काठमाडौं । राष्ट्रिय महिला लिगको दोस्रो चरणमा विभागीय टोली नेपाल पुलिस क्लबले स्याङ्जाको वालिङ नगरपालिकाविरुद्ध ५–० को फराकिलो जित निकालेको छ ।

बिहीबार सातदोबाटोस्थित एन्फा मुख्यालयमा भएको खेलमा पुलिसलाई जित दिलाउन अनुष्का शेर्पा र सम्झना लावतीले समान दुई गोल गरे । यस्तै, अर्को एक गोल पुजा रानाले गरिन् ।

खेलको २६औँ मिनेटमा अनुष्काको गोलमा पुलिसले अग्रता बनाएको थियो । ४५औँ मिनेटमा सम्झनाले पुलिसको अग्रता दोब्बर बनाइन् । पहिलो हाफमा २–० को अग्रता बनाएको पुलिसले दोस्रो हाफमा तीन गोल थप्यो ।

४६औँ मिनेटमा पुजा रानाले गोल गर्दै पुलिसको अग्रतालाई ३–० मा पुर्‍याइन् । त्यसको दुई मिनेटपछि नै अनुष्काले पुलिसको अग्रतालाई ४–० मा पुर्‍याइन् । ६०औँ मिनेटमा सम्झनाले दोस्रो गोल गरेपछि पुलिसले अग्रतालाई ५–० मा पुर्‍याएको हो ।

जितसँगै पुलिसले तीन अंक जोड्दा वालिङले भने दोस्रो चरण हारबाट सुरु गरेको छ । महिला लिग दोस्रो चरणको यो दोस्रो खेल हो । यसअघि बिहीबार भएको पहिलो खेलमा अर्को विभागीय टोली त्रिभुवन आर्मी क्लबले सर्लाहीको वाग्मती युवा क्लबविरुद्ध २–० को जित निकालेको थियो ।