काठमाडौं । वर्ल्डलिंक कम्युनिकेसन्स लिमिटेडले आफ्नो अनुमतिपत्र (लाइसेन्स) नवीकरण भएको बताएको छ । कम्पनीले २५ वर्ष पूरा भएपछि म्याद नाघेको नेटवर्क सेवा प्रदायक र इन्टरनेट सेवा प्रदायकको लाइसेन्स नवीकरण भएको बताएको हो ।

कानुन अभावले रोकिएको लाइसेन्स नवीकरण प्रक्रिया पूरा भएसँगै संस्थाको विश्वसनीयता र क्षमता थप बलियो भएको कम्पनीको भनाइ छ ।

वर्ल्डलिंकले विगतदेखि मर्मत सम्भार शुल्कसम्बन्धी मुद्दामा संवैधानिक हकको उपयोग गर्दै कानुनी प्रक्रियामा संलग्न रहेको र आगामी दिनहरूमा पनि आफ्नो संवैधानिक हकको पूर्ण प्रयोग गर्ने बताएको छ ।

उक्त मुद्दामा सर्वोच्च अदालतको निर्णय आएसँगै त्यसको सम्मान गर्दै संस्थाले आफ्नो कानुनी दायित्व पूरा गरिसकेको बताएको छ ।

“लामो कानुनी प्रक्रियामा यस संस्थालाई भरोसा दिलाउनु हुने र भरोसा गर्नु हुने आदरणीय ग्राहक महानुभावहरूप्रति वर्ल्डलिंक कम्युनिकेसन्स लिमिटेड हार्दिक आभार प्रकट गर्दछ,” कम्पनीका सीईओ केशव नेपालले एक वक्तव्यमा लेखेका छन् ।

उनले यस प्रक्रियामा प्रत्यक्ष–अप्रत्यक्ष सघाउने, चासो राख्ने र सहयोग गर्ने सम्पूर्णलाई कम्पनीकोतर्फबाट धन्यवाद ज्ञापन गरेका छन् ।

कम्पनीले आगामी दिनमा बाँकी रहेका नेपालका हरेक कुना काप्चामा इन्टरनेट सेवा पुर्‍याउने बताएको छ ।