काठमाडौं । नेपाली क्रिकेट टिमका भेट्रान खेलाडी शक्ति गौचनले अन्तर्राष्ट्रिय क्रिकेट करिअरबाट सन्यास लिने घोषणा गरेका छन् । कीर्तिमानधारी शक्तिले सन्यास लिने निर्णय गरेसँगै अब उनीजस्ता खेलाडी नेपालको लागि खड्किने छ ।

इंग्ल्यान्ड र नेदरल्यान्ड्स भ्रमणमा रहेको नेपाली क्रिकेट टिमका भरपर्दा खेलाडी शक्तिले नेपालमा आगामी दिनमा हुने कुनै अन्तर्राष्ट्रिय मैत्रीपूर्ण खेल खेल्दै आफ्नो खेलाडी जीवनबाट विदा हुनेछन् । तर, उनीलाई राष्ट्रिय प्रतियोगितामा भने मैदानमा देख्न पाइनेछ ।

साउन १३ गते इंग्ल्यान्डको लर्डस्मा क्रिकेटकै पुरानो क्लब एमसीसी र नेदरल्यान्ड्ससँग नेपालले त्रिकोणात्मक टि–ट्वान्टी सिरिज खेल्दैछ । त्यस्तै, साउन १६ र १८ गते नेपालले नेदरल्यान्ड्ससँग उसैको भूमिमा ऐतिहासिक २ खेलको एक दिवसीय अन्तर्राष्ट्रिय सिरिज खेल्दैछ । यो दुबै सिरिजमा शक्ति गौचन विशेष रहने छन् । किनभने विदेशी भूमिमा शक्तिको यो अन्तिम खेल हुनेछ ।

बुधबार नेपाली क्रिकेट टिमलाई विदाईको अवसर पारेर शक्तिले अन्तर्राष्ट्रिय क्रिकेट करिअरबाट सन्यासको घोषणा गरेका हुन् । सन्यासको घोषणा गर्दै शक्तिले भने, “मैले दुबई भ्रमणभन्दा अगाडि नै भनिसकेको थिएँ कि मेरो लाष्ट मिसन भनेको ओडिआई नेशन हो । टेष्ट प्लेइङ त भ्याउँदै भ्याउँदैन । ओडिआई मान्यता प्राप्त पाएपछि त्यसको सही समय हेरेर मैले सन्यासको घोषणा गरेको हो ।”

शक्तिले थपे, “सबै खेलाडीले उत्कृष्ट प्रदर्शन गरिरहेका छन् । ओडिआई मान्यता पाएपछि हामीले झनै मेहनत गर्न थालेका छन् । युवा खेलाडीले राम्रो प्रदर्शन गरिरहेका छन् । हाम्रो नेपाली क्रिकेटलाई कसरी माथि पुर्याउने भनेर हरेक कुराको विश्लेषण गरेर नै मैले सन्यास लिने निचोडमा पुगेको हो ।”

कप्तान पारस र प्रशिक्षक टमाटाले शक्तिबारे यसो भने
नेपाली क्रिकेट टिमका मुख्य प्रशिक्षक जगत टमाटाले शक्ति गौचनले नेपाली क्रिकेटको लागि सबै कुरा समर्पण गरेको बताएका छन् ।

प्रशिक्षक टमाटाले भने, “सन् २००१ मा शक्तिले यु–१७ को कप्तानी गरेका थिए । त्यसबेला बंगलादेशमा आईसीसी र एसीसीको कार्यक्रम थियो । नेपाली क्रिकेटमा उनको यात्रा लामो छ ।”

टमाटाले थपे, “नेपाली क्रिकेटलाई शक्तिले धेरै दिएको छ । जुनियर खेलाडीलाई प्रोत्साहन गर्नेदेखि टिमलाई हरेक कुराको सहयोग गर्नेमा दखल शक्तिले राख्ने गर्छन् । उनको बारेमा व्याख्या गर्नु भन्दा पनि आगामी दिनको शुभकामना भन्छु ।”

नेपाली क्रिकेट टिमका कप्तान पारस खड्काले आफू सानो हुँदा कहिले पनि शक्तिसँग क्रिकेट खेल्ने अवसर पाउने नसोचेको बताए । “उहाँसँग खेल्ने मौका पाएँ । म स्कुलमा हुँदा उहाँ यु–१९ र सिनियर टिमका लागि खेल्नु हुन्थ्यो । कहिले पनि सोचेको थिइनँ की शक्ति गौचन जस्तोसँग क्रिकेट खेल्न पाउँछु, डेसिङ रुम शेयर गर्नु पाउँछु भनेर । मलाई विश्वास छ, राज्यले उहाँको योगदानको कदर गर्दै राम्रो पुरस्कारको घोषणा गर्नु हुनेछ । त्यो भन्दा पनि महत्वपूर्ण कुरा हामीले मिस गर्नेछौ ।”

खड्काले थपे, “शक्ति गौचन नेपाली क्रिकेटमा सबैभन्दा बढी मेहनेत गर्ने खेलाडी । मलाई लाग्दैन, उहाँको उमेरसम्म मैले क्रिकेट खेल्न सक्छु होला । किनकी उहाँको खेलप्रति जुन लगाव छ । उहाँले भैरहवामा पनि एउटा क्रिकेट एकेडेमी सञ्चालनमा ल्याइसक्नु भएको छ ।” 

यी हुन् शक्ति गौचनका दुर्लभ कीर्तिमान
सन् २०१२ मा आईसीसी विश्व क्रिकेट लिग डिभिजन फोरअन्तर्गत मलेसियाविरुद्ध शक्ति गौचनले कीर्तिमान राखेका थिए । १० ओभर बलिङ गरेका शक्तिले ८ मेडन ओभर राख्दै २ रनमात्र खर्चेर ३ विकेट लिएका थिए । जुन बेष्ट इकोनोमीको कीर्तिमान अहिलेसम्म नेपालका कुनै पनि खेलाडीले तोड्न सकेका छैनन् ।

त्यसो त, शक्तिले सिनियर टिमबाट ह्याट्रिक विकेट पनि लिएका छन् । आईसीसी टि–ट्वान्टी छनोटको खेलमा डेनमार्क विरुद्ध ह्याट्रिक विकेट लिएका थिए ।

शक्ति गौचन बलिङमा मात्रै चम्किँदैनन्, ब्याटिङमा पनि उनी पहिले त्यतिकै शसक्त थिए । उनले अहिलेसम्म २ शतक बनाएका छन् ।  सन् २००१ मा माल्दिभ्सविरुद्ध उनले यु–१९ टिमबाट शतक प्रहार गरेका थिए । त्यस्तै, उनको नाममा सिनियर राष्ट्रिय टिममा पनि शतक छ ।

सन् २००५ मा इटालीविरुद्ध शक्तिले शतक बनाएका थिए । शक्ति गौचन त्यस्ता खेलाडी हुन्, जसले राष्ट्रिय टिमबाट सबैभन्दा पहिले १००० रन बनाएका थिए । भैरहवामा जन्मिएका ३४ वर्षीय शक्तिका लागि स्मरणीय क्षण भने सन् २०१४ मा बंगलादेशमा सम्पन्न टि–ट्वान्टी विश्वकप नै हो । 

“२०१४ को टि–ट्वान्टी विश्वकप नै मेरोे सबैभन्दा स्मरणीय क्षण हो । मैदानभित्र राष्ट्रिय गीत गाएर पहिलो पटक अन्तर्राष्ट्रिय टि–ट्वान्टी खेल खेल्नु त्यो क्षण स्मरणीय छ,” शक्तिले भने । 

सन्यासपछि के ?
शक्ति गौचनले आफ्नै ब्याचका खेलाडीले नेपाललाई टेष्ट नेशनको उपलब्धी दिलाएको हेर्ने रहर भएको बताए । उनले भने, “अहिलेको टिम मेरो अन्तिम ब्याच हो । यो ब्याचले नै टेष्ट प्लेइङ नेशनको उपलब्धी प्राप्त गरोस् । यो नै मेरो लागि बेष्ट हुने छ ।”

१७ वर्षे अन्तर्राष्ट्रिय खेलाडी यात्रालाई पूर्णविराम लगाउन लागेका शक्तिले आगामी दिनमा भने नेपाली क्रिकेटको कुनै निकायमा रहेर काम गर्ने बताए । शक्तिले भने, “अहिले त्यस्तो खासै केही विचार त गरेको छैन । कसरी हुन्छ कुन ठाउँबाट गर्दा नेपाली क्रिकेटलाई माथि उठाउन सकिन्छ, त्यो ठाउँलाई नै रोजेर लाग्नेछु ।” शक्तिले थपे, “सबैभन्दा पहिले त म टिमलाई मिस गर्नेछु । तर म खेलाडीको रुपमा नभएपनि अरु कुनै रुपमा नेपाली क्रिकेट टिमसँगै हुनेछु ।”