काठमाडौं ।  नेपालका टप एमेच्योर गल्फर सद्भव आचार्यले फाल्डो जुनियर टुर युरोपियन ग्रान्ड फाइनलमा ब्वाइज यू–२१ अन्तर्गतको प्रतियोगितामा सनसनीपूर्ण जित हात पार्दै इतिहास रचेका छन् । युनाइटेड अरब एमिरेट्सको अबु धाबी स्थित अल एन गल्फ क्लबमा आयोजित प्रतियोगितामा सद्भावले डेनमार्ककका भिक्टर कोफोड–ओल्सेनविरुद्ध दुई–स्ट्रोकको जित निकालेका हुन् ।

तीन दिनको खेलमा कुल पाँच–अन्डर–पार २०५ सहित आचार्य च्याम्पियन बनेका हुन् । यससँगै यो उपलब्धि हासिल गर्ने उनी नेपालको पहिलो नेपाली गल्फर बनेर इतिहास रचेका हुन् । अन्तिम राउन्डमा दुई–स्ट्रोकपछि रहेका १८ वर्षीय आचार्यले दबाबकाबीच देखाएको संयमताले उनलाई यो महत्वपूर्ण जित दिलाएको थियो ।

वान–अन्डर–पार ६९ को अन्तिम राउन्डमा उनले पार–४ को चौंथो होल दुई स्ट्रोकमै पूरा गर्दै कोफोड–ओल्सेनसँग बराबरी गरे । छैटौं र ९औं होलमा एक स्ट्रोक बढी लिएका आचार्यले १३ औं र १५ औं होलमा क्लच बर्डीजसहित महत्वपूर्ण जित हात पारेका हुन् ।

दुई राउन्डसम्म लिड गरेका कोफोड–ओल्सेन अन्तिममा थ्रि–ओभर–पार ७३ सहित दोस्रो भए । तीन वटै खेलमा उनी थ्रि–अन्डर–पार २०७ मा सिमित रहे । स्विडेनका विलियम स्वानस्ट्रोम (७०) र बेलायतका बेन बोल्टन (६९) एक–अण्डर पार २०९ सहित तेस्रो स्थानमा रहे । बेलायतका पाउल कोलिङ्गटन एक–ओभर–पार २११ सहित टप पाँचमा पर्न सफल भए ।

तीनवटै राउन्ड ७०, ६६ र ६९ मा पूरा गरेका आचार्यले सबै क्याटगोरी अन्तर्गत दोस्रो–स्तरको फिनिस उपलब्धि पनि पाए । उनी पुरुष यू–१६ मा सेभेन–अन्डर–पार २०३ सहित च्याम्पियन बनेका बेलायतका डियोन रेगनभन्दा दुई स्ट्रोक मात्रै पछि परे ।

प्रतिस्पर्धामा सहभागी अन्य नेपाली खेलाडी केही चुनौतीको सामना गरेपनि राम्रो अनुभव प्राप्त गरे । पुरुष यू–१६ अन्तर्ग नेपालका जैबिर आचार्यले ४६–ओभर–२५६ सहित ११ औं स्थान बनाए । महिला यू–१६ अन्र्तगत आइस्टिना टण्डनले ९७–ओभर–पार ३०७ सहित ९औं स्थान बनाइन् ।

यस वर्षको सुरुमा फाल्डो जुनियर टुर नेपाल च्याम्पियनसिपमा विजयी भएपछि तीनै नेपाली गल्फर विशेष निमन्त्रणा मार्फत युरोपियन ग्रान्ड फाइनलमा सहभागी भएका हुन् ।