काठमाडौं । निर्देशक दिनेश राउतले नयाँ चलचित्र निर्माणको घोषणा गरेका छन् । उनले ‘महाभोज’ निर्माण गर्न लागेका हुन् । 

चलचित्रमा दयाहाङ राई, आर्यन सिग्देल, खगेन्द्र लामिछाने, मिरुना मगर, अञ्जना बराइली, मलिका महत, अनुपविक्रम शाही, बुद्धि तामाङ, कमलमणि नेपाललगायत कलाकारहरूको मुख्य अभिनय रहने निर्देशक राउतले बताएका छन् । 

किन यति धेरै स्टार कलाकार भन्ने प्रश्नमा निर्देशक राउत भन्छन्, “चलचित्रका पात्र छन् । पात्र भएपछि कलाकार चाहियो । कलाकार लिने क्रममा अहिले अनुबन्ध भएका नाम आएका हुन् ।” 

‘महाभोज’मा पारिश्रमिकमा ठूलो रकम खर्च हुने भएको छ । “पारिश्रमिकमा धेरै खर्च भएपछि लगानी बढ्छ, लगानी बढेपछि रिस्क पनि बढी हुन्छ,” निर्देशक राउतले बाह्रखरीसँग भने, “तर, राम्रो कथामा राम्रो काम भएपछि रिस्क कम हुन्छ भन्ने हाम्रो बुझाइ छ ।”  

चलचित्रलाई निर्माता हिमाल कडरियाले लगानी गर्नेछन् । चलचित्रको निर्माणमा कडरियाको क्लक वर्क क्रिएसन र निर्देशक राउतको पिक्चर फ्रेमले सहकार्य गरेका छन् ।

‘महाभोज’ सर्वसाधारणको जीवन र भरोसामाथि खेलबाड गर्नेविरुद्धको विद्रोही अभियान रहेको निर्देशक राउतले बताएका छन् । 

आम मानिसको जीवन र उनीहरूको भरोसाको पक्षमा उभिने तथा सत्यका लागि अन्यायविरुद्ध आवाज उठाउने कथा चलचित्रले प्रस्तुत गर्ने राउतले बताए ।

निर्देशक राउतले माघ १ गतेदेखि छायांकन सुरु हुनेछ । चलचित्रको स्क्रिप्ट विकास सुवेदीले लेखेका छन् । निर्देशक राउतका अनुसार आउँदो वैशाख अथवा जेठमा ‘महाभोज’ रिलिज हुनेछ ।