काठमाडौं । सर्वाधिक पुरस्कार राशीको धनगढी प्रिमियर लिग (डीपीएल) क्रिकेट प्रतियोगिता यही चैत १७ गतेदेखि सुरु हुदैछ । प्रतियोगिता नजिकिँदै गर्दा ६ शहरका ६ टिमले विदेशी खेलाडीको टुंगो लगभग लगाएका छन् ।

डीपीएल–२ क्रिकेट खेल्न कस्ता विदेशी खेलाडी आउनेछन् भन्ने क्रिकेटप्रेमीको मनमा खुलदुली चलिरहँदा प्रायः सबै टिमले विदेशी खेलाडीको टुंगो लगाएका छन् । यतिबेला डीपीएलमा सहभागी क्लबहरू आ–आफ्नै तारिकाले अभ्यासमा व्यस्त छन् । कुनै क्लब विदेशी भूमिमा गएर अभ्यास गरिरहेका छन् भने कुनै टिम स्वदेशमै डीपीएलको उपाधि उलाल्ने लक्ष्यका साथ तयारीमा छन् ।

यस्ता छन् विदेशी खेलाडी
 

महेन्द्रनगर युनाइटेड
महेन्द्रनगर युनाइटेडले आइतबारदेखि अभ्यास थालेको छ । पूर्व कप्तान विनोद दास प्रशिक्षक रहेको यो क्लबले दुई भारतीय खेलाडीलाई आफ्नो टिममा अनुबन्धित गरेको छ । 
महेन्द्रनगरले पुनित मेहरा र पुनित विष्टलाई आफ्नो क्लबमा आबद्ध गराएको हो । पुनित मेहराले भारतीय घरेलु प्रतियोगिता खेल्दै आएका खेलाडी हुन् । मेहरा अलराउण्डर हुन् भने विष्ट विकेटकिपर ब्याट्सम्यान हुन् ।
महेन्द्रनगर युनाइटेडमा विनोद भण्डारी, करण केसी, अभिनाष कर्ण, भुवन कार्की, रोहित कुमार पौडेल, आरिफ शेख  र आसिफ शेख जस्ता चर्चित खेलाडी छन् ।

काठमाडौं गोल्डेन्स
काठमाडौं गोल्डेन्सले आफ्नो अभ्यास थालेको करिब एक साता भइसकेको छ । काठमाडौं गोल्डेन्सले आफ्नो टिममा दुई भारतीय खेलाडीलाई भित्र्याएको छ । काठमाडौंले जयकिसन कोल्सावाला र सन्नी पटेललाई आफ्नो टिममा आबद्ध गरेको हो ।
कोल्सावाला विकेटकिपर ब्याट्सम्यान हुन् भने पटेल अलराउण्डर हुन् । उद्घाटन खेलमा नै टिम चौराह धनगढीसँग प्रतिस्पर्धा गर्ने काठमाडौं निकै सन्तुलित टिम भएको प्रशिक्षक राजु बस्न्यातले बताएका छन् ।
काठमाडौं गोल्डेन्समा नेपाली क्रिकेट टिमका उपकप्तान ज्ञानेन्द्र मल्ल, नरेश बुढाऐर, ललितनारायण राजवंशी, अमित श्रेष्ठ, किशोर महत्तो जस्ता खेलाडी छन् ।

रुपन्देही च्यालेन्जर्स
रुपन्देही च्यालेन्जर्स निकै आशा गरिएको टिम हो । भेट्रान खेलाडी शक्ति गौचनको नेन्तृत्वमा रहेको रुपन्देही च्यालेन्जर्स अहिले भारतको गोखरपुरमा अभ्यास खेल्न खेल्न गएको छ । गोरखपुरका स्थानीय क्लबसँग ३ वटा अभ्यास खेल आफ्नो टिमले खेलीरहेको टिमका मालिक रोमित बज्राचार्यले बताए । 
रुपन्देही च्यालेन्जर्सले एक जना खेलाडी ओमनबाट आफ्नो क्लबमा भित्र्याएको छ भने अर्को खेलाडी भारतबाट ल्याएको छ ।
ओमनका मुख्य खेलाडी सुफ्यान मेहमोदलाई आफ्नो टिममा भित्र्याएका हुन् । यता अर्का खेलाडी भने द क्रिकेट एसोसिएसन अफ बेंगालबाट दिपक प्रसादलाई आफ्नो टिममा ल्याएको हो ।
रुपन्देही च्यालेन्जर्समा शक्ति गौचन, सागर पुन, प्रदिप ऐरी, जितेन्द्र मुखिया, सिद्धान्त लोहनी, सुसान भारी, अमरसिंह रौटेला जस्ता खेलाडी छन् ।

सीवाईसी अत्तरिया
सीवाईसी अत्तरिया पनि यतिबेला अभ्यासमा व्यस्त छ । शनिबारदेखि अभ्यास थालेको सीवाईसीले आफ्नो टिमलाई बलियो बनाउन भारतबाट दुई खेलाडी ब्याट्सम्यान र अलराउण्डर भित्र्याएको छ । 
सीवाईसीले भारतीय खेलाडी विपिन चन्द्रा र गौरभ चितकारालाई आफ्नो टिममा आबद्ध गरेको हो । गौरभ यसअघि आईपीएलको लागि डिल्लीमा परेका खेलाडी समेत हुन् भने विपिन भारतीय घरेलु प्रतियोगिता खेल्दै आएका खेलाडी हुन् ।
सीवाईसी अत्तरियामा दीपेन्द्रसिंह ऐरी, सुवास खकुरेल, कुशल भुर्तेल, प्रेम तामाङ जस्ता खेलाडी छन् ।

विराटनगर किंग्स  
विराटनगर किंग्सले काठमाडौंमा सोमबार (आज) देखि अभ्यास थालेको छ । विराटनगरको टिम महेश रिजालले सम्हालिरहेका छन् । उनकै मुख्य प्रशिक्षणमा सोमबारदेखि टियु मैदानमा अभ्यास सुरु गरेको छ । 
विराटनगर किंग्सले विदेशी खेलाडीमा हङकङका बाबर हायतलाई ल्याउने कुरा चलेपनि अहिलेसम्म टुंगो लागिसकेको छैन । विराटनगर किंग्सका टिम व्यवस्थापक छुम्बी लामाले केही दिनमै दुई विदेशी खेलाडीको टुंगो लाग्ने बताए ।
विराटनगर किंग्समा नेपाली क्रिकेट टिमका कप्तान पारस खड्कासँगै बसन्त रेग्मी, पृथु बास्कोटा, सौरभ खनाल, दिलिप नाथ, अनिल कुमार शाह, मञ्जित श्रेष्ठ, रामनरेश गिरी जस्ता चर्चित खेलाडी छन् ।

टिम चौराह धनगढी
टिम चौराह धनगढी साविक विजेता पनि हो । टिम चौराहले पहिलो संस्करणको डीपीएलको उपाधि जितेको थियो । टिम चौराहका खेलाडी आज (सोमबार) धनगढी पुग्दैछन् । टिमका मालिक राजकुमार श्रेष्ठले मंगलबारदेखि अभ्यास सुरु गर्ने बताए ।
टिम चौराहले एक विदेशी खेलाडीलाई अनुबन्धित गरिसकेको छ भने एक खेलाडी आबद्ध गर्न बाँकी छ ।
टिम चौराह धनगढीले हङकङका नदिम अहमदलाई आफ्नो टिममा भित्र्याएको छ । बाँकी एक जना खेलाडीको पनि कुरा चलिरहेको र एक दुई दिनमा नै टुंगो लाग्ने टिमका मालिक राजकुमार श्रेष्ठले बताएका छन् ।
टिम चौराह धनगढीमा सोमपाल कामी, राजेश पुलामी मगर, योगेन्द्रसिंह कार्की, सोनु तामाङ, राजु रिजाल, सुनिल धमला जस्ता चर्चित खेलाडी छन् ।