काठमाडौं । थाइल्यान्डस्थित नेपाली दूतावासले त्यहाँ अलपत्र परेका पाँचजना नेपालीलाई उद्धार गरी स्वदेश फर्काएको छ । क्यानडा पठाउने भनी थाइल्यान्ड लगी अलपत्र पारिएका उनीहरूलाई दूतावासले शुक्रबार नेपाल पठाएको हो ।

“क्यानाडाको भिसा लगाइदिने भनी थाइल्यान्ड ल्याई राहदानी आफैँसँग लिई बिचौलियाले अलपत्र पारेका चारजना पुरुष तथा एक महिला गरी पाँच नेपाली नागरिकलाई नेपाली राजदूतावास थाइल्यान्डले उद्धार गरी  चैत १५ गतेका दिन नेपाल फर्काइएको छ,” दूतावासद्वारा शुक्रबार जारी विज्ञप्तिमा उल्लेख छ ।

दूतावासले नेपाल सरकारले तोकेका मापदण्डबमोजिम श्रम स्वीकृति लिएर मात्र वैदेशिक रोजगारीमा जान अनुरोध गरेको छ ।

कसैको प्रलोभनमा परी छिटो, धेरै पैसा कमाउने हेतुले वैदेशिक रोजगारीमा नआउन र यस प्रकारको प्रलोभनमा नपर्न पनि दूतावासले आग्रह गरेको छ ।