काठमाडौं । गीतकारका रूपमा केही गीत श्रोतालाई सुम्पिसकेका उद्धव सापकोटाको संस्मरणात्मक निबन्धसंग्रह ‘संस्मरणमा जीवनयात्रा’ लोकार्पित भएको छ ।

बुधबार काठमाडौंमा आयोजित कार्यक्रममा प्रमुख अतिथि पूर्वप्रधानसेनापति राजेन्द्र क्षेत्रीलगायतले उक्त कृतिको लोकार्पण गरे । 
प्रमुख अतिथि क्षेत्रीले कृति लोकार्पण गर्दै अवकाशप्राप्त मानार्थ उप–सेनानी उद्धव सापकोटाले लेखेको यो पुस्तक नेपाली सेनामा प्रवेश गर्न चाहने युवा तथा भावी पिँढीका लागि यो पुस्तक प्रेरणादायी हुने बताए । 

उनले कृतिकार सापकोटा सेवाकालका सहयात्री भएको उल्लेख गर्दै पुस्तकमा आएका अनेक–अनेक प्रसंग सुरुचिपूर्ण भएको बताए । पूर्वप्रधानसेनापति क्षेत्रीले सेनामा अनुशासनको चर्चा गर्दै ‘सेनाले राजनीति नगर्ने, तर राजनीति बुझेको हुने’ बताए । 

साहित्यकार हरि अधिकारीले सार्वजनिक कृति सम्पादन गर्ने मौका मिलेको प्रसंग उठाउँदै यस पुस्तकले नेपाली सेनाको अनुशासनका बारेमा धेरै जानकारी दिने बताए ।

कृतिमाथि समीक्षात्मक टिप्पणी गर्दै डा. शेखरकुमार श्रेष्ठले कृतिभित्रका १६ शीर्षकमा सापकोटाले जीवनका महत्त्वपूर्ण पक्ष उजागर गरेको बताए ।

कृतिकारका शिक्षक लेखनाथ हुमागाईंले आफ्नो विद्यार्थीले गरेको प्रगतिले आफ्नो छाती चौडा भएको बताए । 

साहित्यकार श्रीओम श्रेष्ठ रोदनले घोस्ट राइटिङका माध्यमबाट लेखिएका कृतिको लेखक हुनुको कुनै अर्थ नहुने बताए । घोस्ट राइटिङ गर्ने प्रचलनले साहित्यलाई बिगारेको तर्क गर्दै सापकोटाले कृति आफैँले इमानदारीपूर्वक लेखेको उल्लेख गरे । 

नेपाल स्रष्टा समाजद्वारा आयोजित कार्यक्रममा कृतिकार सापकोटा, शंकर भारती र प्रदीप सापकोटाले मन्तव्य राखेका थिए ।