काठमाडौं । विगतका वर्षहरूमा भन्दा यसपटक तामाङ जातिले मनाउने ल्होसारमा सर्वसाधारणको जमघटमा कमी आएको छ । कोरोना संक्रमणकै कारण सोनाम ल्होसारका अवसरमा कार्यक्रमहरु पनि नहुँदा जमघटमा कमी देखिएको बौद्ध क्षेत्र विकास समितिले जनाएको छ ।
तामाङ समुदायले धेरै भिड हुने कार्यक्रम नगरी ल्होसार मनाएको समितिका कार्यकारी निर्देशक वसन्त लामाले जानकारी दिए । आजदेखि २८५७औँ वर्ष प्रवेशसँगै मुसा वर्ष पूरा भई गाई वर्षमा प्रवेश भएको छ । ‘‘कोरोना भाइरसले गर्दा हामीले धेरै भिड नगरी साधारण चियापान गरी मनाएका छौं," उनले भने । उनका अनुसार यसअघि सातादिनदेखि नै बौद्ध, स्वयम्भ"लगायत गुम्बाहरूमा निकै खुसीयाली छाउँथ्यो ।
ल्होसारलाई मुसा, गाई, बाघ, खरायो, ड्रागन (मेघ), सर्प, घोडा, भेडा, बाँदर, चरा, कुकुर र सुँगुर गरी १२ वर्गमा सोनाम ल्होसारलाई विभाजन गरिएको छ । ल्होसारका १२ वटै वर्ष पशुपक्षीका नामबाट गणना गरिएको छ ।
लाइनबद्ध रुपमा बौद्धका गुम्बामा गएर घेला (लामा) बाट आशीर्वाद लिएको स्थानीय साङ्गे लामाले बताए । उनले भने, ‘‘देशभर ल्होसारकै अवसरमा सरकारले सार्वजनिक बिदा पनि दिएको छ । तर ल्होसारमा भने खुलेर रमाइलो गर्न पाइएन ।”
कोरोना महामारीका कारण यसपालि स्वास्थ्य मापदण्ड अपनाएर भिड नहुने कार्यक्रम गरेको बौद्ध क्षेत्र विकास समितिका अध्यक्ष चन्द्रमान लामाले जानकारी दिए । बौद्ध क्षेत्रमा पनि केहीबेर सांस्कृतिक झाँकीसहित बाजागाजा र्याली निकालिएको थियो । उपत्यकालगायत देशका विभिन्न क्षेत्रमा ल्होसार पर्व आफ्नो गच्छेअनुसार मनाइएको छ ।
हेरौं थप तस्बिर :
