काठमाडौं । अहमदाबादमा भएको एयर इन्डियाको विमान दुर्घटनामा कम्तीमा २०४ जनाको मृत्यु भएको पुष्टि भएको छ, तर एक बेलायती यात्रु दुर्घटनामा बाँचेको खबर छ । अहमदाबाद प्रहरीका अनुसार, यस दुर्घटनामा एकजना बाँच्न सफल भए । 

अहमदाबादका प्रहरी आयुक्त जीएस मलिकले समाचार एजेन्सी एएनआईलाई बताएअनुसार बाँचेका यात्रुमध्ये एकजना लन्डन जाने बोइङ ७८७–८ उडानमा थिए र सिट नम्बर ११ए मा बसेका थिए । 

उडानको बारेमा अधिकारीहरूले साझा गरेको जानकारीअनुसार, यात्रुको पहिचान बेलायती नागरिक विश्वास कुमार रमेशको रूपमा गरिएको छ ।

विमानमा २४२ जना सवार थिए, जसमा २३२ यात्रु र १० जना चालक दलका सदस्य थिए । यो विमान अहमदाबादबाट लन्डनका लागि उडेको थियो ।

स्थानीय मिडिया रिपोर्टका अनुसार, अस्पतालको बेडमा सुतिरहेका विश्वास कुमार रमेशले पत्रकारहरूलाई आफ्नो बोर्डिङ पास पनि देखाए, जसमा उनको नाम र सिट नम्बर रेकर्ड गरिएको छ ।

रमेशले मिडियालाई भने, "विमान उडेको ३० सेकेन्डपछि ठूलो आवाज सुनियो र त्यसपछि विमान दुर्घटनाग्रस्त भयो । यो सबै केही क्षणमै भयो ।"

रोयटर्सका अनुसार, रमेशले पत्रकारहरूलाई भने, "जब म होसमा आएँ, मेरो वरिपरि शवहरू थिए । म धेरै डराएँ । म उठेर दौडन थालेँ । मेरो वरिपरि विमानको भग्नावशेष थियो । कसैले मलाई समातेर एम्बुलेन्समा राखेर अस्पताल पुर्‍यायो ।"

उनका भाइ अजय विमानमा अर्को पंक्तिमा बसिरहेका थिए । उसले भने, "ऊ मसँगै यात्रा गरिरहेको थियो र मैले उसलाई भेट्टाउन सकिन । कृपया मलाई उसलाई खोज्न मद्दत गर्नुहोस् ।"

बीबीसी संवाददाता नवतेज जोहलले बेलायतको लेस्टरमा रहेका विश्वास कुमार रमेशका काका अजय वाल्गीसँग कुरा गरे ।

उनले भने कि विश्वासले आफ्नो परिवारलाई फोन गरेर आफू ठिक रहेको र विस्फोटको आवाज सुनेको बताएका थिए ।

उनलाई आफ्नो भाइ अजयको बारेमा थाहा छैन । उनको घरमा आफन्तहरू भेला भएका छन् र शोक मनाइरहेका छन् ।