वाशिङटन । इजरायलका प्रधानमन्त्री बेन्जामिन न्यातानाहुले अमेरिकी कंग्रेसको संयुक्त बैठकलाई सम्बोधन गर्दै आफूले गाजामा गरिरहेको आक्रमणको प्रतिरक्षा गरेका छन् ।

उनले अमेरिकी सांसदहरुलाई भनेका छन्, “हाम्रो दुस्मन तपाईंहरुको पनि दुस्मन हो ।”

उनले आफूहरु इरानसँग लड्दा अमेरिकाको सबै भन्दा कट्टर दुस्मनसँग लडिरहेको हुने बताउँदै आफूहरुको लडाई अमेरिकाको लडाई भएको र आफूहरुको जित पनि अमेरिकाको जीत हुने उल्लेख गरेका छन् ।

उनलाई रिपब्लिकन नेताहरुले जोडदार रुपमा स्वागत गरेका थिए । बैठकमा कतिपय डेमोक्रयाट नेता भने जानीजानी बैठकमा अनुपस्थित भएका थिए ।

सम्बोधनको क्रममा इजरायली प्रधानमन्त्रीले भारी विरोधको पनि सामना गर्नुपरेको थियो । विभिन्न ब्यानर लिएर उनको विरोध पनि गरिएको थियो । एउटा ब्यानरमा नेतान्याहु युद्ध अपराधी भएको जनाउँदै ‘वान्टेड वार क्रिमिनल’ लेखिएको ब्यानर समेत राखिएको थियो ।

उनको सम्बोधनमा अवरोध गर्ने ५ जनालाई क्यापिटल बिल्डिङबाट गिरफ्तार समेत गरिएको थियो । उनले विरोध गर्नेहरुलाई सम्बोधन गर्दै उनीहरु आधिकारिक रुपमा इरानका लागि उपयोगी मुर्ख भएको आरोप लगाएका थिए । (बीबीसी)