काठमाडौं । वेस्ट इन्डिज ‘ए’ सँगको ट्वान्टी–२० शृंखलाका लागि नेपाली राष्ट्रिय क्रिकेट टिममा चार खेलाडी थपिएका छन् । शृंखलाको पूर्वसन्ध्यामा आयोजित पत्रकार सम्मेलनमा नेपाल क्रिकेट संघ (क्यान)का सचिव पारस खड्काले टिममा चार खेलाडी थप गरिएको बताएका हुन् ।
सचिव खड्काले नेपाली टिमका विनोद भण्डारी, कमलसिंह ऐरी, लोकेश बम र सागर ढकाललाई टिममा समावेश गरिएको बताए । यसअघि नेपाली टिमका मुख्य प्रशिक्षक मोन्टी देसाइले १६ सदस्यीय राष्ट्रिय टोलीको घोषणा गरेका थिए । पहिलोपटक नेपाल भ्रमणमा आएको वेस्ट इन्डिज रोस्टन चेजको कप्तानीमा मैदान उत्रिनेछ । चेजले वेस्ट इन्डिजको सिनियर टिमबाट ४९ टेस्ट, ४५ एकदिवसीय र ११ ट्वान्टी–२० अन्तर्राष्ट्रिय क्रिकेट खेलेका छन् ।
वेस्ट इन्डिज ‘ए’को उपकप्तानमा चार टेस्ट र १० एकदिवसीय अन्तर्राष्ट्रिय क्रिकेट खेलेका २५ वर्षीय एलिक एथानाजे छन् । वेस्ट इन्डिज ‘ए’ र घरेलु टिमबीचको सबै खेल कीर्तिपुरस्थित त्रिवि क्रिकेट मैदानमा हुनेछ । यी दुई टिमबीचको पहिलो खेल शनिबार हुनेछ । दोस्रो खेल आइतबार, तेस्रो खेल बुधबार, चौथो खेल बिहीबार र पाँचौँ खेल अर्को शनिबार हुनेछ । यसै वर्ष अमेरिका र वेस्ट इन्डिजमा आयोजना हुने ट्वान्टी–२० विश्वकपअघि दुवै टिमले तयारीस्वरूप यो शृंखला खेल्न लागेका हुन् ।
