काठमाडौं । बलिउड नायक सलमान खानका बडीगार्ड सेरालाई प्रहरीले पक्राउ गर्न खोजी गरिरहेको खबर हिन्दुस्तान टाइम्सको अनलाइन संस्करणले प्रकाशित गरेको छ ।  

मुम्बइको डीएन नगर प्रहरीका अनुसार सेराले एक व्यक्तिलाइ घाइते बनाएको आरोपमा उनलाई पक्राउ गर्न प्रहरीले खोजिरहेको छ । गएको राती करिब २ बजे मुम्बईको अन्धेरी वेस्टमा यो घटना भएको प्रहरीले जनाएको छ । 

खानका अंगरक्षक सेरा तथा घाइते व्यक्तिको बीचमा पहिले फोनबाट भनाभन भएको र सेराले ति व्यक्तिलाई भद्दा गाली गरेर फोन काटिदिएका थिए । तर, ति झगडिया व्यक्ति पनि सेरा भएकै स्थान नजिक भएका हुनाले दुई जनाको भेट भएको र हात हालाहालको स्थिती भएको थियो ।

खानका अंगरक्षकले बन्दुक निकालेर धम्क्याएको तथा बेसबल ब्याटले ति  व्यक्तिलाई हानेको पनि प्रहरीले जनाएको छ । सेराले ब्याटले हानेर ति  व्यक्तिको हड्डी भाँचिदिएको पनि समाचारमा उल्लेख छ । 

खानका अंगरक्षक सेरा भने घटनापछि बेपत्ता भएका छन् । मुम्बई प्रहरी उनको खोजीमा छ । उक्त घटना हुँदा सेरासँग सलमान खान थिए वा थिएनन् भन्ने बारे समाचारमा केही उल्लेख छैन ।