काठमाडौं । नेपाली कथानक चलचित्र ‘लुट–२’ को ट्रेलर सार्वजनिक हुन अझै करिब डेढ महिना लाग्ने निर्माण पक्षले बताएको छ । यसअघि दसैं र तिहारको बीचमा ट्रेलर सार्वजनिक गर्ने बताइएको थियो । 

“अझै करिब डेढ महिना लाग्छ होला,” ‘लुट–२’ का निर्देशक निश्चल बस्नेतले भने,“भर्खरै मात्रै गीत सार्वजनिक गरेका छौं । त्यसैले केही ढिलो नै हुन्छ ।”  

‘लुट–२’ को आइटम गीत २१ अक्टोबरमा सार्वजनिक गरेको थियो । २१ अक्टोबरमा सार्वजनिक गरिएको गीत २७ अक्टोबरको मध्यान्हसम्म ५ लाख १८ हजार पटक युट्युवमा खोजिएको देखिन्छ ।  

‘ठमेल बजार’ बोलको आइटम मादक गीतमा निश्चल आफैंले पनि नृत्य गरेका छन् । एलिसा राई सुन्दरीको रुपमा देखिएको भिडियोमा निश्चलसँगै दयाहाङ राई, विपिन कार्कीलगायकताका कलाकारको अभिनय छ । 

कालिप्रसाद बास्कोटाको संगीत रहेको गीतमा महिला स्वर मीना निरौलाको छ । शब्द भने कालिप्रसाद बास्कोटा र एकतारेको संयुक्त छ । मादक नृत्यको कोरियोग्राफी भने विक्रम स्वाँरले गरेका छन् ।  

निश्चल बस्नेतले निर्देशन गरेको चलचित्र ‘लुट–२’ मा  सौगात मल्ल, दयाहाङ राई, कर्मा शाक्य, विपिन कार्की, ऋचा शर्मा, प्रवीण खतिवडा, सुशीलराज पाण्डेलगायतले अभिनय गरेका छन् । ‘लुट–२’ ले फागुन १३ गतेका लागि रिलिज डेट लिएको छ । निश्चलले ‘लुट’को सफलतापछि त्यसको सिक्वेल निर्माण गरेका हुन् ।