काठमाडौं । काठमाडौंमा आयोजना हुने एकदिवसीय ‘चाइना फिल्म डे’का लागि चिनियाँ भ्रमण टोलीको टुंगो लागेको छ । नेपाल फिल्म एन्ड कल्चरल एकेडेमीका अनुसार, १४ सदस्यीय टोलीको नेतृत्व चाइना फिल्म एडमिनिस्ट्रेसनका अन्तर्राष्ट्रिय विभागका निर्देशक सु याङले गर्नेछन् ।

टोलीमा गोल्डेन रुस्टर अवार्ड विजेता फिल्म ‘जी फर ग्याप’की अभिनेत्री यु हङ पनि समावेश छिन् । उनी कार्यक्रमको मुख्य आकर्षण हुने आयोजकको अपेक्षा छ । उनले फिल्म स्क्रिनिङपछि दर्शकसँग अन्तरक्रिया पनि गर्ने छिन् ।

टोलीमा चाइना फिल्म एडमिनिस्ट्रेसनका बजार विभागका उपनिर्देशक झेङ झेङ र टाइगर पिक्चर्स इन्टरटेनमेन्टका प्रमुख ओवेन यङ पनि सहभागी छन् ।  

कार्यक्रममा फिल्म ‘पर्सनल पर्सिसटेन्स’का निर्देशक जिङ जिआओ, ‘लाइफ अफ लुओसाङ’का पटकथा लेखक लु वेई र निर्देशक झाङ गुदोङ, साथै ‘मिडसमर भोइस’का निर्देशक झाङ युडी समेत उपस्थित हुनेछन् ।  

नेपाल फिल्म एन्ड कल्चरल एकेडेमी, चाइना फिल्म एडमिनिस्ट्रेसन, चिनियाँ दूतावास र चाइना फिल्म आर्काइभको संयुक्त आयोजनामा क्यूएफएक्सको छाया सेन्टरमा हुन लागेको कार्यक्रममा तीन चिनियाँ फिल्म प्रदर्शन गरिनेछ । जसमा यी हुई साओ निर्देशित फिल्म ‘हर स्टोरी ओपनिङ’ फिल्म रहनेछ । त्यस्तै, युडी झाङ निर्देशित ‘मिडसमर भोइस’ र फेई लङ निर्देशित ‘जी फर ग्याप’ फिल्महरू स्क्रिनिङपछि निर्माण टोलीले दर्शकसँग अन्तक्रिया गर्ने कार्यक्रम छ ।