काठमाडौं । जारी सहिद स्मारक ‘ए’ डिभिजन लिग फुटबलमा भोलि (सोमबार) बाट नवौं चरणका खेल सुरु हुँदै छन् । 

शीर्ष स्थानमा लागि संर्घषरत विभागीय क्लब नेपाल पुलिस र एपीएफबीच खेलसँगै नवौं चरणका खेल सुरु हुनेछन् । पुलिस र एपीएफबीचको खेल मध्याह्न १२ बजे सुरु हुनेछ । ३ विभागीय क्लबमध्ये यी दुई शीर्ष स्थानका लागि संर्घषरत छन् भने अर्को विभागीय क्लब त्रिभुवन आर्मी उपाधि होडलाई बलियो बनाउने रणनीतिमा लागेको छ । 

जारी लिगमा पुलिसले केही सम्हालिएको प्रदर्शन गरेको छ भने एपीएफको अवस्था कमजोर छ । अहिलेसम्मका ८ मध्ये ३ खेलमा जित २ बराबरी र ३ खेलमा हार व्यहोरेको पुलिस ११ अंकसहित आठौं स्थानमा छ । एपीएफ लिगको पुछारबाट दोस्रो स्थानमा छ । 

रेलिगेसन जोननजिक रहेको एपीएफ ८ खेलमध्ये १ खेलमा बिजय भएको छ भने २ मा बराबरी र ५ खेलमा पराजित छ । आठौं चरणसम्मको खेल सम्पन्न हुँदा उपाधि होड भने रोमाञ्चक हुने देखिन्छ । त्रिभुवन आर्मी र मच्छिन्द्र क्लबबीच शीर्षस्थानका लागि प्रतिस्पर्धा छ । गत लिगको च्याम्पियन मनाङ मर्स्याङ्दी भने शीर्ष स्थानका लागि संघर्ष गरिरहेको छ । 

आर्मी अहिले १७ अंक साथ अंक तालिकाको शीर्ष स्थानमा छ । लिगमा ५ खेल बाँकी रहँदा उपाधि होड कायमै राख्ने लक्ष्यमा रहेको आर्मीले यसअघिका खेलमा भने ५ मा जित २ मा बराबरी र १ खेलमा पराजय भोगेको छ । 

दोस्रो स्थानमा रहेको मच्छिन्द्रको समान नतिजासहित १६ अंक छ । मच्छिन्द्रको १ अंक गत वर्ष पुछारबाट दोस्रो स्थानमा रहेका कारण घटाइएको हो । मनाङ १६ अंकसहित तेस्रो स्थानमा छ । अहिलेसम्म अपराजित यात्रालाई कायम राखेको मनाङले ४ खेलमा जित र ४ मा बराबरी खेलेको छ । 

१४ अंकसहित थ्री स्टार चौथो स्थानमा छ । थ्री स्टारले ४ खेलमा जित र २ मा हार व्यहोरेको छ । गत लिगमा पुछारमा रहेको न्यूरोड टिम एनआरटीले भने जारी लिगमा सुधारात्मक प्रदर्शनलाई जारी राखेको छ । 
४ खेलमा जित २ मा बराबरी र २ मा पराजित भएको एनआरटी १२ अंकसहित पाँचौं स्थानमा छ । एनआरटीको २ अंक गत लिगमा पुछारमा रहेका कारण घटाइएको छ । 

१२ अंक रहेको जावलाखेल युथ क्लब छैटौं स्थानमा छ । समान अंक रहेको सकंटा सातौं स्थानमा रहँदा पुलिस आठौं, च्यासल युथ क्लब नवौं, ब्रिगेड ब्वाइज क्लब (बीबीसी) दशौं, फ्रेन्डस क्लब ११औं, हिमालयन शेर्पा १२औं तथा एपीएफ १३औं र सरस्वती पुछारमा छ ।