल्दा उनको पक्षमा बोल्ने आवाज सुनिएन ।
इन्डष्ट्रिभित्र भन्दा पनि समाजले महिला कलाकारलाई हेर्ने नजर र व्यवहार आपत्तिजनक भएको उनको बुझाइ छ ।
फिल्म उद्योगबाट भन्दा पनि समाजले हेर्ने दृष्टिकोण बढी खराब भएको उनी बताउँछिन् । इन्टरटेन्मेन्ट इन्डस्ट्री उदार भएकाले दर्शकले पनि गलत तरिकाले लिने गर्दछन् ।
पब्लिक फिगर भएकाले सार्वजनिक स्थानमा प्रशंसक नजिक आएर छुन खोज्ने, सेल्फी खिच्न आउने र जे पनि भन्न मिल्छ भनेर सोच्नेहरूको हाबी भएको केकी बताउँछिन् ।
पछिल्लो केसकी पीडितको पक्षमा बोलेका कारण अभिनेत्री रेखा थापा, रिचा शर्मा, प्रियंका कार्कीलगायत अभिनेत्रीलाई ट्रोलरहरूले चरित्र हत्यासमेत गरे ।
जसपश्चात् अभिनेत्री थापाले त कानुनी बाटो रोजेकी छन् ।
यी घटनाले हाम्रो समाज कति शिक्षित, कानुन बुझेको र महिलाको पीडा कति बुझेको छ भन्ने बुझाउँछ ।
अभिनेत्री अधिकारी एक महिलाका लागि महिला कलाकार मात्रै नभएर पुरुष कलाकार सिंगो समाज अन्यायबारे बोल्नुपर्नेमा जोड दिन्छिन् ।
यो केसमा महिला पिछडिएको वर्ग भएकाले मास महिलाकै विपक्षमा उभिएको उनी बताउँछिन् । घटना टुंगिने प्रक्रियामा रहेकाले यसबारे चिर्नु जरुरी रहेको उनको भनाइ छ ।
अभिनेता पलको सम्बन्धको घटना बाहिरिएसँगै अभिनेत्री करिष्माले स्टाटस लेखेपछि पीडित किशोरीको पक्षमा मत बन्दै गएको थियो । तर, आलोचना बढेसँगै उनले सामाजिक सञ्जालबाट स्टाटस हटाएकी थिइन् । यद्यपि उनी आफू कसैको पक्ष/विपक्षमा आफू नबोलेको बताउँछिन् ।
“इन्डष्ट्रि मलाई मेरो आफ्नै परिवारजस्तो लाग्छ । त्यसैले केही कुरा उठ्यो भने म बोली हाल्छु । मैले पक्ष/विपक्ष लिएको होइन । उनीहरू दुवै मेरा छोराछोरीजस्तै हुन्,” उनले भनिन्, “तर, पब्लिक फिगर भएका कारण ट्रोलको सिकारमा भइहाल्छौँ ।”
इन्डस्ट्रीलाई दिएको योगदानलाई नहेरी नानाथरि कमेन्ट गर्दा मानसिक तनाव हुने गरेको उनी बताउँछिन् ।
अभिनेत्री करिष्मा मानन्धर, ऋचा शर्मा नाबालिग उमेरमै इन्डस्ट्रीमा प्रवेश गरेका थिए । करिष्मा चलचित्र क्षेत्रमा आउँदा १४ वर्षकी थिइन् भने रिचा १७ वर्षकी ।
त्यतिबेला उद्योग साँघुरो र पारिवारिक वातावरण हुँदा यौन दुव्र्यवहार कम हुने गरेको अभिनेत्री शर्माको अनुभव छ ।
भाइरल हुने लोभले अभिभावक आफैँले पनि आफ्ना नाबालिग छोरीलाई त्यस्तै हाउभाउ र वयस्कको गीतमा भिडियो बनाएर राख्ने गर्छन् ।
जसका कारण बालिगहरूलाई आफू परिपक्व भइसकेको हो कि भन्ने गलत बुझाइ हुने हुँदा अभिभावक सचेत हुनुपर्ने उनीहरूको जोड छ ।
किशोरावस्थामा हार्मोनल चेन्ज हुने उमेर भएकाले पनि अभिभावकले आफ्नो सन्तानको विशेष ध्यान दिनुपर्ने बताउँछिन् करिष्मा ।
त्यसैगरी, ऋचा पल– किशोरी घटना यस क्षेत्रमा आउनेहरू र उनीहरूका अभिभावकहरूका लागि शिक्षा भएको बताउँछिन् ।
उनी यसखालका घटना फिल्म इन्डस्ट्री मात्रै नभएर राजनीतिकलगायत क्षेत्रमा पनि व्याप्त रहेको बताउँछिन् । तर फिल्मी क्षेत्रका कुरा अलि धेरै बाहिर आउने गरेको उनको बुझाइ छ ।
“लैंगिक विभेद र दुर्व्यवहारबाट अछुतो कुनै पनि इन्डस्ट्री छैन्,” उनले भनिन् ।
लैंगिक विभेद र दुव्र्यवहारबाट बच्न केटी आफैँ जोगिनुपर्छ भन्ने मान्यता गलत रहेको बताउँदै उनले यस विषयमा समाज नै सचेत हुनुपर्ने बताइन् ।
ऋचा शर्मा, करिष्मा मानन्धर र केकी अधिकारी फिल्मी इन्डस्ट्रीमा भएका केही घटनाका आधार समग्र इन्डस्ट्री र यस क्षेत्रसँग जोडिएकाहरूलाई दोषपूर्ण दृष्टिले नहेर्न अनुरोध गर्छन् ।
-1716278128.jpg)
-1723532556.jpg)
-(1)-1723345266.jpg)
