खेल
एजेन्सी । ओलम्पिक खेलको आयोजनाले पर्यटनलगायत क्षेत्रमा योगदान गरेर आर्थिक विकास गर्न सहयोग गर्ने भएकाले विश्वका धेरै मुलुकहरू आयोजकमा छानिन तँछाडमछाड नै गर्छन् । तर, आधा ब्राजिलियन भने आफ्नो आँगनैमा सुरु हुन गइरहेको ओलम्पिकको विपक्षमा देखिएका छन् ।
करिब ५० प्रतिशत ब्राजिलियन ओलम्पिकको विपक्षमा रहेको ब्राजिलियन सर्भे संस्था डाटाफोल्हाले जनाएको छ । यसलाई देशको मन्दीबाट प्रभावित भएका मानिसको प्रतिक्रियाको रूपमा पनि लिइएको छ । मन्दीले आगामी अगस्ट ५ मा सुरु हुन गइरहेको गृष्मकालीन ओलम्पिकलाई ओझेलमा पार्ने देखिएको छ । रियो ओलम्पिक सुरु हुन दुई सातामात्रै बाँकी हुँदा १७ लाख टिकट बिक्री हुन बाँकी नै छ । ब्राजिलियन पर्यटन अधिकारीले भने स्थानीयले टिकट खरिदका लागि अन्तिम समय कुरेर बसेकाले टिकट बिक्री हुने अपेक्षा गरेका छन् ।
मन्दी र राजनीतिक संकटले खेलको तयारीका लागि रियोको क्षमतामाथि नै शंका उत्पन्न गराएको छ । ओलम्पिक सुरक्षाका लागि सेना र प्रहरी गरी ८० हजारको व्यवस्था गरिएको छ । यो संख्या लन्डन ओलम्पिकको तुलनामा बढी हो । रियो राज्यले खेलका लागि आवश्यक पर्ने सुरक्षा व्यवस्थाका लागि हालैमात्र संघीय सहयोग पाएको छ । यस्तो अव्यवस्थाका बीच झन्डै आधा ब्राजिलियन गृष्मकालीन ओलम्पिकप्रति सकारात्मक छैनन् ।
अहिले ब्राजिल १९३० को दशकयताकै लामो मन्दीमा फसेको छ । मुद्रास्फीति उच्च छ भने उपभोक्ता मनोबल ओरालो लागेको छ । अर्थतन्त्रको इन्जिन मानिँदै आएको तेलजस्ता वस्तुको मूल्यमा आएको भारी गिरावटका कारण मन्दीमा थप बल पुगेको छ । ब्राजिल सरकारको स्वामित्वमा रहेको तेल कम्पनी पेट्रोवासमा भएको भ्रष्टाचारले पनि मन्दीलाई सहयोग पु¥याएको छ । पेट्रोवास भ्रष्टाचारका कारण तीन जना मन्त्रीले राजीनामा दिएका छन् ।
ब्राजिलियन कंग्रेसले राष्ट्रपति डिल्मा रोसेफविरुद्ध महाअभियोगको प्रक्रिया सुरु गरेपछि मे महिनामा राजनीतिक संकट उचाइमा पुगेको थियो । उनलाई ६ महिनाका लागि निलम्वन गरिएको छ । उनको ठाउँमा राष्ट्रपति मिचेल टेमर आएका छन् ।
प्रकाशित मिति: बिहीबार, साउन ६, २०७३ ११:५८
प्रतिक्रिया दिनुहोस्