एजेन्सी । कोरोना भाइरसको महामारीका कारण अहिले विश्व क्रिकेटको ठूलो लिगमध्यको एक इन्डियन प्रिमियर लिग (आईपीएल) स्थगित भएको छ । आईपीएलको नयाँ मिति सार्वजनिक भएको छैन ।
विश्व क्रिकेटका ठूला हस्तीहरू सहभागी हुने क्रिकेट प्रतियोगिता नहुँदा त्यसको असर आयोजकलाई त पर्छ नै त्योभन्दा धेरै असर खेलाडीमा पर्छ । अझ भनौं भर्खरै क्रिकेट करियर सुरुआत गर्न लागेका खेलाडीमा धेरै असर पर्छ ।
आईपीएलको टिम राजस्थान रोयल्सका पूर्व प्रशिक्षक पाडी उप्टनले कोरोना भाइरसका कारण यदि यो सिजनमा आईपीएल नभएमा खेलाडीमा मानसिक तथा आर्थिक असर पर्न सक्ने बताएका छन् ।
“आईपीएल स्थगित भएमा ती खेलाडीलाई धरै असर पर्नेछ जसले भर्खरै मात्र क्रिकेट करियर सुरुआत गर्दै आईपीएल खेल्न लागेका थिए,” उप्टनले भने ।
भारतमा अहिले कोरोनाले ठूलो रूप लिएका कारण आईपीएल नै हुन सक्ने सम्भावना भने छैन । त्यस कारण आयोजकले आईपीएलको नयाँ मिति तय गर्ने योजना बनाएको छ ।
“स्वाभाविक रूपमा आईपीएल क्रिकेट वर्षको एक ठूलो प्रतियोगिता हो । यो प्रतियोगितामा क्रिकेट खेलाडीले आफ्नो करियरको विकास मात्र होइन आर्थिक रूपमा सम्पन्न हुने मौका पनि पाउँछन् । आईपीएल नै नहुँदा खेलाडीमा आर्थिक मानसिक असर पर्न जान्छ,” उप्टनले भने ।
