काठमाडौं । सुवास खकुरेल नेपाली क्रिकेटलाई यहाँसम्मको यात्रा पार गराउन महत्वपूर्ण भूमिका खेलेका खेलाडी हुन् । उनी करिब ३ वर्ष राष्ट्रिय टिम बाहिर रहे । अहिले उनले टिममा पुनरागमन गरेका छन् ।

खेलाडी जीवन त्यसै पनि जोखिमपूर्ण नै हुन्छ । त्यही परिवेशमा चोटग्रस्त हुन पुगेका सुवासले कहिल्यै हार मानेनन् । ३ वर्षसम्म राष्ट्रिय टिमबाहिर रहेका सुवास त्यस्ता विकेटकिपर ब्याट्सम्यान हुन्, जसको ठाउँ अरु कसैले लिन सकेको छैन ।

सन् २०१५ नोभेम्बरमा युएईको अबुधाबीमा भएको आईसीसी विश्वकप क्रिकेट लिग च्याम्पियनसिपअन्तर्गत पपुवा न्युगिनीसँगको दुई खेलपछि उनी नेपाली टिम बाहिर रहे । उनले पपुवा न्युगिनीसँगको पहिलो खेलमा ६३ रन बनाएका थिए । तर, दोस्रो खेलमा भने सुवास शून्य रनमा नै आउट भएका थिए ।

त्यसपछि खराब लयमा रहेका सुवास नेपाली टिममा परेनन् भने बाइक दुर्घटनामा उनको हात फ्याक्चर हुन पुग्यो । त्यसपछि उनले करिब ६–७ महिना बल र ब्याट समाएनन् । 
टिममा पुनरागमन गरेका सुवासले भने, “सबैजना साथीभाइ बाहिर गएर खेल्दै थिए, जित्दै थिए । मचाहिँ चोटसँग लडिरहेको थिएँ । गाह्रो भएको थियो त्यो समय ।” 

सुवासले थपे, “लगभग ६–७ महिनापछि ब्याटिङ र फिल्डिङ सुरु गरेको थिएँ । त्यहीबेला स्कटल्यान्डका म्याट मछान भन्ने खेलाडी यही करणले बाहिरिनु भएको थियो । पछि उहाँले सन्यास लिनुभयो म पनि त्यही हुन्छु जस्तो लागेको थियो । तर भगवानको आशिर्वादले गर्दा फिट भएँ र अब पुनरागमन गर्न खोजिरहेको छु ।”

ओपनिङमा सुवासको खाँचो
नेपाली क्रिकेट टिमका मुख्य प्रशिक्षक जगत टमाटाले सुवास टिममा फर्किएसँगै ओपनिङ राम्रो हुने प्रतिक्रिया दिए । टमाटाले भने, “सुवास राम्रो लयमा छन् । सुवासले पनि राम्रो प्रदर्शन गरेर आफूलाई चिनाउने समय हो यो । टिमले पनि उनलाई ठूलो विश्वास गरेको छ । मलाई लाग्छ, उनले राम्रो खेल्नेछन् ।”

त्यसो त सुवासको पुनरागमन भएसँगै नेपाली क्रिकेट टिममा उत्साह पनि जागेको छ । नेपाली क्रिकेट टिमका कप्तान पारस खड्काले भने, “सुवासले जहिले पनि नेपालको जितमा महत्वपूर्ण प्रदर्शन गरेका छन् । चोटमुक्त हुँदै घरेलु प्रतियोगितामा उत्कृष्ट प्रदर्शन गरेका थिए । त्यस्तै हामीलाई विकेटकिपरको पनि खाँचो थियो । त्यसैले सुवासले राम्रो खेल्दै स्थान बनाएका हुन् ।”

सन् २०१५ देखि सुवास नेपाली क्रिकेट टिम बाहिर रहँदा नेपाली टिम सधैं ओपनिङमा चुक्ने गरेको छ । आईसीसी विश्व क्रिकेट लिग च्याम्पियनसिप, आईसीसी विश्व क्रिकेट लिग डिभिजन टु र विश्वकप छनोट जस्ता ठूला प्रतियोगितामा नेपाली क्रिकेट टिमको ओपनिङ एकदम फितलो भयो ।

यो ३ वर्षे अवधिमा नेपाली क्रिकेट टिमले ओपनिङमा धेरै फेरबदल पनि गरेको छ । यसो गर्दा नेपालको खेल कुनै टिमसँग उथलपुथल नै भएको तितो यथार्थ पनि छ । सुवास खकुरेलको अभावमा मिडिल अर्डर ब्याट्सम्यान तथा उपकप्तान ज्ञानेन्द्र मल्ललाई ओपनिङमा पठाउनेदेखि नयाँ ओपनिङ ब्याट्सम्यानलाई स्थान दिनेसम्म प्रयोग भयो । मुख्य प्रशिक्षक टमाटा र कप्तान यो समस्याले हैरान पनि बने ।

सुवास खकुरेल त्यस्ता खेलाडी हुन्, जसले नेपाललाई यो स्थानसम्म आइपुग्न निकै योगदान गरे । सुवासको विकेटकिपिङ मात्रै हैन, ब्याटिङ पनि त्यतिकै सशक्त रहेको छ ।
टि–ट्वान्टी विश्वकपमा अर्धशतक बनाउने पहिलो खेलाडी हुन् सुवास । सन् २०१४ मा बंगलादेशमा सम्पन्न भएको टि–ट्वान्टी विश्वकपमा सुवासले उत्कृष्ट प्रदर्शन गरेका थिए । सुवासले अफगानिस्तानविरुद्ध ५६ रन बनाउँदै अर्धशतक प्रहार गरेका थिए । सुवासले ५३ बलमा ६ चौका र १ छक्का प्रहार गर्दै विश्वकपमा अर्धशतक बनाउने पहिलो खेलाडी बनेका थिए । सुवासकै उत्कृष्ट प्रदर्शनमा नेपालले अफगानिस्तानलाई ९ रनले पराजित गरेको थियो ।

२५ वर्षीय सुवास उमेर समूहदेखि नै नेपाली टिममा आबद्ध छन् । सुवासले आफू अझै नेपाली क्रिकेटको लागि केही गरेर देखाउने बताए । भने, “अझै ५–६ वर्ष नेपालका लागि खेल्न सक्छु । नेपालबाट खेल्दा सधै राम्रो गरिरहेको थिएँ । अझैपनि राम्रो प्रदर्शन गर्ने मसँग विश्वास छ । नेपालको लागि खेल्नु भनेको गर्वको कुरा हो । त्यो सबैले पाउँदैन । त्यसले गर्दा पनि म मोटिभेट हुन्थें, पहिलेको योगदानहरु सम्झिन्थें । त्यसले गर्दा पनि मलाई पुनरागमन गर्न सजिलो भयो ।”

साउन १३ गते इंग्ल्यान्डको लर्डस्मा क्रिकेटकै पुरानो क्लब एमसीसी र नेदरल्यान्ड्ससँग नेपालले त्रिकोणात्मक टि–ट्वान्टी सिरिज खेल्दैछ । त्यस्तै, साउन १६ र १८ गते नेपालले नेदरल्यान्ड्ससँग उसैको भूमिमा ऐतिहासिक २ खेलको एक दिवसीय अन्तर्राष्ट्रिय सिरिज खेल्दैछ । इंग्ल्यान्ड र नेदरल्यान्ड भ्रमणमा सुवास नेपाली टिममा छन् ।

लामो समयपछि राष्ट्रिय टिममा पुनगरामगन गरेका सुवासको लागि चुनौतिको साथै अवसर पनि छ । चुनौतिलाई अवसरमा बदल्दै उत्कृष्ट प्रदर्शन गरेमा सुवासले आगामी दिनमा निरन्तर राष्ट्रिय टिममा स्थान बनाउने छन्, तर आफ्नो क्षमताअनुसार उनले खेल्न नसके फेरी टिम बाहिर बस्नुपर्ने हुन्छ ।