काठमाडौं । प्रधानमन्त्री केपी शर्मा ओली चीन भ्रमणमा रहँदा उद्योग वाणिज्य तथा आपूर्तिमन्त्री दामोदर भण्डारी नयाँदिल्लीमा छन् । भारत सरकारद्वारा आयोजित साझेदारी शिखर सम्मेलनमा भाग लिन भारत पुगेका भण्डारी भारतका मन्त्री र सत्तारूढ दल भारतीय जनता पार्टीका नेतासँगको भेटघाटमा व्यस्त छन् ।

भण्डारीले भारतीय पेट्रोलियम तथा ग्याँसमन्त्री हरदिपसिंह पुरी र उद्योगमन्त्री पियुष गोयलसँग भेटघाट गरे ।

यही मेसोमा मन्त्री भण्डारीले भारतीय जनता पार्टीका विदेश विभाग प्रमुख विजय चौथाईवालेसँग पनि मंसिर १८ मा भेटघाट गरे । सम्मेलनको अन्तिम दिन भण्डारी र चौथाईवालेबीच नयाँदिल्लीको होटेल ताज प्यालेसमा भेटघाट भयो । 

चौथाईवालेले भण्डारीसँग भेटघाट गरेको तस्बिर सामाजिक सञ्जाल एक्समा पनि राखेका छन् । 

भेटघाटमा भारतीय जनता पार्टी र एमालेबीचको सम्बन्ध विस्तार गर्ने विषयमा कुराकानी भएको चौथाईवालले एक्समा लेखेका छन् । उच्च स्रोतका अनुसार, चौथाईवालेसँग मन्त्री भण्डारीले प्रधानमन्त्री ओलीलाई भारत भ्रमणमा निमन्त्रणा गरिदिन अनुरोध गरेका थिए ।

मन्त्री भण्डारीको अनुरोधमा ठट्यौली शैलीमा जवाफ फर्काउँदै चौथाईवालेले भने, “तपाईंहरूको त उत्तर (चिनियाँ कम्युनिस्ट पार्टी)सँग पनि भगिनी सम्बन्ध छ । उतातिर पनि सोध्नुहोस्, हामी बोलाउन तयार छौँ ।”

प्रधानमन्त्री ओलीको पछिल्लो समय भारतसँग राम्रो सम्बन्ध छैन । मन्त्री भण्डारीसँगै चौथाईवालेलाई भेट्न पुगेका कारोबारी–व्यापारी दीपक भट्टले भेटघाटको अन्त्यमा फेरि ओलीलाई भारत भ्रमणमा बोलाइदिन अनुरोध गरेका थिए । त्यसपछि झोक्किएका चौथाईवालेले जवाफ फर्काए, “प्रधानमन्त्री ओलीजीसँग मेरो नम्बर छ, उहाँले सिधै फोन गर्न सक्नुहुन्छ ।”