बीबीसी । रिलायन्स इण्डस्ट्रिजका अध्यक्ष मुकेश अम्बानीले साउदी अरबको चर्चित तेल कम्पनी अरामकोले आरआईएल आयल टु केमिकल कारोबारको २० प्रतिशत शेयर खरिद गर्न लागेको बताएका छन् । रिलायन्सको ४२ औं वार्षिक साधारणसभामा अध्यक्ष अम्बानीले अरामकोलाई आरआईएल आयल टु केमिकल करोबारको २० प्रतिशत शेयर बिक्री गर्न लागेको घोषणा गरेका हुन् । जसका मूल्य ७५ अबै डलर हुन्छ ।
अम्बानीले भने, “मलाई यो घोषणा गर्दा अत्यन्तै खुशी भएको छ कि रिलायन्सको इतिहासमा सबैभन्दा धेरै विदेशी लगानीका लागि सहमति जुटेको छ । रिलायन्स र साउदीको अरामका बीचमा लामो समयका लागि साझेदारीमा सहमति भएको छ ।” आरआईएल आयल टु केमिकल कारोबारको राजश्व पाँच लाख करोड रुपैयाँभन्दा बढी छ । रिलायन्स इण्डस्ट्रिजको जामनगरमा विश्वकै ठूलो रिफाइनिङ कम्पलेक्स छ । जसको उत्पादन क्षमता प्रति दिन १४ लाख ब्यारल छ ।
अम्बानीले कम्पनीका शेयर सदस्यहरुलाई सम्बोधन गर्दै अरामकोले हरेक दिन पाँच लाख ब्यारल तेल रिलायन्सको जामनगर रिफाइनरीमा पठाउने बताए । यो भारतमा विदेशी लगानीको सबैभन्दा ठूलो ‘डिल’ भएको बताइएको छ ।
साउदी अरबको विशाल तेल कम्पनी अरामकोको आम्दानी लामो समयदेखि रहस्यमयी छ । साउदी सरकारले सधै यसको आम्दानीका बारेमा तथ्यहरु लुकाएर राख्दै आएको थियो । तर, यस वर्षको अप्रिलमा आरामकोले लुकाइदै आइएको रहस्य सार्वजनिक गर्दै गएको वर्ष १११.१ अर्ब डलर मुनाफा भएको बताएको थियो ।