काठमाडौं । दूरसञ्चार क्षेत्रको नियामक निकाय नेपाल दूरसञ्चार प्राधिकरणले वर्ल्डलिंक कम्युनिकेसनलाई नयाँ अनुमतिपत्र (लाइसेन्स) प्रदान गरेको छ ।

प्राधिकरणले संशोधित दूरसञ्चार नियमावली २०५४ अनुसार वर्ल्डलिंकलाई इन्टरनेट सेवाप्रदायक (आईएसपी) र नेटवर्क सेवाप्रदायक (एनएसपी)को नयाँ लाइसेन्स प्रदान गरेको हो ।

कम्पनीले प्राधिकरणबाट २०५५ चैत १६ गते आईएसपी र २०५६ को साउन १९ गते एनएसपीको लाइसेन्स पाएको थियो ।

दूरसञ्चार ऐन, २०५३ मा दूरसञ्चार सेवाप्रदायक कम्पनीको लाइसेन्स अवधि २५ वर्षको मात्रै हुने व्यवस्था थियो । त्यसैले गत चैत र साउनयता वर्ल्डलिंकले नयाँ लाइसेन्स पाउने वा नवीकरण हुने अन्योल थियो ।

तर, सरकारले हालै दूरसञ्चार नियमावली २०५४ संशोधन गर्दै २५ वर्ष पूरा गरेका कम्पनीलाई पुनः अनुमतिपत्र दिनसकिने व्यवस्था गरिदिएको थियो ।

वर्ल्डलिंकले पाँच वर्षका लागि नयाँ लाइसेन्स प्राप्त गरेको प्राधिकरणका प्रवक्ता सन्तोष पौडेलले बताएका छन् । दुवै लाइसेन्स म्यादनाघेको मितिदेखि नै लागु हुनेगरी प्रदान गरिएको उनले बताए ।