काठमाडौं । कुशल परेराको शतकप्रेरित श्रीलंकाले घरेलु टिम न्युजिल्यान्डविरुद्धको अन्तिम ट्वान्टी–२० खेलमा सात रनको जित निकालेको छ । बिहीबार न्युजिल्यान्डको नेल्सनमा भएको खेलमा टस हारेर ब्याटिङमा आएको श्रीलंकाले निर्धारित २० ओभरमा पाँच विकेट गुमाएर २१८ रनको योगफल खडा गरेको थियो ।

श्रीलंकाबाट तेस्रो क्रमका ब्याटर कुशल परेराले १०१ रनको शतकीय इनिङ खेले । उनले ४६ बलमा १३ चौका र चार छक्का प्रहार गरे । ट्वान्टी–२० अन्तर्राष्ट्रिय क्रिकेटमा कुशलको यो पहिलो शतक हो । योसँगै उनी ट्वान्टी–२० अन्तर्राष्ट्रिय क्रिकेटमा दुई हजार रन जोड्ने पहिलो क्रिकेटरसमेत बने । 

परेराबाहेक, कप्तान चरिथ असलंकाले २४ बलमा पाँच छक्का र एक चौकासहित ४६ रन बनाए । ओपनर कुशल मेन्डिसले २२, अभिस्का फर्नान्डोले १७ र पथुम निसांकाले १४ रन थपे ।

न्युजिल्यान्डका म्याट हेन्री, जाकोप डफी, जाकारी फकेस, मिचेल स्यान्टनर र डार्यल मिचेलले समान एक विकेट लिए ।

जितका लागि २१९ रनको लक्ष्यसहित मैदान उत्रिएको न्युजिल्यान्डले निर्धारित २० ओभरमा सात विकेट गुमाएर २११ रनमात्र बनाउन सक्यो । 

न्युजिल्यान्डका रचिन रविन्द्रले ६९ रन बनाए पनि हार टार्न सकेनन् । टिम रोबिन्सनले ३७, डार्यल मिचेलले ३५, जाकारी फकेसले २१ र कप्तनन मिचेल स्यान्टनरले १४ रन जोडे । 

श्रीलंकाका चरिथ असलंकाले तीन विकेट लिए । वनिन्दु हसरंगाले दुई विकेट लिँदा नुवान थुसारा र महिस थिक्षणाले समान एक विकेट लिए । 

श्रीलंकाको जितका बाबजुद तीन खेलको ट्वान्टी–२० शृंखला न्युजिल्यान्डले जितेको छ । न्युजिल्यान्डले २–१ ले शृंखला जितेको हो । यसअघि, शृंखलाको पहिलो खेलमा न्युजिल्यान्डले आठ र दोस्रो खेलमा ४५ रनको जित निकालेको थियो । 

यी दुई टिमबीच अब तीन खेलको एकदिवसीय शृंखला हुनेछ । एकदिवसीय शृंखला आइतबारदेखि सुरु हुनेछ ।