काठमाडौं । एकसाताको हारगुहारपछि खाद्यान्न ढुवानी गर्न नेपाली सेनाको हेलिकप्टर हुम्ला पुगेको छ । नेपाली सेनाको एमआई १७ हेलिकप्टर खाद्यान्न ढुवानीका लागि काठमाडौं–सुर्खेत हुँदै हुम्ला पुगेको नेपाली सेनाले जनाएको छ । 

तत्काल खाद्यान्न ढुवानी गर्न हेलिकप्टर पठाइएको सेनाले जनाएको छ । खाद्यान्न लोड गर्नका लागि १५ जना नाम्खा गाउँपालिका ६ का स्थानीय हिल्सामै छन ।  

गत साता सोमबार भोकमरीको समस्या बोकेर हुम्लाका संघीय सांसद छक्कबहादुर लामा र नाम्खा गाउँपालिका वडा नम्बर ६ का वडाध्यक्ष पाल्जोर लामा पाँच दिन लगाएर काठमाडौं आएका थिए । सोही दिन उनीहरूले गृहमन्त्रालय र अर्थ मन्त्रालयलाई तत्काल खाद्यान्न ढुवानी गर्न माग गरेका थिए । उनीहरूकै पहलमा हुम्लामा हेलिकप्टर पुगेको हो ।

नाम्खा गाउँपालिका वडा नंम्बर ६ का वडाध्यक्ष पाल्जोर लामा एकसातासम्मको हारगुहारपछि हेलिकप्टर हुम्ला पठाएको जानकारी दिए ।

‘‘म हेलिकप्टरमा जान सकिने अवस्था नरहेपछि हवाइजहाजमा हुम्ला पुगेको छु । हेलिकप्टर भर्खरै आइपुग्यो । अब आजै खाद्यान्न ढुवानी गर्ने भनेका छन्,” लामाले भने ।

नेपाली सेनाका प्रवक्ता सन्तोषबल्लभ पौडेलले गृह मन्त्रालयको निर्देशन बमोजिम राहत ढुवानीका लागि नेपाली सेनाको हेलिकप्टर पठाएको जानकारी दिए । ‘‘गृहको निर्देशन बमोजिम हामीले खाद्यान्न ढुवानीमा प्रयोग गर्न हेलिकप्टर पठाएका छौँ । त्यहाँ जिल्ला प्रशासन कार्यालयको समन्वयमा खाद्यान्न ढुवानी हुनेछ,” उनले भने ।

जिल्ला प्रशासन कार्यालय हुम्लाका प्रमुख जिल्ला अधिकारी गणेश आचार्यले लिमीवासीका लागि चीनले पठाएको, खाद्य संस्थान हुम्ला सिमिकोटमा रहेको खाद्यान्न पठाउने जानकारी दिए । ‘‘खाद्यान्न आजै ढुवानी गर्न सकिने अवस्था रह्यो भने आजै गर्छौं । आज ढिला भयो भने भोलि पहिलो घण्टामा खाद्यान्न ढुवानी गर्छौ,” प्रजिअ आचार्यले भने ।

वडाध्यक्ष लामाले भोकमरीको समस्या गृह मन्त्रालयमा राखेकै पछिल्लो दिन खाद्यान्न ढुवानी गर्ने भनिएता पनि खाद्यान्न ढुवानी हुन सकेको थिएन ।

गृहले शुक्रबार खाद्यान्न ढुवानी गर्न जिल्ला प्रशासन कार्यालय हुम्लालाई निर्देशन दिएको थियो । तर, भनेको समयमा खाद्यान्न ढुवानी हुन सकिरहेको थिएन ।

वडाध्यक्ष लामा सरकारले हेलिकप्टर हुम्ला पठाएपछि मात्रै हुम्ला जाने अडानमा काठमाडौंमै बसेका थिए ।

कार्तिक पहिलो साता नाम्खा गाउँपालिकालाई चीनले राहत स्वरुप ४ हजार ५०० बोरा मैदा र करिब ८०० बोरा चामल पठाएको थियो ।

उक्त राहत गाउँपालिकाले वितरण गर्न नपाउँदै हिमपात भएर हिल्सामै रोकिएको थियो ।

त्यसपछि मानिसले लिमी गाउँसम्म बोकेर लैजान सम्भव नभएपछि गाउँपालिकामै थन्किएको थियो । पछि लिमीवासीले भोकमरी सामाना गर्नुपर्ने भएपछि पाँच हजार मिटर उचाइमा पर्ने न्यालुलेकबाट तीन फिट हिउ पन्छाउँदै सदरमुकाम आएका थिए ।

हुम्लाका लागि छुट्याइएको खाद्यान्न नेपालगञ्ज, सुर्खेत र धनगढिका गोदाममा थन्किँदा हुम्लामा भोकमरी बढ्दै गएको थियो ।