काठमाडौं । नेपाली बजारमा सार्वजनिक बीवाईडी एट्टो ३ को २०२४ संस्करण विशेष र बेस्ट सेलिङ एसयूभी बनेको बीवाईडी ग्लोबलले जनाएको छ । 

बीवाईडी ग्लोबलले सन् २०२२ को अक्टोबरमा एट्टो ३ को १५० किलोवाट मोटर क्षमताको भेरियन्ट सार्वजनिक गर्दै नेपाली बजारमा अत्याधुनिक ईभी एसयूभीकारुपमा प्रभाव पारेको बताएको छ ।

अत्यधिक माग बढेसँगै ग्राहकहरुलाई किफायती र विशेष पर्फमेन्सको ईभी एसयूभी उपलब्ध गराउन सन् २०२३ को फेब्रुअरीमा कम्पनीले बीवाईडी एट्टो ३ को १०० किलोवाट मोटर क्षमताको भेरियन्ट सार्वजनिक गरेको बताएको हो । नेपालले ईभीलाई महत्वका साथ अँगालेको भन्दै यो रुपान्तरणलाई बीवाईडीले ‘लिड’ गरिरहेको कम्पनीको भनाइ छ । हालसम्म नेपालमा करिब साढे पाँच हजार बीवाईडी ईभी बिक्री भइसकेका छन् ।

कम्पनीले यस वर्ष सन् २०२४ मा १०० किलोवाट मोटर क्षमताकै बीवाईडी एट्टो ३ को २०२४ संस्करण सार्वजनिक गरेको बताएको छ । यो नयाँ संस्करणमा महत्वपूर्णरुपमा अपग्रेडेड र डाइनामिक ड्राइभिङ  अनुभव प्रदान गर्ने फिचर समावेश गरिएको कम्पनीको भनाइ छ ।

ब्लेड ब्याट्री र ई–प्लेटमर्फ ३.० मा बनेको १०० किलोवाट मोटर क्षमताको गाडीमा विशेष सुरक्षा, पर्फमेन्स र सस्टेनबिलिटी रहेको कम्पनीको दाबी छ । दुई वर्षमै एट्टो ३ को ३ हजारभन्दा बढी युनिट बिक्री गरिसकेको बताउँदै बीवाईडी ग्लोबलले साइमेक्स इंकसँगको सहकार्यमा नेपाली बजारमा बलियो स्थिती कायम राख्ने बताएको छ । 

मोटरपावरको स्पष्टिकरण

बीवाईडीको नेपालका लागि आधिकारी बिक्रेता साइमेक्स इंककी प्रबन्ध निर्देशक यमुना श्रेष्ठलले बीवाईडी ग्लोबलको यो टिप्पणी नेपाली बजारमा एक सय किलोवाट मोटर क्षमताको एट्टो ३ बारे थप स्पष्टिकरण भएको बताएकी छन् । “मोटरपावरबारे अनेकथरी कुरा आउने गरेका थिए । यो एक किसिमले बीवाईडी ग्लोबलको स्पष्टिकरण पनि हो । उसले नेपालका लागि एक सय किलोवाट मोटरक्षमताको गाडी उत्पादन गरेका हौं भनेको छ । नेपाल मात्रै नभएर भारत, बंग्लादेश र श्रीलंकालगायतमा समेत एकसय किलोवाट मोटर क्षमताको एट्टो ३ बिक्री भइरहेको छ ।”

बीवाईडी ग्लोबलले एक सय किलोवाट मोटर क्षमताको गाडी नेपालमा उपलब्ध गराइ रहेका छौं भन्नु एट्टो ३ को मोटर क्षमता बढी हो भन्नेका लागि आफैमा जवाफ भएको उनको भनाइ छ । 

बीवाईडी एट्टो ३ को २०२४ संस्करणमा इन्फोटेनमेन्ट सिस्टम १५.६ इन्चको छ । सुपेरियर ग्रिप र सबै टेरेन्समा राम्रो ह्यान्डलिङ प्रदान गर्न गाडीको दुवै भेरिएन्टमा हाई–पर्फमेन्स कन्टिनेन्टल टायर रहेको बीवाईडीले जनाएको छ ।

नयाँ संस्करणको गाडी बीवाईडी एपसँग जोडिएको छ । यसबाट गाडीको रेन्ज र पावर लेभल चेक गर्न, टायर प्रेसर चेक गर्न र गाडीका ढोका तथा झ्याल बन्द भएको वा नभएको थाहा पाउन सकिन्छ । यस्तै, टाढैबाट गाडीको अवस्थिति पत्ता लगाउन, एसी सञ्चालन गर्न र गाडीको हर्न तथा लाइट नियन्त्रण गर्नसमेत सकिने कम्पनीले जनाएको छ ।