विराटनगर । पहुँचवाला र आसेपासेलाई ‘सुटुक्क’ कोरोनाविरुद्धको खोप लगाएपछि नागकिस्तरबाट प्रदेश १ सरकारको चर्को आलोचना भइरहेको छ । 

विवादकाबीच सरकारका गल्ती कमजोरी ढाकछोप गर्न मुख्यमन्त्री र सामाजिक विकास मन्त्रीका निजी सचिवालयले आइतबार प्रष्टीकरण दिएका छन् । सचिवालयले जारी गरेको विज्ञप्तिमा पहुँचका आधारमा खोप नदिइएको बरु सञ्चारमाध्यममा आएका समाचाहरूलाई झुटो भनिएको छ । 

स्थानीय सिटी सिनेमा हलमा लगेर निकटवर्तीलाई कोरोनाविरुद्धको खोप लगाएपछि विवाद चर्किएको हो । सामाजिक सञ्जालमा शेरधन राई नेतृत्वको प्रदेश सरकार र सामाजिक विकास मन्त्रीविरुद्ध टिकाटिप्पणी भई रहेका छन् ।
 
खोपको अनुचित वितरणको सम्बन्धमा मुख्यमन्त्री राई र उनको कार्यालयको कुनै संलग्नता नभएको भन्दै राईका पे्रस सल्लाहकार ध्रुव सुवेदीले आइतबार विज्ञप्तिमार्फत प्रष्टीकरण दिएका छन् । यसैगरी सामाजिक विकासमन्त्री उषाकला राईका स्वकीय सचिव वीरेन्द्र मगरले अपरान्ह सञ्चार माध्यममा आएका समाचारको खण्डन गरेका छन । सचिवालयले आफ्ना मन्त्रीको बचाउ गरेपनि सामाजिक विकास मन्त्रालय र खोप लगाउने मुख्य जिम्मेवारी प्राप्त स्वास्थ्य कार्यालय मोरङको भनाइ भने बाझिएको छ । 

सामाजिक विकास मन्त्री उषाकला राईका प्रमुख स्वकीय सचिव वीरेन्द्र मगरले आइतबार प्रकाशित गरेको विज्ञप्तिमा जनाइएअनुसार खोप सम्बन्धी सबै जिम्मा केही समय अगाडि नै सबैको निवेदन र मागपत्रसहित भ्याक्सिन स्वास्थ्य कार्यालय मोरङलाई दिएको जनाएका छन् । जबकि खोप वितरणमा सामाजिक विकास मन्त्रीको एकल निर्णयकै आधारमा हुने गरेको स्वास्थ्य कार्यालयमा खोप प्रमुख रामानन्द यादवले बाह्रखरीलाई बताए । 

“मन्त्रीज्यूकै सिफारिसको आधारमा हामीले खोप लगाउने गरेका छौँ । हामीले मौज्दात रहेको खोपको अवधि पनि सकिन लागेकोले नागरिकलाई नै खोप लगाऔँ भनेका थियौँ । मन्त्रीज्यू र मन्त्रालयबाट नै आदेश भएबमोजिम हामीले खोप लगाउनेहरूको विवरण पनि पेश गरेका छौँ । तर, स्वास्थ्य कार्यालयलाई खोप दिइएको छैन ।” 

उनले मन्त्रीले सिफारिसको आधारमा कोभिसिल्डको दोस्रो डोज खोप दिने गरिएको सुनाए । प्रदेश १ का सभामुख प्रदिपकुमार भण्डारीले पनि सचिवालयमा केहीअघि सामाजिक विकास मन्त्रालयले नै खोपको प्रबन्ध गरिदिएको बाह्रखरीसँग बताएका थिए । 

मन्त्री राईका स्वकीय सचिव मगरले आइतबार प्रकाशित गरेको विज्ञप्तिमा भने अत्यन्त न्यून मात्रामा रहेको कोभिसिल्ड भ्याक्सिन फ्रन्टलाइनरलाई प्राथमिकताका आधारमा लगाउनेगरी केही समय अगाडि नै सबैको निवेदन र मागपत्रसहित भ्याक्सिन स्वास्थ्य कार्यालय मोरङलाई दिएको जनाएका छन् । स्वास्थ्य कार्यालयले मन्त्रालयलाई र मन्त्रालयले स्वास्थ्य कार्यालयलाई खोप लिनेको सूची एक अर्कालाई पठाएको बताएका छन् । 

“शुक्रबार विराटनगरस्थित सिटी सिनेमा हलमा लगाएको खोपका विषयमा सम्बन्धित कार्यालय र संलग्न कर्मचारीहरूलाई सोधपुछ र सो विषयमा छानबिन प्रक्रिया नै सुरु गरिएको छ,” मगरले प्रकाशित गरेको विज्ञप्तिमा जनाइएको छ ।

भयावह अवस्थामा खोप जस्तो विषय कसैले पनि र कुनै पनि निकायले दुरुपयोग गरिएको ठहरिएमा कानुनबमोजिम दण्डनीय हुने उनले जनाएका छन् । तर, लापरबाही र अनुशासनहीन काम गरिएको ठहरिएमा मन्त्रालयले कारबाही गर्ने दाबी गरेका छन् ।

अहिलेसम्म मोरङमा कोभिडसिल्डको पहिलो मात्रा ६६ हजार ६१५ र दोस्रो मात्रा ११ हजार ३४८ जनाले लगाएका छन् ।