काठमाडौं । चिनियाँ राष्ट्रपति सी चिनफिङले प्रधानमन्त्री केपी शर्मा ओलीलाई मुख्यगरी ६ वटा कुरा बताएका छन् । चीनको चार दिने भ्रमणमा रहेका प्रधानमन्त्री ओली र सीबीच मंगलबार बेइजिङको देउताई स्टेट गेस्ट हाउसको भिल्ला नम्बर १२ मा शिष्टाचार भेटवार्ता भएको थियो । 

भेटवार्तामा सहभागी परराष्ट्र मन्त्रालयका प्रवक्ता कृष्णप्रसाद ढकालका अनुसार नेपाल–चीनबीचको द्विपक्षीय सम्बन्ध र हितका विविध विषयमा विस्तृत छलफल भएको थियो ।

“राष्ट्रपति सीले नेपाल र चीन पुराना र असल छिमेकी तथा मित्रराष्ट्र भएको बताउनुभयो,” प्रवक्ता ढकालले भने, “राष्ट्रपति सीले नेपाल र चीनबीचको सम्बन्ध आपसी सद्भाव, सम्मान र सहयोगमा आधारित रहेको पनि बताउनुभयो ।”

राष्ट्रपति सीले नेपालको विकास र समृद्धिमा चीनको दरिलो साथ र सहयोग रहने प्रधानमन्त्री ओलीलाई बताएको ढकालले जनाए ।

भेटवार्ताको क्रममा चिनियाँ राष्ट्रपति सीले नेपाललाई ५०० मिलियन आरएमबी (९ अर्ब ३० करोड रुपैयाँ) अनुदान दिने घोषणा गरेका थिए ।

“राष्ट्रपति सीले नेपाली वस्तुहरू चिनियाँ बजारमा निर्यात गर्न थप सहजीकरण गर्ने पनि बताउनुभयो,” भेटवार्ताबारे परराष्ट्र मन्त्रालयका प्रवक्ता ढकालले जानकारी दिए । 

भेटमा चिनियाँ राष्ट्रपतिले चिनियाँ लगानीकर्ताहरूलाई नेपालमा लगानी गर्न प्रोत्साहन गर्ने आश्वासन पनि दिएका छन् ।

जवाफमा प्रधानमन्त्री ओलीले मित्रराष्ट्र चीन र नेपालबीचको सम्बन्ध पञ्चशीलको सिद्धान्तमा आधारित रहेको बताएका थिए । 

“प्रधानमन्त्रीज्यूले नेपाल र चीनबीचको सम्बन्धको मूल आधार सार्वभौमिक समानता, राजनीतिक स्वतन्त्रता, आपसी समझदारी र विश्वास रहेको बताउनुभयो,” प्रवक्ता ढकालले भने । 

नेपाल र चीनबीच कूटनीतिक सम्बन्ध स्थापना भएको ७०औँ वर्षको अवसरमा सन् २०२५ मा नेपाल भ्रमण गर्न राष्ट्रपति रामचन्द्र पौडेलेको तर्फबाट प्रधानमन्त्री ओलीले राष्ट्रपति सीलाई आमन्त्रण गरेका थिए । 

जवाफमा राष्ट्रपति सीले नेपाल भ्रमणको आमन्त्रणका लागि धन्यवाद दिँदै उपयुक्त समयमा नेपाल भ्रमण गर्ने बताएका थिए ।  

भेटमा प्रधानमन्त्री ओलीले छोटो अवधिमा चीनले गरेको तीव्रतर विकास र गरिबी निवारणको क्षेत्रमा हासिल गरेको सफलताको प्रसंशा गरेका थिए ।

साथै, वर्तमान सरकारका समृद्ध नेपाल, सुखी नेपालीको राष्ट्रिय आकांक्षासहित आर्थिक विकास र रूपान्तरणमा केन्द्रित रहेको बताउँदै प्रधानमन्त्री ओलीले आर्थिक विकासका क्षेत्रमा मित्रराष्ट्र चीनसँग सहयोग र साझेदारी गर्न चाहेको जनाएका थिए ।