काठमाडौं । गुल्मीका ४१ वर्षीय कोरोना संक्रमितको स्वास्थ्य अवस्था चिन्ताजनक छ । उनको उपचार भइरहेको अस्पतालले आज एक विज्ञप्ति जारी गर्दै जनाएकाे छ । तर उनको स्वास्थ्य अवस्था भने जटिल रहेको अस्पतालले जनाएको हो ।
सामाजिक सञ्जालमा अस्पतालमा उपचार गराइरहेका ती व्यक्तिको मृत्यु भएको खबर गलत रहेको भन्दै विज्ञप्तिमार्फत खण्डन गरेको हो । कोरोना संक्रमित ती व्यक्तिको मृत्यु भएको भन्दै केही सञ्चारमाध्यम तथा सामाजिक सञ्जालमा समाचार सम्प्रेषण भएका थिए । अस्पतालले यो समाचार गलत, भ्रामक र अतिरञ्जित भएको पनि विज्ञप्तिमार्फत जनाएको छ ।
अस्पतालमा उपचार गराइरहेका ती पुरुषको मृत्युको गलत समाचारले अनावश्यक त्रासको वातावरण सृजना भएको हुँदा गलत समाचारको पछि नलाग्न सबैलाई अस्पतालले अपिलसमेत गरेको छ । ती व्यक्तिको अहिले क्रिमसन अस्पतालको आईसीयू कक्षको भेन्टिलेटरमा उपचार भइरहेको अस्पतालले जनाएको छ ।
स्वास्थ्य तथा जनसंख्या मन्त्रालयले सोमबार ती व्यक्तिमा कोरोना संक्रमण भएको पुष्टि गरेको थियो । ती व्यक्तिलाई ज्वरो देखिएपछि गत जेठ १ गते रूपन्देहीको क्रिमसन अस्पतालको भेन्टिलेटरमा राखिएको थियो । अस्पतालकी नर्सिङ प्रमुख अम्बिका ज्ञवालीका अनुसार ती व्यक्तिको स्वाब संकलन गरेर जेठ २ गते भैरहवा अस्पतालको प्रयोगशालामा पठाएको थियो । उनको रिपोर्ट जेठ ५ गते कोरोना पोजेटिभ देखिएको थियो ।