काठमाडौं । शिक्षा विज्ञान तथा प्रविधि मन्त्रालय मातहतका महत्त्वपूर्ण निकायहरूमा अहिले प्रमुख पद रिक्त छन् । पदाधिकारी नियुक्तिमा ढिलाइ हुँदा कतिपय नितिगत निर्णय र काम कारबाही अड्किएका छन् । तर, पनि मन्त्रालयले भने पदाधिकारी नियुक्ति प्रक्रियामा तदारुकता देखाएको छैन ।

सीटीईभीटीको उपाध्यक्ष पद पाँच महिनादेखि रिक्त

प्राविधिक शिक्षामा प्रमाणपत्र तह सञ्चालन गर्ने प्रमुख निकाय प्राविधिक शिक्षा व्यावसायिक तालिम परिषद् (सीटीईभीटी )को उपाध्यक्ष पद पाँच महिनादेखि रिक्त छ । यसअघिका उपाध्यक्ष खगेन्द्र प्रसाद अधिकारीको कार्यकाल गत असार २ गते सकिएसँगै यो पद खाली छ । मन्त्रालयले भने भदौ १७ गतेमात्रै नयाँ उपाध्यक्ष नियुक्तिका निम्ति दरखास्त आह्वान गरेको थियो । 

शिक्षामन्त्री अध्यक्ष रहने सीटीईभीटीमा उपाध्यक्ष पदका निम्ति मन्त्रालयले अन्तर्वार्तापछि छनोट भएका तीन नाम मन्त्रिपरिषद्‌‌मा पठाएको थियो । तर, मन्त्रिपरिषद्ले हालसम्म सो पदमा नियुक्ति दिन सकेको छैन ।

त्यसो त यसअघि सीटीईभीटीकै सदस्य सचिव नियुक्तिका निम्ति पनि सरकारले चार महिना समय गुजारेको थियो । तत्कालीन सदस्य सचिव जीवनारायण काफ्ले २०८० भदौ २१ बाट सदस्य सचिवबाट जिम्मेवारीमुक्त भएका थिए ।

त्यसपछि मन्त्रालयले सो पदमा छनोट प्रक्रियाका निम्ति मंसिर दोस्रो सातासम्म समय लिएको थियो । सदस्य सचिव पद खाली भएको झन्डै चार महिनापछि ०८० पुस १२ मा मात्रै मन्त्रिपरिषद्ले हालका सदस्य सचिव महेश भट्टराईलाई नियुक्त गरेको थियो ।

यसरी लामो सयम मुख्य पदहरू रिक्त हुँदा नीतिगत काममा भने केही असर पर्ने सीटीईभीटीका अधिकारीहरू बताउँछन् ।

सीटीईभीटीका एक अधिकारी भन्छन्,  “उपाध्यक्ष नहुँदा माथिल्लो निकायसँग समन्वय गरेर निर्णय लिनुपर्ने तथा प्रक्रिया अघि बढाउनुपर्ने नीतिगत कामहरू अड्किएका छन् । सदस्य सचिवको मातहतमा हुने एकेडेमिक कामहरू नरोकिए पनि नीतिगत र कानुनी कामहरूमा भने अवरोध भएको छ ।”

तीन विश्वविद्यालयमा उपकुलपति पद रिक्त

अहिले सीटीईभीटी उपाध्यक्षसँगै तीनवटा विश्वविद्यालयमा उपकुलपति पद रिक्त छ । नेपाल संस्कृत विश्वविद्यालय, पोखरा विश्वविद्यालय, कृषि तथा वन विज्ञान विश्वविद्यालयमा उपकुलपति र त्रिविका ६ वटा शंकायमा डिन पद रिक्त छन् ।

नेपाल संस्कृत विश्वविद्यालयको उपकुलपति पद ०८१ साउनदेखि रिक्त छ । तत्कालीन डा. यादवप्रसाद लामिछानेले साउन २७ मा राजीनामा दिएसँगैँ सो पद खाली भएको थियो । 

गएको भदौ १७ गते तीन महिनाका लागि निमित्त उपकुलपतिको जिम्मेवारी शिक्षाध्यक्ष डा. भीमप्रसाद खतिवडालाई दिए पनि उपकुलपति पद नियुक्ति प्रक्रियामा सरकारले आलटाल गरिरह्यो । निमित्त उपकुलपतिको कार्यकाल एक महिना बाँकी रहँदा कात्तिक २८ गतेमात्रै मन्त्रालयले सो पदका निम्ति दरखास्त आह्वान गरेको छ । 

दश दिनभित्र आवेदन दिन भनिएको सो पदका निम्ति परेका आवेदनमाथि थप प्रक्रिया मन्त्रालयले अघि बढाएको छैन । कृषि तथा वन विज्ञान विश्वविद्यालयका उपकुलपति पदका निम्ति पनि १० दिनको म्याद राखेर मागिएको आवेदनमाथि पनि मन्त्रालयले थप प्रक्रिया अघि बढाएको छैन ।

यस्तै, पोखरा विश्वविद्यालयको रिक्त उपकुलपति पदका निम्ति मन्त्रालयले कात्तिक २५ गते दरखास्त आह्वान गरेको छ ।

तोकिएको समयसीमा नाघिसक्दा पनि आवेदनमाथि थप प्रक्रिया अघि बढाउन किन ढिलाइ त ? बाह्रखरीको प्रश्नमा शिक्षा विज्ञान तथा प्रविधि मन्त्रालयका प्रवक्ता  सहसचिव लक्ष्मीप्रसाद भट्टराई भन्छन्, “रिक्त पदपूर्तिका लागि कार्यविधि अनुसार मन्त्रालयले प्रक्रिया अघि बढाएको छ, हाम्रो तर्फबाट ढिलाइ भएको छैन ।”

तर, विश्वविद्यालय र सीटीईभीटीका प्रमुख पदहरूमा दलगत भागबन्डा मिलाउन मन्त्रिपरिषद्ले नै आलटाल गर्ने गरेको पूर्वउपकुलपतिहरू बताउँछन् ।