पोखरा । राष्ट्रिय स्वतन्त्र पार्टी (रास्वपा)का सभापति रवि लामिछाने टेलिभिजन कार्यक्रमबाट पाएको लोकप्रियतालाई उपयोग गर्दै राजनीतिमा उत्रिए । चितवनबाट दुई–दुईपटक सांसद बने । अहिले देशकै चौथो ठूलो पार्टीको नेतृत्व गरिरहेका छन् ।

उनी जहाँ जान्छन्, भिड खडा हुन्छ । तर, पोखराको स्थिति फरक छ । लामिछानेलाई पोखरामा कार्यक्रम गर्न प्रहरी नै परिचालन गर्नुपर्ने सम्मको स्थिति आएको छ ।

आफू गृहमन्त्री हुँदा सहकारी ठगीमा संलग्नलाई समात्न नसकेको, आफैँमाथि छानबिन चलिरहेका बेला अनुसन्धानलाई रोकेको आशंकासहित पोखराका सहकारी पीडित उनीदेखि असन्तुष्ट छन् ।

गत वर्ष ७ पुसमा पोखराको अमरसिंह चोकमा भाषण गर्ने क्रममा उनीमाथि खोया प्रहार भएको थियो । त्यसपछि नै उनको नाम सहकारी ठगी प्रकरणमा जोडिएको हो ।

त्यतिबेला खोया प्रहार गर्ने युवा सहकारीसँग नजोडिएको खुले पनि लामिछानेमाथि भने त्यसपछि निरन्तर सहकारी जोडिएका विषय सार्वजनिक भए ।

पोखराकै सूर्यदर्शनदेखि बुटवलको सुप्रिमलगायत विभिन्न सहकारीमा लामिछानेको नाम जोडिन थाल्यो । उनी प्रबन्ध निर्देशक हुँदा गोरखा मिडियामा सूर्यदर्शन सहकारीबाट करोडौँ रकम गएको खुलेको छ ।

पोखरा महानगरपालिकाको प्रतिवेदन अनुसार, लामिछानेको नाममा पनि सहकारीबाट एक करोड रुपैयाँ गएको छ । महानगरको प्रतिवेदनले उनको नाममा रकम गएको देखाएपछि पोखरामा लामिछानेको झन् चर्को आलोचना हुन थालेको हो ।

अठार हजारभन्दा धेरै बचतकर्ताको एक अर्ब ११ करोड रकम सूर्यदर्शन सहकारीले अपचलन गरेको प्रतिवेदनमा उल्लेख छ ।

पीडितहरूले गृहमन्त्री हुँदा लामिछानेलाई भेटेर नै बचत रकम फिर्ता गराइदिन पटकपटक आग्रह गरेका थिए । तर, लामिछानेले कास्कीका एसपीलाई काठमाडौंमा बोलाएर आफ्नो पक्षमा बोल्न लगाएको आरोप उनीमाथि छ ।

जबकि, गत माघ २२ गते पीडितहरूले लामिछानेविरुद्ध पनि जिल्ला प्रहरी कार्यालय कास्कीमा पूरक उजुरी दर्ता गरेका थिए । यस्तो अवस्थामा निष्पक्ष छानबिन गर्नुको सट्टा अनुसन्धान गर्ने निकायलाई नै आफू सहकारीमा संलग्न नरहेको भनेर बोल्न लगाएको पीडितहरूको आरोप छ ।

अहिले लामिछानेमाथि सहकारी प्रकरणलाई लिएर रास्वपाकै सदस्यहरूले समेत प्रश्न उठाउन थालेका छन् । मंगलबार पनि पार्टीको गण्डकी प्रदेशस्तरीय विस्तारित बैठकलाई सम्बोधन गर्न आउँदा सदस्यहरूले नै उनलाई सहकारीको विषय प्रस्ट पार्न माग राखेका थिए ।

लामिछानेलाई उनीहरूको प्रश्न थियो– 'व्यक्तिगत खातामा रकम गएको, गोरखा मिडियामा प्रबन्ध निर्देशक हुँदा सहकारीको करोडौँ रकम गएको विषयको जिम्मेवारी लिनुपर्ने कि नपर्ने ?'

लामिछानेले विगतझैँ आफूले ऋण नलिएको दाबी दोहोर्‍याए । गल्ती गरिसकेको भए अहिलेको सरकारले आफूलाई जेलमा हालिसक्ने भनाइ उनको थियो । तर, अहिलेसम्म प्रमाण नभेटिएको र आफू निर्दोष रहेको उनको जिकिर छ ।

बरु उनले पार्टी सदस्यहरूलाई एकको बदला कांग्रेस–एमालेविरुद्ध पाँच काण्ड लेख्न निर्देशन दिए । “एमालेले भन्यो भने, एमालेको पाँचवटा काण्ड थाहा छैन र ? एकको बदला पाँच हाल्नुहोस् । कांंग्रेसले भन्छ, एकको बदला पाँच हाल्दिनुहोस्, पचास लेख्न मिल्छ, पाँच लेख्नुहोस् । नक्कली भुटानी शरणार्थीदेखि नक्कली डिभोर्ससम्म लेखेर पठाइदिनुहोस् न,” उनले भने ।

लामिछानेले त्यतिबेला आफू प्रबन्ध निर्देशक रहेको भए पनि जीबी राई नै कार्यकारी अध्यक्ष रहेको सदस्यहरूलाई बताए ।

लामिछानेमाथि गत वर्ष ७ पुसमा खोया प्रहार हुँदा नै पीडितहरूले आन्दोलनको तयारी गरेका थिए । कार्यक्रमको अघिल्लो दिन ६ पुसमै पोखरा आएका लामिछानेले आफूविरुद्ध आन्दोलन हुने सूचना पाएका थिए । त्यसपछि उनले सहकारीपीडितलाई पार्टीका प्रदेश समिति कार्यालयमा डाके । राति २ घण्टासम्म उनले पीडितका प्रश्न सुने, ज्ञापनपत्र बुझे ।

उनले समस्या समाधान गर्न आफू तयार रहेको प्रतिबद्धता जनाए । यस भेटको दुई महिनापछि फागुनमा लामिछाने गृहमन्त्री बने । तर, जीबी राईलाई नेपाल झिकाउने काममा असफल भए । त्यसपछि सहकारीपीडित लामिछानेप्रति झनै आक्रामक बनेका हुन् ।

कास्की सहकारी बचत पीडित संघर्ष समितिका संयोजक किरण श्रेष्ठले सरकारको स्रोत साधन हुँदा पनि बोलेजस्तो गरेर काम गर्न नसक्नुले कालो झन्डा, नाराबाजीको अवस्था सिर्जना भएको बताए ।