काठमाडौं । श्रीलंकामाथि रोमाञ्चक नतिजा निकाल्दै बंगलादेशको महिला क्रिकेट टोलीले १३ औं दक्षिण एसियाली खेलकुद (साग) मा स्वर्णपदक जितेको छ ।
आज भएको फाइनलमा श्रीलंकामाथि २ रनको जित निकाल्दै बंगलादेश महिला क्रिकेट टोलीले स्वर्णपदक जितेको हो ।
९२ रनको सामान्य लक्ष्यसहित जवाफी ब्याटिङ थालेको श्रीलंका निर्धारित २० ओभरमा ९ विकेटको क्षतिमा ८९ रनमा समेटिएपछि बंगलादेश स्वर्ण जित्न सफल भयो ।
पोखरा रंगशालामा बंगलादेशका लागि निगर सुल्टानले सर्वाधिक २९ रन बनाएकी थिइन् । सन्जीडा स्लाम र फहिमा खातुनले समान १५–१५ रन बनाउँदा मुर्सिद खातुनले १४ रन बनाएकी थिइन् ।
श्रीलंकाकी उमेशाले सर्वाधिक ४ विकेट लिएकी थिइन् । ९१ रनको लक्ष्य पच्छाएको श्रीलंकाका लागि कप्तान हरसिथा मन्दबीले सर्वाधिक ३२ रन बनाए पनि हार टार्न सकिनन् । लिहिनी अप्सराले २५ रनको योगदान दिदाँ निलक्सानले १० रन जोडेकी थिइन् । बंगलादेशकी नहिदा अक्तरले २ विकेट लिएकी थिइन् ।
पहिलो पटक सागमा समाबेश क्रिकेटमा महिलातर्फ बंगलादेशले स्वर्ण श्रीलंकाले रजत तथा आयोजक नेपाल भने कास्यपदकमा सिमित भएको छ ।
