काठमाडौं । नेपाल प्रिमियर लिग (एनपीएल) रोक्न माग गर्दै जोरा स्पोर्टस् म्यानेजमेन्टका तर्फबाट अमिर अख्तरले सर्वोच्च अदालतमा दायर गरेको रिट न्यायाधीश हरि फुयालको इजलासमा परेको छ । अख्तरले गएको शुक्रबार सर्वोच्चमा रिट दायर गरेका थिए । 

नेपाल प्रिमियर लिग आफ्नो नाममा दर्ता रहेकोमा सोही नाम नेपाल क्रिकेट संघ (क्यान)ले प्रयोग गरेको भन्दै एनपीएल रोक्नुपर्ने माग रिटमा छ । अख्तरले एनपीएलको फ्रेन्चाइज आफ्नो नाममा १० वर्षका लागि क्यानले सहमति गरेर दिइसकेको उल्लेख गरेका छन् । 

त्यसरी दिइसकेको फ्रेन्चाइज अरु नै कम्पनीमार्फत सञ्चालन गर्न नमिल्ने उनको जिकिर छ । आफूमाथि क्यानले अन्याय गरेकाले सर्वोच्चले न्याय गरिदिनुपर्ने उनको माग छ । आफूसँगको सम्झौताविपरीत अर्कै कम्पनीसँग सम्झौता गर्नु करार ऐनविपरीत हुने उनको दाबी छ । 

आगामी मंसिर १६ गतेदेखि काठमाडौंमा प्रतियोगिता आयोजना हुने हुँदै छ । त्यसका लागि क्यानले खेलाडीहरूको अक्सन समेत गराइसकेको छ । प्रतियोगितामा सहभागी आठ वटै क्लब आ–आफ्नो तयारीमा व्यस्त छन् । क्लबहरूले प्रतियोगिताको तयारीका लागि ठूलो धनराशी समेत खर्च पनि गरिसकेका छन् ।