काठमाडौं । पाचौं महिला साफ च्याम्पीयनसिपलाई केन्द्रित गरी हिरो वुमेन्स गोल्डकपमा सहभागि नेपाली राष्ट्रिय फुटबल टोली आज आयोजक भारतबिरुद्ध खेल्दैछ । पहिलो खेलमा म्यानमारसँग पराजय भोगेको नेपाल भारतबिरुद्धको खेलमा विशेष रणनीतिसहित मैदान उत्रिन लागेको हो । साफअघि एकअर्काको कमजोरी पत्ता लगाउने र टोलीको कमजोर पक्ष सुधार गर्ने दुबै टोलीको रणनीति छ । नेपाल घरेलु मैदानमा आयोजना हुने साफ च्याम्पीयनसिपमा पहिलो पटक उपाधी उचाल्ने लक्ष्यमा छ ।
यसअघिका तीन संस्करणमा भारतलाई उपाधी सुम्पिएको नेपाल यो पटक विशेष रणनीतिमा छ । प्रशिक्षक हरी खड्काले भारतबिरुद्धको आज खेल महत्वपूर्ण रहेको र टोलीले थप रणनीति तयार पार्ने बताए । उनले भने, “आज शतप्रतिशत जितको खोजीमा छौं । भारतको प्रदर्शनमा केन्द्रित गरी हामीले थप रणनीति बनाउनु छ । किनकी केही दिनमा हामीले भारतसँग खेल्नेछौं । ओलम्पिक छनोटपछि भारत आत्तिएको छ । हामीले त्यहिअनुसार आफूलाई प्रमाणित गर्नुपर्नेछ ।”
पछिल्लो समय नेपाल र भारतबीच कात्तिकमा म्यानमारमा ओलम्पिक छनोटमा प्रतिस्पर्धा भएको थियो । जहाँ नेपालले भारतलाई १–१ को बराबरीमा रोकेको थियो । भारतको उडिसास्थित कालिंगा रंगशालामा खेल नेपाली समयअनुसार बेलुका ७ः१५ बजे सुरु हुनेछ । नेपालले भारतपछि अन्तिम खेल फागुन १ गते इरानसँग खेल्नेछ ।
साफ च्याम्पीयनसिप र ओलम्पिक छनोटलाई केन्द्रित गर्दै भारतले आयोजना गरेको चार राष्ट्र सम्मलित हिरो वुमेन्स गोल्डकपमा आयोजक भारतसहित नेपाल, म्यानमार र इरान सहभागी छन् । साताबाटोस्थित एन्फा कम्लेक्सको कृतिम मैदानमा डेढ महिना र झापामा एक साताको घासे मैदानको प्रशिक्षणपछि टोली गत मंगलबार भारत गएको हो । पाचौं महिला साफ च्याम्पीयनसिप आगामी फागुन २८ गतेबाट बिराटनगरको सहिद रंगशालामा सुरु हुँदैछ ।
