काठमाडौं । नेपाली कथानक चलचित्र ‘किङ’ले नयाँ रिलिज डेट लिएको छ । यसअघि दसैंको छेको पारेर रिलिज गर्ने तयारी भएको ‘किङ’ले आफ्नो प्रदर्शन मिति पर सारेको थियो । प्राविधिक कारणवश प्रदर्शन मिति पछि सार्नु परेको ‘किङ’ युनिटले दाबी गरे पनि स्रोतका अनुसार ‘किस्मत–२’ को निर्माण पक्षसँगको सहमतिमा प्रदर्शन रोकिएको थियो । 

‘किङ’ अब माघे संक्रान्तिको छेको पारेर पुस २९ गते रिलिज हुनेछ । ‘किङ’ ले लिएको रिलिज डेटमै अर्को नेपाली सिनेमा ‘कारखाना’ पनि प्रदर्शन हुँदैछ । 

सबिर श्रेष्ठले निर्देशन गरेको लब एक्शन जनराको चलचित्र ‘किङ’मा एक्शन नायक निखिल उप्रेतीसँगै वेनिशा हमाल, अनुपबिक्रम शाही, रुपा राना, जगन श्रेष्ठ मुख्य रोलमा छन् ।  सञ्जय लामाले खिचेको सिनेमा ‘किङ’ काठमाडौंसँगै लुम्बिनी, नगरकोट लगायतका ठाउँमा छायांकन गरिएको छ ।