काठमाडौं । पछिल्लो समय सहकारी ठगी प्रकरणमा पूर्वगृहमन्त्रीदेखि पूर्वडीआईजीसम्म प्रहरी थुनामा छन् । पोखराको सूर्यदर्शन सहकारीसहित विभिन्न पाँच सहकारी ठगी प्रकरणमा जोडिएपछि राष्ट्रिय स्वतन्त्र पार्टी (रास्वपा)का सभापति तथा पूर्वगृहमन्त्री रवि लामिछाने र पूर्वडीआईजी छविलाल जोशी कास्की प्रहरीमा थुनामा छन् ।

तर, सोही प्रकृतिको सहकारी ठगी प्रकरणमै जिल्ला अदालत काठमाडौंले पक्राउ पुर्जी जारी गरेका एक प्रहरी निरीक्षक (इन्स्पेक्टर) भने पक्राउ पुर्जी जारी भएको एक वर्षदेखि कार्यरत रहेको पाइएको छ । प्रहरी वृत्त स्वयम्भुमा कार्यरत प्रहरी निरीक्षक धर्मेन्द्र अकौलिया पक्राउ पुर्जी जारी भएको एक वर्षदेखि सेवामै कार्यरत रहेको खुलेको हो । 

फौजदारी कसुरमा अदालतबाट पक्राउ पुर्जी जारी हुनासाथ सरकारी कर्मचारी स्वतः निलम्बन हुने कानुनी व्यवस्था छ । तर, कानुन कार्यान्वयन गराउने प्रहरीले नै आफ्नै निरीक्षक अकौलियालाई पक्राउ गर्नुको साटो नियमित काममा लगाएको खुलेको छ ।

उनीसहित मारुती सहकारीका सञ्चालक वसन्त भेटवालविरुद्ध नृपेश श्रेष्ठले आपराधिक विश्वासघात कसुरमा जाहेरी दिएका थिए । सोही जाहेरीका आधारमा भेटवालसहित निरीक्षक अकौलियालाई जिल्ला अदालत काठमाडौंले पक्राउ पुर्जी जारी गरेको थियो ।

भेटवाल मारुती सहकारीका अध्यक्ष हुन् । अकौलिया सहकारीका सदस्य हुन् । पक्राउ पुर्जी जारी भएको एक वर्षपछि भने मंसिर ४ गते निरीक्षक अकौलिया स्वयम्भु वृत्तमै रहेको खुलेकाे थियाे । त्यसलगत्तै भने उनलाई स्वयम्भु प्रहरीले नै जिल्ला अदालत काठमाडौंमा पेस गरेको खुलेको हो ।

मंसिर ५ गते भएको थुनछेक बहसपछि उनी एकलाख रुपैयाँ धरौटीमा छुटेको खुलेको छ । काठमाडौं प्रहरीका प्रवक्ता एसपी नवराज अधिकारीले यस प्रकरणबारे आफूले बुझ्नुपर्ने प्रतिक्रिया दिए ।

तर, उपत्यका प्रहरी कार्यालय स्रोतले ०८० भदौ २६ गते पक्राउ पुर्जी जारी भएका अकौलियालाई एक वर्षपछि मंसिर ४ मा मात्रै अदालत पेस गराइएको बताएको छ । हाल उनी निलम्बनमा छन् ।