काठमाडौं । आख्यानका क्षेत्रमा कलम चलाउँदै आएका सर्जक दाजु गुरुङको पहिलो उपन्यास ‘निरजोया’माथि विमर्श सम्पन्न भएको छ । उनका यसअघि दुई कथाकृति प्रकाशित छ ।

शनिबार काठमाडौंमा आयोजित कार्यक्रममा उपन्यासकार अनिता कोइरालाले कृतिमाथि पाठकीय टिप्पणी गरिन् । उनले ‘निरजोया’मा मुगलान जाने प्रवृत्तिलाई प्रस्तुत गरिएको बताइन् । मलेसियाका श्रमिकको जीवन सचित्र भएर उपन्यासमा आएको उनले उल्लेख गरिन् ।

कार्यक्रममा समीक्षक हेम भण्डारीले ताप्लेजुङको पात्र, मलेसियाको कर्म, मले समाजमा नारीको अवस्था, निरोज र जोयाको लिभिङ टुगेदरमा बस्दै आएको जीवनबारे चर्चा गरे । उपन्यासमा सांस्कृतिक अन्तरघुलनको विषय पनि प्रकट भएको उनले बताए ।

भण्डारीले उपन्यास लीला चेतको दृष्टिकोणबाट लेखिएको भन्दै विदेशमा बसेका नेपालीको पीडा त्यसले झल्काएको उल्लेख गरे ।

नारी स्रष्टाहरूको समूह ‘कलमका साथी’द्वारा आयोजित कार्यक्रममा उपन्यासकार दाजु गुरुङका साथै समूहकी गीता रेग्मी र भारती न्यौपानेले कृति र कृतिकारका बारेमा बोलेका थिए ।