पोखरा । कुलमान घिसिङको बर्खास्तगीको विषयले गण्डकी प्रदेशसभामा पनि प्रवेश पायो । मंगलबार माओवादी केन्द्रका प्रदेशसभा सदस्यहरूले गण्डकी प्रदेशसभामा कुलमान हटाइनुको बारेमा सरकारको आलोचना गरे । उनीरूले कालो चस्मा लगाएर विरोध पनि जनाए ।

बैठकको शून्य समयमा बोल्दै प्रदेश सांसद रेशम जुग्जालीले लोडसेडिङ अन्त्यका लागि व्यवस्थापकीय भूमिका निर्वाह गरेर देशलाई लोडसेडिङमुक्त बनाउने कुलमानलाई सरकारले बिचौलियाको इसारामा हटाएको आरोप लगाए । “पहिलेदेखि नै सरकार बिचौलियाको इसारामा सरकार चलेको आरोप लाग्दै आएको छ । कुलमान हटाउने निर्णयले त्यही प्रमाणित गरेको छ,” उनले आरोप लगाए ।

माओवादीकै अर्का सांसदले त विधेयकमाथिको छलफलभन्दा बाहिर गएर कुलमानको प्रशंसा र सरकारको आलोचना गरे ।प्रदेशसभामा गण्डकी प्रदेशमा विद्युत् विकास सम्बन्धमा व्यवस्था गर्न बनेको विधेयकमाथिको छलफलमा भाग लिएका माओवादीका हरि भण्डारीले घिसिङको बारेमा सरकारमाथि प्रश्न उठाए । 

“टुकी बालेर बसेका नेपालीलाई बिजुलीको पहुँच दिने, मैनबत्ती बालेर उज्यालो भविष्य खोजिरहेकाहरूलाई विद्युत् जोडिदिएर सहज बनाइदिने, घाटामा गएको प्राधिकरणलाई नाफामा ल्याइदिने कुलमान घिसिङ के अपराधी थिए ?” उनले प्रश्न गरे । 

कार्यकाल सकिन केही समय मात्र बाँकी छँदा सरकारले हटाउने निर्णय गर्दा आमजनताले नै प्रश्न उठाएको उनले बताए । गण्डकीको पहिलो मन्त्रिपरिषद् बैठकले दुई वर्षभित्र उज्यालो प्रदेश घोषणाको निर्णय गरेको थियो । अहिले गण्डकीमा ९९ प्रतिशत घरमा बिजुली पुगेको तथ्यांक मन्त्रालयसँग छ । कुलमान घिसिङजस्तो नेतृत्व विद्युत् प्राधिकरणमा भएकाले जनताका घरमा बत्ती बलेको उनले बताए । 

सभामुख कृष्णप्रसाद धितालले उनलाई विषयमा केन्द्रित हुन निर्देशन दिएका थिए । उनले बोलिसकेको करिब एक घण्टापछि नेकपा एमालेका प्रमुख सचेतक गोविन्दबहादुर नेपालीले नियमापत्ति गरे । उनले जुन विषयमा छलफल चलेको छ त्योभन्दा बाहिर गएर बोल्न नमिल्ने बताए । 

नेपालीले भण्डारीलाई आपत्तिजनक शब्द बोलेको भन्दै त्यसलाई हटाउन माग गरे । “वास्तवमा ‘प्रधानमन्त्रीको सालो’ भन्ने शब्द घोर आपत्तिजनक शब्द हो । म चुनौती दिन चाहन्छु, निर्वाचनमा, उपनिर्वाचनमा प्रचण्ड कमरेडको सामु कुलमान घिसिङको पोस्टर टाँस्दै हिँड्नुभयो । उहाँहरूको सम्बन्ध के हो ? उहाँ माओवादी केन्द्रको नेता हो ?” उनले प्रश्न गरे । “सालो भन्ने शब्द पुष्टि गर्न चुनौती दिँदै म यो सम्मानित शब्दमा त्यो आपत्तिजनक शब्द हटाइयोस् भन्न चाहन्छु ।”

तर, नेपालीले नियमापत्ति गरेको १० मिनेटपछि फेरि हरि भण्डारीले स्पष्टीकरण माग गरे । “नियमावलीको ३० मा स्पष्टीकरण माग गर्न दिन सकिने भनेको छ । जुन शब्द बोल्नेक्रममा सालो भन्ने शब्द बोलिएकै छैन, त्यसप्रति कसरी यो प्रश्न उठ्यो ध्यानाकर्षण गराउन चाहन्छु ।”

सभामुख धितालले पछि रेकर्ड हेर्ने र कार्यव्यवस्थामा छलफल गर्ने बताए । प्रदेशसभा सचिवालयका अनुसार पछि रेकर्ड हेर्ने क्रममा भण्डारीले उक्त शब्द प्रयोग भएको नदेखिएको जनाएको छ ।