काठमाडौं । कतारका अमिर शेख तमिम विन हमाद अल थानीको नेपाल भ्रमणमा नेपालले एउटा राम्रो अवसर गुमायो । त्यो हो– फुटबल र क्रिकेटका स्टेडियम निर्माण गर्ने अवसर । त्यो पनि कतारको सहयोगमा ।
नेपालका लागि कतारका राजदूत मिशाल बिन मोहम्मद अली अल–अन्सारीले कतारका अमिर थानीको नेपाल भ्रमणका बेला ‘सिम्बोलिक’ रुपमा फुटबल र क्रिकेटका स्टेडियम निर्माण प्रक्रिया अगाडि बढाउने इच्छा व्यक्त गरेका थिए ।
परराष्ट्र मन्त्रालयले उक्त जानकारी युवा तथा खेलकुद मन्त्रालयलाई दियो । कतारका अमिरको नेपाल भ्रमणको तयारी गर्दैगर्दा यस्तो जानकारी पाएपछि खेलकुद मन्त्रालयले गृहकार्य गरेको थियो । खेलकुद मन्त्रालयले क्रिकेट र फुटबलका एक–एक रंगशाला बनाउन कतारलाई अनुरोध गर्ने प्रस्ताव बनाएर परराष्ट्र मन्त्रालयलाई पठायो ।
कतारका अमिर थानीको दुई दिने नेपाल भ्रमणका क्रममा नेपाल र कतारबीच आठ बुँदे सम्झौता तथा समझदारीपत्रमा हस्ताक्षर हुँदा युवा तथा खेलकुद क्षेत्र पनि समावेश थियो । तर त्यसमा स्टेडियम उल्लेख गरिएको छैन ।
खेलकुद मन्त्रालयका प्रवक्ता शिवप्रसाद रेग्मीले परराष्ट्र मन्त्रालयमार्फत् खेलकुद मन्त्रालयले कतारसमक्ष क्रिकेट र फुटबलको एक–एक रंगशाला बनाउने प्रस्ताव पेस गरिएको बताए ।
उनले हस्ताक्षरमा नेपाल र कतारबीच युवा र खेलकुदको क्षेत्रमा सहयोग आदान–प्रदानसम्बन्धी समझदारी भए पनि स्टेडियम उल्लेख नगरिएको बताए ।
“यो समझदारीका आधारमा पछि योजना बनाएर योजनाअनुसार सहकार्य गर्ने भन्ने छ । तर अझसम्म ठोस सम्झौता र समझदारी भएको छैन,” प्रवक्ता रेग्मीले बाह्रखरीसँग भने, “हामीले अन्तर्राष्ट्रियस्तरको क्रिकेटको एउटा र फुटबलको अन्तर्राष्ट्रियस्तरको एउटा गरी दुई रंगशाला निर्माणका लागि प्रस्ताव पठाएका थियौं । त्यो प्रस्ताव कहाँनेर ‘ग्याप’ भयो थाहा भएन, तर यहाँबाट गइसकेको थियोे । परराष्ट्रबाट पनि हामीलाई केही जानकारी आएको छैन ।”
नेपालमा क्रिकेट र फुटबलका अन्तर्राष्ट्रियस्तरका एक÷एक वटा स्टेडियम बनाउने चाहना कतारकै थियो । कतारले नेपालीले लगाएको गुन तिर्न खोजेको थियो ।
सन् २०२२ मा कतारमा जुन स्टेडियमहरुमा फिफा विश्वकप आयोजना भएका थिए, ती निर्माण गर्न नेपालीले रगत पसिना बगाएका थिए । कतारमा फुटबल स्टेडियम निर्माण गर्ने क्रममा कयौं नेपाली कामदारको मृत्यु भएको थियो ।
नेपालीलगायत अन्य आप्रवासी कामदारको स्टेडियम बनाउने क्रममा मृत्यु भएको विषयलाई अन्तर्राष्ट्रिय समुदाय र मिडियाले निकै चासोका साथ उठाएका थिए । अन्तर्राष्ट्रिय समुदाय र मिडियाले दिएको दबाबकै कारण कतारले श्रम कानुन संशोधन गरी लचकता अपनाएको थियो ।
“जुन गुन नेपाली कामदारले कतारमा स्टेडियम बनाउन लगाएका थिए र उनीहरुकै कारण कतारले सफलतापूर्वक सन् २०२२ मा फिफा विश्वकप आयोजना गरेको थियो । त्यसको गुन नेपालमा दुई वटा स्टेडियम बनाई तिर्न चाहन्थ्यो, तर त्यो तत्काल पुरा हुने देखिएन,” परराष्ट्र मन्त्रालय उच्च स्रोतले बाह्रखरीसँग भन्यो ।
कतारका अमरिको नेपाल भ्रमणको मिति तय भएपछि कतारी राजदूतले नै फुटबल र क्रिकेटका लागि स्टेडियम बनाउने कुरा अगाडि बढाएका थिए । नेपाल र कतारबीचको सम्बन्ध झल्किने गरी ‘सिम्बोलिक’ रुपमा दुई स्टेडियम बनाउने प्रस्ताव उनले नेपालसँग मागेका थिए ।
“बुधबार होटल सोल्टीमा भएको नेपाल–कतार प्रतिनिधिमण्डलस्तरीय बैठकमा हामीले फुटबल र क्रिकेट स्टेडियमका कुरा राम्रोसँग उठाउनै सकेनौं । हामी त्यसै अलमलियौं । हामीले राम्रोसँग स्टेडियम बनाउने कुरा उठाएको भए कतारले सहजै बनाइदिन्थ्यो । बैठकमा बस्ने नेपाली अधिकारीहरुले यसको महत्व नै बुझेनन्,” बैठकमा सहभागी परराष्ट्र मन्त्रालय स्रोतले भन्यो ।
नेपाल–कतार प्रतिनिधिमण्डलस्तरीय बैठकमा नेपालको नेतृत्व प्रधानमन्त्री पुष्पकमल दाहाल ‘प्रचण्ड’ले गरेका थिए भने कतारको नेतृत्व कतारका अमिर थानीले गरेका थिए ।
“कतारले कति दर्शक क्षमताको, के कस्ता सुविधा भएको स्टेडियम चाहिने हो त्यसको विस्तृत रिपोर्ट नै चाहेको थियो । हामीले दिन पनि सकेनौं र बुझाउन पनि सकेनौं । अझ भनौं विषय उठाउनै सकेनौं,” बैठकमा सहभागी स्रोतले भन्यो ।
