काठमाडौं । साविक विजेता ब्रिगेड ब्वाइज क्लब ललित स्मृति यू-१८ फुटबल प्रतियोगिताको फाइनलमा प्रवेश गरेको छ । एन्फा कम्प्लेक्समा भएको खेलमा सिग्नेचर मनाङ मर्स्याङ्दी क्लबलाई ७-१ गोलको फराकिलो अन्तरले पराजित गर्दै ब्रिगेडले फाइनलमा स्थान बनाएको हो ।
ब्रिगेडलाई जित दिलाउन रेजिन सुब्बाले ह्याट्रिक गरे । ब्रिगेडका शिशिर लेखीले दुई गोल गर्दा जय गुरुङ र ब्रिजेश चौधरीले समान एक-एक गोल गरे । उता मनाङका लागि सचिन गुरुङले एक सान्तोना गोल फर्काए ।
ब्रिगेडका रेजिनले खेलको ३० औँ मिनेटमा पहिलो गोल गरेका थिए भने ७१ औँ मिनेटमा दोस्रो गोल गर्दा उनले ८८ औँ मिनेटमा गर्दै ह्याट्रिक पूरा गरे । ब्रिगेडका लागि शिशिरले खेलको १५ औँ मिनेटमा पहिलो गोल गरेका थिए । शिशिरले खेलको ५४ औँ मिनेटमा व्यक्तिगत दोस्रो गोल गरे ।
ब्रिगेडका जयले ६३ औँ मिनेटमा गोल गर्दा ब्रिजेशले ८३ औँ मिनेटमा गोल गरे । मनाङका लागि सचिन गुरुङले सान्त्वना गोल फर्काएका थिए ।