काठमाडौं । हास्य कलाकार सीताराम कट्टेल ‘धुर्मुस’ र कुञ्जना घिमिरे ‘सुन्तली’ नेतृत्वको धुर्मुस सुन्तली फाउन्डेसनले नमुना नेपाल निर्माण कार्य प्रारम्भ भएको जानकारी दिएको छ ।

फाउन्डेसनका अध्यक्ष सीताराम कट्टेलले पाँच वर्षभित्र परियोजना सक्नेगरी परियोजना सुरू भएको बताए । रौतहटमा बाढीपीडितका लागि एकीकृत बस्ती बनाउँदै गरेका सीताराम कट्टेलले प्रारम्भिक चरणको काम सुरू भएको जानकारी दिए । 

परियोजना सर्भेमा नेपाली विज्ञ

‘नमुना नेपाल’ नेपाली कला र सिर्जनाको अद्वितीय संगम भएकाले परियोजनाको डिटेल सर्भेमा नेपाली विषयविज्ञहरू नै प्रयोग गरिएको कट्टेलले बताए । कट्टेलका अनुसार नेपाल इन्जिनियर्स एसोसिएसनको प्राविधिक सहायतामा सर्भे सुरू भएको छ र यो १५ दिनभित्रमा सक्ने योजना छ । “एसोसिएसनका उपमहासचिव एवं जियोकम इन्टरनेशनल प्रालिका प्रबन्ध निर्देशक इन्जिनियर रविभुषण झाको नेतृत्वमा आरआरपी सर्वे कन्सल्टस् प्रालिका प्रभास श्रेष्ठको समन्वयमा काम सुरू भएको छ । र, यो काम १५ दिनभित्रै सकिने छ,” उनले जानकारी दिए ।

उनका अनुसार सर्भेपछि विस्तृत परियोजना प्रतिवेदन (डीपीआर) तयार हुन्छ र अनुमतिका लागि नेपाल सरकारलाई बुझाइनेछ ।

उनले परियोजना नेपाललाई अन्तर्राष्ट्रिय क्षेत्रमा चिनाउने र पर्यटन प्रवद्र्धनको नवीनतम माध्यमसमेत भएकाले सरकारले छिट्टै स्वीकृति दिने विश्वाससमेत व्यक्त गरे ।

परियोजना निर्माणका लागि ललितपुरको श्री सत्य र श्री लालिगुराँस सामुदायिक वन उपभोक्ता समूह लेले र गोदावरी नगरपालिका र स्थानीयसमेतसँग अनुमति लिइसकेकाले सबैको सहयोग पाउने उनको विश्वास छ । 

‘वार्षिक २० लाख पर्यटक भित्र्याउन सकिन्छ’

अहिले वार्षिक सरदर ५ लाख पर्यटक नेपाल भ्रमण गर्न आउने बताउँदै कट्टेलले ‘नमुना नेपाल’ निर्माणपछि २० लाखको हाराहारीमा पर्यटक भित्रिने दाबी गरे । ‘नमुना नेपाल’ नेपाली सम्पदाहरू एकीकृत स्थल र सातै प्रदेशको कला, शिल्पको संगमस्थल बनाउने फाउन्डेशनको लक्ष्य भएकाले आन्तरिक पर्यटकीय केन्द्र बन्नेमा द्विविधा नपाल्न उनले आग्रह गरे ।
त्यस्तै परियोजनाले आर्थिक समृद्धिको ढोका खोल्ने र देशैभरि विकासको लहर ल्याउने उनको दाबी छ । 

पाँच अर्ब लागत, पाँच वर्षमा सक्ने योजना

‘अब विश्वले चिन्नेछ नेपाल, नेपालभित्रको नेपाल, नमुना नेपाल’ नाम दिएको उक्त परियोजनाको अनुमानित लागत पाँच अर्ब रहेको छ । र, पाँच वर्षभित्र परियोजना सक्ने फाउन्डेशनको लक्ष्य छ ।

“नमुना नेपाल निर्माणका लागि संसारभर छरिएर रहेका नेपाली, नेपाली भाषीलाई अनुरोध गरेका छौँ । उहाँहरू उत्साहित पनि हुनुभएको छ,” कट्टेलले भने, “परियोजना नेपाललाई अन्तर्राष्ट्रिय क्षेत्रमा चिनाउने कोशेढुंगा बन्नेछ भन्नेमा हामी विश्वस्त छौँ  ।

कट्टेलले ‘नमुना नेपाल’ निर्माणको अभियन्ता बन्न सबैलाई अनुरोध गरेका छन् । “यो फाउन्डेशनको मात्रै परियोजना होइन, देशकै परियोजना हो । एकै ठाउँमा सम्पूर्ण नेपाल अवलोकन गर्न सकिने, सबै धर्म, भाषाभाषी, समुदाय, सम्प्रदाय र सम्पदा नियाल्ने विशिष्ट ठाउँ पनि हो,” उनले दाबी गरे ।

‘धुर्मुस’ले नमुना नेपालको काम सुरू भएकोमा खुसी व्यक्त गर्दै सहयोगी मनहरूलाई धन्यवादसमेत व्यक्त गरेका छन् । “हाम्रो लागि सहयोगी मनहरू नै सबैभन्दा ठूला हुनुहुन्छ, उहाँहरूकै कारणले हामीले गरेका सबै काम सफल भएका छन्,” उनले बाह्रखरीसँग भने,  “अब ‘नमुना नेपाल’ निर्माणमा पनि सबैजना अभियन्ता बनेर साथ र सहयोग गरिदिनुहुनेछ भन्ने कुरामा हामी ढुक्क छौं ।”

‘नमुना नेपाल’ धुर्मुस सुन्तली फाउण्डेशनको सबैभन्दा ठूलो परियोजना हो ।  फाउन्डेशनले यसअघि काभ्रेको डाँडागाउँमा २० घर पहरी समुदायका लागि, सिन्धुपाल्चोक गिरान्चौरमा ६५ घर तामाङ समुदायका लागि र महोत्तरी बर्दिबासस्थित ५५ घर मुसहर समुदायका लागि एकीकृत नमुना बस्ती बनाइदिइसकेको छ भने रौतहटको सन्तपुरका बाढी पीडितका लागि एकीकृत बस्ती बनाइरहेको छ ।