विराटनगर । प्रतिनिधिसभा सार्वजनिक लेखा समितिका सभापति ऋषिकेश पोखरेलले आफ्ना स्वकीय सचिवविरुद्ध पहिला परेकोे उजुरी मिल्काउँदै बचाएको खुलेको छ ।

स्वकीय सचिव अनिल पोखरेलविरुद्ध एमाले मोरङमा पहिल्यै परेको उजुरी परेको थियो, जतिखेर ऋषिकेश पोखरेल एमाले मोरङ अध्यक्ष थिए । उनले पार्टीमा अनिलविरुद्ध परेको मिल्काएपछि बचेका थिए । अनिल पोखरेल पनि एमालेको मोरङ जिल्ला सदस्य हुन् ।

तर, अध्यक्ष पोखरेलले उजुरी नसुनी नजरअन्दाज गरेपछि पीडितले अदालतको बाटो रोजेको देखिन्छ । सप्तरी जिल्लाको अग्नीसाइर कृष्णासवरन गाउँपालिका– ५ बकधुवा बस्ने ५७ वर्षीय बौआलाल चौधरीसँग स्वकीय सचिव पोखरेलले पटक–पटक गरी ३८ लाख ८० हजार रुपैयाँ लिएको पीडितको भनाइ छ । 

चौधरीले आफू एमाले नेताबाटै ठगिएको जानकारी गराउँदै २०७८ पुस २७ गते एमाले मोरङमा उजुरी गरेका थिए । स्वकीय सचिव पोखरेल मोरङको रंगेली नगरपालिका–२ का वासिन्दा हुन् । हाल उनी काठमाडौं बस्छन् । ४३ वर्षीय पोखरेलविरुद्ध ३८ लाख ८० हजार रुपैयाँ ठगेको आरोप लागेको छ । 

घटना सार्वजनिक भएलगत्तै पोखरेलले स्वकीयलाई पदबाट हटाएका छन् । पोखरेलले स्वकीय सचिवबाट हटाएको पत्र संघीय संसद् सचिवालयलाई शुक्रबार पठाइसकेका छन् । 

धनपालथान गाउँपालिकाको कर्सियास्थित उमागौरी कृषि सहकारी संस्थामा करोडौं रकम अपचलन गरेको आरोपमा सभापति पत्नी अञ्जला कोइरालाविरुद्ध पनि पक्राउ पुर्जी जारी भएको छ । हाल उनी फरार छिन् ।

उक्त प्रकरणको छानबिन तथा बयान शुरु नहुँदै पोखरेलका स्वकीय ठगी सम्बन्धी अर्को मुद्दामा तानिएका हुन् । पछिल्लो ठगीको विषयमा समेत अनुसन्धान शुरु गर्न उच्च अदालत विराटनगरले आदेश दिएको छ । दोस्रो प्रकरण बाहिर आएपछि सभापति पोखरेलले पदबाट राजीनामा दिनुपर्ने सामाजिक सञ्जालमा बहससमेत शुरु भएको छ ।

पीडितले आफू ठगिएको उजुरी पार्टी कार्यालयमा दिएका थिए । तर, पार्टीको जिल्ला अध्यक्षको नेतृत्व सम्हालिरहेका पोखरेलले उक्त विषय नजरअन्दाज गरी अनिललाई बचाउने काम गरेको आरोप चौधरीको छ ।

स्वकीय सचिव पोखरेलविरुद्ध अनुसन्धान गर्न उच्च अदालत विराटनगरले आदेश दिएपछि पीडितले पहिल्यै न्याय निरुपणको प्रयास गरेको थप खुलासा भएको हो । “उनको कर्तुतबारे पार्टीलाई जानकारी गराउने उद्देश्यसाथ म नेकपा (एमाले) पार्टी कार्यालय मोरङ पुगेर उजुरी दिएको थिएँ । तर त्यसलाई अध्यक्षले वास्ता नगरी छानबनि समेत गरिएन,” उनले भने । 

चौधरीका अनुसार, छोरी दीक्षालाई चिकित्सा शिक्षा अध्ययनअन्तर्गत (एमबीबीएस) तहमा नाम निकालिदिने भनी पटक–पटक गरी पैसा लिनुभयो । बैंकबाट पठाएको भौचरको सक्कल प्रति अझै मसँग सुरक्षित छ, तर छोरी अनुत्तीर्ण भइन् । पछि पैसा फिर्ता माग्दा उल्टै मलाई धाकधम्की दिइयो ।

उनले सात पटक पोखरेललाई पैसा पठाएको दाबी गर्छन् । उनका अनुसार, नबिल बैंक लिमिटेडमा पोखरेलको नाममा रहेको बचत खाता नं. ३५१००१७५०३९८१ मा पैसा पठाइएको थियो । 

स्वकीयले काठमाडौ बोलाएर उल्टै ५० लाख रुपैयाँ ऋण दिएको भनी कपाली तमसुक बनाएको चौधरीले सुनाए । “यो घटना २०७८ फागुन ९ गतेको थियो । ऋण चुक्ता गरिदिन्छु भनी मलाई काठमाडौ बोलाउनु तर पुरानो मितिमा किर्ते कागज बनाई तमसुक गराए,” चौधरीले गुनासो गरे ।

ठगीबारे चौधरीले जिल्ला प्रहरी कार्यालय मोरङ र इलाका प्रहरी कार्यालय रंगेलीमा जाहेरी दर्ता गर्ने प्रयास समेत गरेका थिए । तर, प्रहरीले लिएन । प्रमाण नपुग्ने भन्दै जाहेरी नलिएपछि २०७९ साउन १८ गते हुलाक निर्देशनालय विराटगरमार्फत ठगी गरी अपराधिक लाभ लिएको मुद्दामा जाहेरी दरखास्त जिल्ला प्रहरी मोरङमा पठाए ।

त्यो पत्र प्रहरी कार्यालयले बुझेको पोष्टम्यान बुकमा देखिन्छ । तर, बौआलाल चौधरीको नामबाट कुनैपनि उजुरी नाआएको जिकिर प्रहरीको छ ।

त्यसपछि चौधरीले उच्च अदालत विराटनगरमा २०७९ साउन ३१ गते ठगी मुद्दामा पोखरेलविरुद्ध जाहेरी दरर्खास्त दर्ता गराइ अनुसन्धान गर्न परमादेश माग गरेका थिए । गत भदौ ३१ गते उच्चले दिएको परमादेश पुस ११ गते प्रमाणीकरण भएको हो ।

ठगी गरेको आरोप लागेका स्वकीय सचिव अनिल पोखरेलले आफूविरुद्ध समाचार प्रकाशन प्रसारण हुन थालेपछि आफ्नो फेसबुक पेज समेत लक गरेका छन् । तत्कालीन स्वकीय सचिव भाष्कर खनाल परिवारसहित विदेश गएपछि लेखा समिति सभापति पोखरेलले अनिललाई नियुक्त गरेका थिए ।