काठमाडौं । यूईएफए च्याम्पियन्स लिगको पाँचौं खेलमा जर्मन क्लब बायर्न म्युनिखले फ्रेन्च जायन्ट पेरिस सेन्ट जर्मन (पीएसजी) विरुद्ध १–० को कठिन जित निकालेको छ । 

मंगलबार राति घरेलु मैदान एलियन्ज रंगशालामा भएको खेलमा बायर्नलाई जित दिलाउन किन मिन जाईले गरेको एकमात्र गोल निर्णायक बन्यो । उनले खेलको ३८औँ मिनेटमा गोल गर्दै घरेलु टिमलाई अग्रतामा राखेका थिए । 

जितसँगै पाँच खेलबाट नौ अंक जोडेको बायर्न तालिकाको ११औँ स्थानमा उक्लिएको छ । च्याम्पियन्स लिगमा बायर्नको यो तेस्रो जित हो । समान खेलबाट चार अंक जोडेको पीएसजी भने तालिकाको २६औँ स्थानमा छ । पीएसजीको भने यो तेस्रो हार हो । 

मंगलबार नै भएको अर्को खेलमा इंग्लिस क्लब म्यानचेस्टर सिटी फेयेनुर्डसँग ३–३ को बराबरीमा रोकिएको छ । घरेलु मैदान इत्तिहाद रंगशालामा भएको खेलमा सिटीले ५३ मिनेटभित्र ३–० को अग्रता बनाएको थियो । तर, त्यसपछि लगातार तीन गोल बेहोर्दा सिटी अंक बाढ्न बाध्य बन्यो । 

खेलको ४४औँ मिनेटमा हाल्यान्डले पेनाल्टीमा गोल गरेपछि सिटीले पहिलो हाफमा १–० को अग्रता बनाएको थियो । ५०औँ मिनेटमा इल्काई गुन्डोगानले अग्रता दोब्बर बनाए । त्यसको तीन मिनेटपछि नै हाल्यान्डले सिटीबाट तेस्रो गोल गरेका थिए । 

तर, ७५औँ मिनेटमा एनिस हाज मोउसा, ८२औँ मिनेटमा सान्टियागो गिमेनिज र ८९औँ मिनेटमा डेविड हान्कोले गोल गरेपछि पाहुना टिम खेलमा फर्कियो । 

च्याम्पियन्स लिगमा संघर्षरत सिटी तालिकाको १५औँ स्थानमा छ । सिटीले पाँच खेल खेल्दा आठ अंक जोडेको छ । समान खेलबाट सात अंक जोडेको फेयेनुर्ड तालिकाको २०औँ स्थानमा छ ।