कास्की । प्याराग्लाइडिङ वर्ल्ड कप एसियन टुर तथा नेपाल ओपन प्याराग्लाइडिङ च्याम्पियनसिपको १९ औं संस्करण आगामी फागुन ११ देखि १७ गतेसम्म पोखरामा हुने भएको छ ।
नेपाल हवाई खेलकुद संस्थाको आयोजनामा नेपाल प्याराग्लाइडिङ तथा ह्यान्डग्लाइडिङ सङ्घ र नेपाल प्याराग्लाइडिङ पाइलट्स क्लबको सहयोगमा प्रतियोगितामा हुनेछ ।
नेपालसहित, चीन, जापान, भारत, कोरिया, अमेरिका, बेलायत, स्विटजरल्यान्ड, फ्रान्स, जर्मनी, अस्ट्रेलिया, रसिया, इरान, भियतनाम, चाइनिज ताइपेइ, इन्डोनेसियालगायतका ३० देशका १२५ चालक सहभागी बन्ने जानकारी आयोजकले दिएको छ ।
खेलाडी दर्ता गर्ने अन्तिम मितिसम्म ३० देशका १२५ पाइलट सहभागी हुने निश्चित भएको र आवश्यक तयारीलाई तीव्र बनाइएको प्रतियोगिता संयोजक एवं नेपाल हवाई खेलकुद संस्थाका निर्वतमान अध्यक्ष योगेश भट्टराईले बताए ।
प्रतियोगितामा नेपालका १२ खेलाडी सहभागी हुँदैछन् । एसियन टुरबाट छनोट भएका खेलाडी ‘पोइन्ट’ र ‘र्याङकिङ’का आधारमा सन् २०२१ मा हुने प्याराग्लाइडिङ वर्ल्ड कपको सुपर फाइनलमा प्रवेश पाउने छन् ।
एफएआई (फेडेरेसन एरोनोटिक इन्टरनेसनल) बाट लाइसेन्स प्राप्त गरेको र वल्ड पाइलट र्याङकिङमा आबद्ध पाइलटले मात्र प्रतियोगितामा स्पर्धा गर्ने प्रतियोगिता व्यवस्थापक विमल अधिकारीले जानकारी दिए ।
‘एक्युरेसी’ र ‘क्रसकन्ट्री’ विधाको प्रतिस्पर्धामा समग्रमा विजेता बन्न सफल पहिलोदेखि दशौँ स्थानसम्मका खेलाडीलाई मेडल, प्रमाण र ट्रफी प्रदान गरिने बताइएको छ ।
त्यसैगरी महिला च्याम्पियसनसिप, टिम च्याम्पियनसिप र नेपाली च्याम्पियनमा पहिलोदेखि पाँचौं स्थानसम्मका विजेतालाई समेत ट्रफी, मेडल र प्रमाणपत्र प्रदान गरिने जनाएको छ ।
प्रतियोगिता पोखरा र सिङ्गो राष्ट्रको इज्जतसँग जोडिएकाले यसलाई सफल बनाउन सबै क्षेत्रबाट सहयोग रहनुपर्नेमा जोड दिइएको छ । प्रतियोगिताको सुरक्षा व्यवस्थापनको जिम्मा नेपाली सेनाले लिएको छ ।
मनोरञ्जनात्मक एवं साहसिक हवाई खेलकुदको माध्यमबाट पर्यटन क्षेत्रको विकास गर्ने र नेपाल भ्रमण वर्ष २०२० लाई सफल बनाउन प्रतियोगिताले मद्दत पुग्ने विश्वास लिइएको छ । रासस