काठमाडौं । आईसीसी विश्वकप छनोट क्रिकेटमा नेपालले सोमबार समूह चरणको अन्तिम खेल हङकङसँग खेल्दैछ । नेपाल र हङकङबीचको खेल दुई टिमबीचको महत्वपूर्ण खेल नभई अन्य राष्ट्रका लागि पनि उत्तिकै महत्वपूर्ण भएको छ ।

नेपाल र हङकङबीचको खेल बुलावायो एथ्लेटिक क्लबको मैदानमा हुँदैछ । यो खेल नेपाल र हङकङलाई उत्तिकै महत्वपूर्ण छ । हङकङलाई भारी अन्तरले पराजित गरेमा सुपर सिक्समा पुग्ने सम्भावना नेपालको अझै बाँकी छ । असम्भवजस्तै तर अंक तालिकामा मात्रै झिनो आश नेपाललाई छ । 

नेपाल अहिलेसम्म जारी प्रतियोगितामा तीनै खेलमा पराजित भएको छ । पहिलो खेलमा टेष्ट नेशन राष्ट्र जिम्बावेसँग ११६ रनले पराजित भएको थियो । दोस्रो खेलमा नेपाल स्कटल्याण्डसँग ४ विकेटले पराजित भएको थियो । आफ्नो तेस्रो खेलमा भने अफगानिस्तानसँग ६ विकेटले पराजित हुँदै प्रतियोगितामा निकै खराब प्रदर्शन गरेको हो ।

यता, हङकङले भने पहिलो खेलमा स्कटल्याण्डसँग ४ विकेटको पराजय भोगेको थियो । तर दोस्रो खेलमा भने उत्कृष्ट प्रदर्शन गर्दै अफगानिस्तानमाथि ३० रनको जित दर्ता गराएको थियो । आफ्नो तेस्रो खेलमा हङकङ आयोजक जिम्बावेसँग ८९ रनले पराजित भएको थियो ।

हेड टु हेडमा नेपाल अघि
हङकङ र नेपाल नयाँ प्रतिद्वन्द्वी होइनन् । कुनै बेला नेपाल र कुनै बेला हङकङले खेल आफ्नो पक्षमा पार्ने गरेका छन् । अहिलेसम्म नेपाल र हङकङबीच १२ पटक भेट भएको छ । जसमा नेपालले हङकङविरुद्ध ६ खेलमा जित हात पारेको छ भने ५ खेलमा पराजित भएको छ ।

यी दुई टिमबीच सन् २०१७ मा आईसीसी विश्व क्रिकेट लिग च्याम्पियनसिपमा भएको थियो । दुई खेलमध्ये अन्तिम खेल वर्षाका कारण रद्द भएको थियो भने पहिलो खेलमा नेपाल ८३ रनले पराजित भएको थियो ।

योभन्दा अघि नेपालले सन् २०१४ मा न्यूजील्याण्डमा सम्पन्न आईसीसी विश्वकप छनोटमा हङकङसँग प्रतिस्पर्धा गरेको थियो, जुन खेलमा नेपालले लज्जास्पद हार बेहोरेको थियो । त्यसबेला हङकङसामु नेपाल १० विकेटले पराजित भएको थियो ।

फेरि विश्वकप छनोटमै यी दुई टिम आमनेसामने हुँदैछन् । नेपाल लज्जास्पद हारको बदला लिने दाउमा छ भने हङकङ जित हात पार्दै सुपर सिक्समा स्थान बनाउने रणनीतिमा छ ।

अफगानिस्तानको भविष्य नेपालको हातमा
सोमबार हुने खेल नेपाल र हङकङबीचको भविष्यसँग मात्रै जोडिएको छैन । अफगानिस्तानको लागि पनि नेपाल र हङकङबीचको खेल उत्तिकै महत्वपूर्ण छ । नेपाल पराजित भएमा हङकङ सुपर सिक्समा पुग्नेछ । तर नेपालले साँघुरो जित हात पारेमा अफगानिस्तान तेस्रो हुँदै विश्वकप छनोटको सुपर सिक्समा पुग्नेछ ।

यसकारण पनि सधै खेलमा प्रतिद्वन्द्वीको रुपमा परिचित अफगानिस्तान यो पटक भने नेपालले जितोस् भन्ने कामना गरिरहेको छ । नेपालले कम अन्तरले जिते अफगानिस्तानको विश्वकप यात्रा अघि बढ्नेछ । तर हारे त्यो तुहिने निश्चित छ । त्यसैले अफगानी खेलाडी जसरी पनि नेपाललाई जिताउन चाहन्छन् ।

नेपाल अहिले समूह बीको पुछारमा छ । समूह बीबाट स्कटल्याण्ड र जिम्बावे सुपर सिक्समा पुगिसकेका छन् । सोमबार नै जिम्बावेले स्कटल्याण्डसँग खेल्दैछ । 

ओडीआई मान्यता पाउन कम्तिमा २ खेल जित्नैपर्ने
नेपाल लिष्ट ए टिम हो । नेपालले अहिलेसम्म एक दिवसीय मान्यता पाएको छैन । यो विश्वकप छनोटबाट नेपालले एक दिवसीय मान्यता पाए त्यो सबैभन्दा ठूलो उपलब्धी हुनेछ । तर त्यति सजिलो भने छैन । 

एक दिवसीय मान्यता पाउनका लागि नेपालले हङकङलाई पराजित गर्नुको कुनै विकल्प छैन । हङकङलाई पराजित गर्दै नेपाल समूहको चौथो स्थानमा उक्लिने हो भने प्लेअफमा नेपालको प्रतिद्वन्द्वी पपुवा न्युगिनी हुनेछ । पपुवा न्युगिनी समूह ए को टिम हो । पपुवा न्युगिनीले समूह ए मा आफ्नो सबै खेलमा पराजय भोगेको छ । 

प्ले अफमा पपुवा न्युगिनीलाई पराजित गरे समूह ए को चौथो र समूह बी को पाँचौं टिमबीचको विजेतासँग नेपालले सातौं स्थानका लागि खेल्नेछ । 

प्लेअफमा हङकङ समूह ए को चौथो हुनेसँग पराजित भए नेपालले एक दिवसीय मान्यता पाउने निश्चित छ । हङकङले जित हात पारे सातौं स्थानमा नेपाल र हङकङबीच नै प्रतिस्पर्धा हुनेछ । र यो खेलले एक दिवसीय मान्यता पाउने टुंगो लगाउने छ ।