काठमाडौं । धनगढी प्रिमियर लिग ट्वान्टी–२० क्रिकेट प्रतियोगिताको तेस्रो संस्करण माघ तेस्रो साताबाट हुने भएको छ । प्रतियोगिताको मुख्य प्रायोजक विजय डिष्टिलरीको रुस्लान क्रिकेटले यसवर्ष निरन्तरता पाएको छ । गतवर्षबाट प्रतियोगिताको मुख्य प्रायोजन गरेको रुस्लान क्रिकेट र आयोजक धनगढी क्रिकेट एकेडेमीबीच शुक्रबार १ करोड १० लाख रुपैयाँ बराबरको प्रायोजन सम्झौता भएको हो ।
सम्झौतापत्रमा विजय डिष्टिलरीका तर्फबाट चिफ फाइनान्सियल अफिसर सतिस कर्ण र धनगढी क्रिकेट एकेडेमीका तर्फबाट सुवासबहादुर शाहीले हस्ताक्षर गरेका छन् ।
यससँगै प्रतियोगिताको तेस्रो संस्करण पनि रुस्लान धनगढी प्रिमियर लिगका नाममा संचालन हुनेछ । प्रायोजन रकममध्ये आयोजकले ८० प्रतिशत रकम नगद पाउने एकेडेमीका अध्यक्ष शाहीले बताए । रुस्लान क्रिकेटले खेलकुदमा गरेको यो सबैभन्दै ठुलो प्रायोजन रकम हो ।
“हामी गतवर्षबाट मुख्य प्रायोजकका रुपमा यस प्रतियोगितासँग जोडिएका थियौं,” विजय डिस्टिलरीका चिफ फाइनानस अफिसर कर्णले भने, “हामीले अन्य कार्यक्रममा पनि प्रायोजन गर्दै आएका छौं । तर खेलकुदमा हाम्रो यो सबैभन्दा ठुलो प्रयोजन हो ।”
धनगढीस्थित संघिय इकाई प्रहरी कार्यालयको क्रिकेट मैदानमा हुँदै आएको प्रतियोगिता यसबर्षबाट प्रस्तावित फाप्ला अन्तर्राष्ट्रिय क्रिकेट मैदानमा हुने आयोजकले जनाए । फागुन ४ गतेसम्म चल्ने प्रतियोगितामा ६ फ्रेन्चाइज क्लबले प्रतिस्पर्धा गर्नेछन् । सहभागी प्रत्येक टोलीले १५ खेलाडी राख्नुपर्नेछ । प्रत्येक टोलीको १५ खेलाडीमध्ये २ विदेशी खेलाडी र ट्यालेन्ट हन्टबाट आउने सुदुरपश्चिमका एक स्थानीय खेलाडी राख्नैपर्ने प्रावधानलाई यसवर्ष पनि निरन्तरता दिइएको धनगढी क्रिकेट एकेडेमीका अध्यक्ष शाहीले बताए । अध्यक्ष शाहीले प्रतियोगितामा पुरुस्कार रकम वृद्धि नगर्ने संकेत गरेका छन् ।
“यो प्रतियोगिताले एक खालको उचाई लिइसकेको छ,” अध्यक्ष शाहीले थपे, “हामीले पुरस्कार रकम बढाउनुभन्दा खेलाडीको सुविधा तथा प्रतियोगिताको गुणस्तर बढाउनेतर्फ ध्यान दिनेछौं । क्रिकेटमा प्रभाव छोड्न सकिने हिसाबले काम गरिरहेका छौं । हामी क्रिकेटको माध्यमबाट सबैलाई एकसुत्रमा जोड्न चाहन्छौं । सहयोग गरिदिनु भएकोमा प्रायोजकलाई धन्यवाद दिन चाहन्छु ।”
ट्वान्टी–२० स्वरुपमा हुने प्रतियोगिताको लिग चरणमा प्रत्येक टोलीले एक अर्काविरुद्ध १–१ खेल खेल्नेछ । लिग चरणको शीर्ष चार टोलीले प्लेअफ खेल्नेछन् । पहिलो र दोस्रो टोलीबीचको विजेताले सिधै फाइनलमा स्थान बनाउनेछ । पराजित हुनेले तेस्रो र चौथो स्थानको विजेतासँग फाइनल प्रवेशका लागि प्रतिस्पर्धा गर्नेछ । गत वर्ष विजेताले २५लाख रुपैयाँ नगद पुरस्कार जितेका थिए ।